കണ്ണൂർ: വിവാദപ്രസ്താവനകൾ പരസ്യമായി നടത്തുന്ന കോൺഗ്രസ് നേതാക്കൾക്ക് താക്കീതുമായി കെപിസിസി അധ്യക്ഷനും മന്ത്രിയുമായ സണ്ണി ജോസഫ്. അഭിപ്രായങ്ങൾ പാർട്ടി വേദികളിൽ പറയാം. പരസ്യ പ്രതികരണങ്ങൾ ഭൂഷണമല്ല. അത് തുടരാൻ അനുവദിക്കില്ല. പാർട്ടിക്ക് അവമതിപ്പിക്കുണ്ടാക്കുന്ന പ്രസ്താവനകൾ നേതാക്കൾ നടത്തരുത്. വിവാദമുണ്ടാക്കാനുള്ള അവകാശം ആർക്കുമില്ല. പാർട്ടിയും സർക്കാരും കൈക്കൊള്ളുന്ന തീരുമാനങ്ങൾ അംഗീകരിക്കാൻ എല്ലാ നേതാക്കളും പ്രവർത്തകരും അംഗങ്ങളും ബാധ്യസ്ഥരാണ്. പാർട്ടി അച്ചടക്കം പാലിക്കണം. വിവാദപ്രസ്താവനകളിൽ നിന്ന് എല്ലാവരും മാറിനിൽക്കണം. അല്ലാത്തപക്ഷം ദേശീയനേതൃത്വത്തെ അറിയിക്കേണ്ടി വരും. എല്ലാവർക്കും ഇത് ബാധകമാണെന്ന് അദ്ദേഹം വാർത്താസമ്മേളനത്തിൽ പറഞ്ഞു.

To advertise here,

അടൂർ പ്രകാശിന് മറുപടിയില്ല. വിവാദപ്രസ്താവനകൾ ഒഴിവാക്കാൻ നേതാക്കന്മാർ ബാധ്യസ്ഥരാണ്. നേതൃത്വം അത് ഇഷ്ടപ്പെടുന്നില്ല. അത് തടയേണ്ടത് എന്റെ ഉത്തരവാദിത്തമാണ്. പ്രതികരണം നേരിട്ട് അറിയിക്കും. അഭിപ്രായങ്ങൾ പറയാനുള്ള വേദികളുണ്ട്. പാർട്ടിക്ക് തലവേദനയാകുന്ന പ്രസ്താവനകൾ ആരും നടത്തരുത്. തുടർച്ചയായ പ്രസ്താവനകൾ പരിധി വിട്ടതുകൊണ്ടാണ് ഇപ്പോൾ ഇത്തരം നിർദേശം നൽകുന്നതെന്നും അദ്ദേഹം വ്യക്തമാക്കി.

പിണറായിക്കെതിരായ കേസ് വൈകിയതിന്റെ പേരിൽ കോൺഗ്രസ് നേതാക്കൾക്കിടയിൽ ഭിന്നസ്വരമുയരുകയും പരസ്യപ്രതികരണങ്ങൾ നടത്തുകയും ചെയ്തിരുന്നു. സിഎംആർഎൽ- എക്സാലോജിക് കേസിൽ പിണറായി വിജയന് ഇ.ഡി. സമൻസ് നൽകിയതിനു പിന്നാലെയാണ് സംസ്ഥാനസർക്കാരിനെതിരെ രൂക്ഷ വിമർശനവുമായി കെ. സുധാകരൻ രംഗത്തെത്തിയത്. ആണുങ്ങളുടെ സർക്കാരാണെങ്കിൽ പിണറായി വിജയനെതിരെ നടപടിയുണ്ടാകുമെന്നാണ് അന്ന് അദ്ദേഹം പറഞ്ഞത്. 'പിണറായിക്കെതിരെ സർക്കാർ നടപടിയിലേക്ക് നീങ്ങണം. ആണുങ്ങളുടെ സർക്കാരാണെങ്കിൽ അത് അതുപോലെ നീങ്ങും. അതിവിടെ ഉണ്ടോ എന്നറിയില്ല. നടപടിയുമായി പോകുന്നതിന് എത്രപേർ നട്ടെല്ല് കാണിക്കുമെന്ന് നോക്കാമെന്നാണ് അദ്ദേഹം പറഞ്ഞത്.

കെപിസിസി പ്രസിഡന്റായിരുന്ന കെ സുധാകരനെ പുകച്ചുപുറത്തുചാടിച്ചതുപോലെ യുഡിഎഫ് കൺവീനർ സ്ഥാനത്തുനിന്ന് തന്നെ പുറത്താക്കാൻ നീക്കം നടക്കുന്നുവെന്നായിരുന്നു അടൂർ പ്രകാശിന്റെ ആരോപണം.

അന്ന് തുറന്നുപറഞ്ഞതിന് തന്നെ മോശക്കാരനായി ചിത്രീകരിക്കാൻ ശ്രമമുണ്ട്. സർക്കാരിന്റെ സുപ്രധാന തീരുമാനങ്ങൾ താൻ അറിയാറില്ല. പാർടിയോടും മുന്നണിയോടും ആലോചിക്കാതെയാണ് മുഖ്യമന്ത്രി വി ഡി സതീശൻ നയപരമായ തീരുമാനമെടുക്കുന്നതെന്ന അപസ്വരം പാർടിക്കുള്ളിലുണ്ടെന്നും ഇക്കാര്യങ്ങൾ ചൂണ്ടിക്കാണിച്ച് എഐസിസിക്ക് പരാതി കൊടുത്തിട്ടുണ്ടെന്നും അടൂർ പ്രകാശ് പറഞ്ഞിരുന്നു. രണ്ട് നേതാക്കൾക്കും മറുപടിയുമായി കെ മുരളീധരൻ രംഗത്തെത്തിയിരുന്നു. ഒരാൾ മുഖ്യമന്ത്രിക്കെതിരേ നിരന്തരം ആരോപണം ഉന്നയിക്കുന്നുണ്ടെങ്കിൽ അതിന് പിന്നിൽ ആരോ ഉണ്ടെന്നാണ് മുരളീധരൻ പറഞ്ഞത്. ഇത്തരത്തിൽ തുടർച്ചയായ പരസ്യപ്രതികരണങ്ങൾ പുറത്തുവന്ന  പശ്ചാത്തലത്തിലാണ് കെപിസിസി അധ്യക്ഷന്റെ താക്കീത്.

പിണറായി വിജയൻ പ്രതിയായി കേസിൽ നിയമം നിയമത്തിന്റെ വഴിക്ക് പോകട്ടെയെന്നും അദ്ദേഹം പറഞ്ഞു. കേസ് രജിസ്റ്റർ ചെയ്തിട്ടുണ്ട്. അത് അതിന്റെ രീതിക്ക് തന്നെ പോകും. സിഎംആർഎൽ കേസിൽ സർക്കാരിന്റെ നിലപാട് പക്വതയോടെയാണെന്നും സണ്ണി ജോസഫ് കൂട്ടിച്ചേർത്തു.