കണ്ണൂർ: ധർമ്മടത്ത് മണ്ഡല പര്യടനത്തിനിടെ എൽഡിഎഫ് സർക്കാരിന്റെ പ്രധാന നേട്ടങ്ങൾ എണ്ണിപ്പറഞ്ഞ് മുഖ്യമന്ത്രി പിണറായി വിജയൻ. ലൈഫ് മിഷൻ പദ്ധതിയിലൂടെ അഞ്ച് ലക്ഷം വീടുകൾ പൂർത്തിയാക്കിയതായും ഭവനരഹിതർക്കായി ഇതിന്റെ രണ്ടാം ഘട്ടം ഉടൻ നടപ്പാക്കുമെന്നും ധർമ്മടത്തെ ഇടത് സ്ഥാനാർഥി കൂടിയായ പിണറായി വിജയൻ ഉറപ്പുനൽകി.

To advertise here,

നിലവിൽ 1600 രൂപയായ ക്ഷേമ പെൻഷൻ, ഘട്ടംഘട്ടമായി 3000 രൂപയിലേക്ക് വർധിപ്പിക്കുമെന്ന പ്രഖ്യാപനവും അദ്ദേഹം നടത്തി. മുൻപ് ഉണ്ടായിരുന്ന കുടിശ്ശികകൾ തീർത്തും കൃത്യമായി ആനുകൂല്യങ്ങൾ എത്തിച്ചും സർക്കാർ ജനവിശ്വാസം നേടിയതായി അദ്ദേഹം അവകാശപ്പെട്ടു.

പാവപ്പെട്ടവർക്കായി അഞ്ചു ലക്ഷം വീടുകൾ നിർമ്മിച്ചു നൽകുമെന്ന വാഗ്ദാനം എൽഡിഎഫ് പൂർത്തിയാക്കി. വീടില്ലാത്തവർക്കായി 'ലൈഫ് മിഷൻ 2' എന്ന പദ്ധതി നടപ്പാക്കുമെന്നും അദ്ദേഹം പ്രഖ്യാപിച്ചു.

നിലവിൽ 62 ലക്ഷം പേർക്കാണ് കേരളത്തിൽ സാമൂഹ്യ ക്ഷേമ പെൻഷൻ ലഭിക്കുന്നത്. 2016-ൽ എൽഡിഎഫ് അധികാരത്തിൽ വരുമ്പോൾ ഉണ്ടായിരുന്ന 18 മാസത്തെ പെൻഷൻ കുടിശിക പൂർണ്ണമായും കൊടുത്തുതീർത്തതായും അദ്ദേഹം പറഞ്ഞു. സാമൂഹ്യ ക്ഷേമ പെൻഷൻ ഘട്ടംഘട്ടമായി വർധിപ്പിച്ച് 1600 രൂപയായും പിന്നീട് 2000 രൂപയായും ഉയർത്തി. ഇപ്പോൾ ഈ തുക 3000 രൂപയായി വർധിപ്പിക്കുമെന്ന് എൽഡിഎഫ് പ്രഖ്യാപിച്ചിട്ടുണ്ടെന്നും പിണറായി പറഞ്ഞു.

എൽഡിഎഫ് നൽകുന്ന വാഗ്ദാനങ്ങൾ കൃത്യമായി പാലിക്കുമെന്നും നാടിന്റെ വികസനത്തിനായി എൽഡിഎഫ് ഭരണം തുടരണമെന്നാണ് ജനങ്ങൾ ആഗ്രഹിക്കുന്നതെന്നും പിണറായി വിജയൻ പറഞ്ഞു. പെൻഷൻ വർധന പോലുള്ള നടപടികൾ എൽഡിഎഫ് വന്നാൽ മാത്രമേ നടപ്പാകൂ എന്നും അദ്ദേഹം അവകാശപ്പെട്ടു. നൽകിയ വാഗ്ദാനങ്ങൾ പാലിക്കാനുള്ള ഇടതുപക്ഷത്തിന്റെ കരുത്താണ് വികസന പ്രവർത്തനങ്ങളുടെ ആധാരമെന്നും അദ്ദേഹം വ്യക്തമാക്കി. ഭരണത്തുടർച്ചയിലൂടെ മാത്രമേ സാധാരണക്കാരുടെ ജീവിതനിലവാരം ഉയർത്തുന്ന ഇത്തരം തീരുമാനങ്ങൾ നടപ്പാക്കാൻ സാധിക്കൂ എന്നും പിണറായി കൂട്ടിച്ചേർത്തു.