തിരുവനന്തപുരം: കേരളത്തിൽ കടുത്തചൂട് തുടരുന്നതിനാൽ ഉഷ്ണതരംഗത്തിന് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. പാലക്കാട്, തൃശ്ശൂർ, കൊല്ലം ജില്ലകളിലാണ് മുന്നറിയിപ്പ്. വെള്ളിയാഴ്ചയും മുന്നറിയിപ്പ് തുടരും. കേരളത്തിൽ ഉഷ്ണതരംഗസാഹചര്യം ഉണ്ടാകുന്നത് അപൂർവമാണ്. 2016-ൽ പാലക്കാട്ടും തൃശ്ശൂരും 2024-ൽ പാലക്കാട്ടും കോഴിക്കോടുമാണ് ഉഷ്ണതരംഗം സ്ഥിരീകരിച്ചത്. 27 മുതൽ വേനൽമഴയുണ്ടാകുമെന്നാണ് പ്രവചനം. തുടർന്നുള്ള ദിവസങ്ങളിലും മെച്ചപ്പെട്ടതോതിൽ മഴയുണ്ടാകും. 26വരെ 12 ജില്ലകളിലും താപനില ശരാശരിയിൽനിന്ന് മൂന്ന്-നാല് ഡിഗ്രി കൂടുതലായിരിക്കുമെന്നാണ് മുന്നറിയിപ്പ്.

To advertise here,

കൊല്ലത്തും തൃശ്ശൂരും അവധി

താപനില 40 ഡിഗ്രി വരെ ഉയരാൻ സാധ്യതയുള്ളതിനാൽ കൊല്ലം, തൃശ്ശൂർ ജില്ലകളിലെ പ്രൊഫഷണൽ കോളേജുകൾ അടക്കമുള്ള എല്ലാ വിദ്യാഭ്യാസസ്ഥാപനങ്ങൾക്കും കളക്ടർമാർ വെള്ളിയാഴ്ച അവധി പ്രഖ്യാപിച്ചു.

ഉഷ്ണതരംഗമെന്നാൽ

  • ഒരു മേഖലയിലെ രണ്ടിടങ്ങളിൽ സാധാരണയെക്കാൾ 4.5 ഡിഗ്രി സെൽഷ്യസോ അതിലധികമോ ചൂട് കൂടി നിൽക്കുന്ന അവസ്ഥ.
  • സമതലപ്രദേശങ്ങളിൽ 40 ഡിഗ്രി സെൽഷ്യസോ അതിൽ കൂടുതലോ
  • തീരപ്രദേശങ്ങളിൽ 37 ഡിഗ്രിയോ കൂടുതലോ
  • തുടർച്ചയായി രണ്ടുദിവസം ഇതിൽ രണ്ടെണ്ണം ഉണ്ടായാൽ ഉഷ്ണതരംഗം പ്രഖ്യാപിക്കാം.