തിരുവനന്തപുരം: ബജറ്റിനെക്കുറിച്ചുള്ള പൊതുചര്‍ച്ചയ്ക്കുശേഷം നിര്‍ത്തിവെച്ച നിയമസഭാ സമ്മേളനം തിങ്കളാഴ്ച പുനരാരംഭിക്കും. സി.പി.എം. സംസ്ഥാന സമ്മേളനം പ്രമാണിച്ച് ബുധനാഴ്ചമുതല്‍ സമ്മേളനത്തിനു വീണ്ടും ഇടവേളയാണ്. 10-നു വീണ്ടും ചേരും.

To advertise here,

സംസ്ഥാനത്ത് സ്വകാര്യ സര്‍വകലാശാലകള്‍ സ്ഥാപിക്കാന്‍ അനുവദിക്കുന്ന ബില്ലും സര്‍വകലാശാലാ ഭേദഗതി ബില്ലും തിങ്കളാഴ്ച മന്ത്രി ഡോ. ആര്‍.ബിന്ദു അവതരിപ്പിക്കും. സര്‍വകലാശാലാ കാര്യങ്ങളില്‍ പ്രൊ ചാന്‍സലര്‍ എന്ന നിലയില്‍ ഇടപെടുന്നതിന് മന്ത്രിക്കു കൂടുതല്‍ അധികാരം നല്‍കുന്നതാണ് സര്‍വകലാശാലാ ഭേദഗതി ബില്‍. രണ്ടു ബില്ലുകളും തിങ്കളാഴ്ച സബ്ജക്ട് കമ്മിറ്റിക്ക് അയക്കും. സമ്മേളനം അവസാനിക്കുന്ന 25-ന് ഇവ പാസാക്കും.

ഈയാഴ്ച രണ്ടുദിവസമേ സമ്മേളനമുള്ളൂ. സാമൂഹികവും രാഷ്ട്രീയവുമായ പ്രശ്നങ്ങളുടെ നടുവിലാണ് സമ്മേളനം പുനരാരംഭിക്കുന്നത്. ലഹരിമരുന്ന് ഉപയോഗം വ്യാപിക്കുന്നതും കൊലപാതകങ്ങളും അക്രമങ്ങളും പെരുകുന്നതും ക്രമസമാധാന തകര്‍ച്ചയായി പ്രതിപക്ഷം സഭയില്‍ ഉന്നയിക്കും. ഈ പ്രശ്നത്തില്‍ തിങ്കളാഴ്ച സഭയില്‍ അടിയന്തരപ്രമേയം അവതരിപ്പിക്കും. ആശ വര്‍ക്കര്‍മാരുടെ സമരത്തിനു സഭയിലും പ്രതിപക്ഷം പിന്തുണ പ്രകടിപ്പിക്കും. കോണ്‍ഗ്രസിലെ ആഭ്യന്തരപ്രശ്നങ്ങളായിരിക്കും ഭരണപക്ഷത്തിന്റെ ആയുധം.

ബജറ്റില്‍ വിവിധ വകുപ്പുകള്‍ നീക്കിവെച്ചിരിക്കുന്ന പണം ചെലവിടുന്നതിനുള്ള ധനാഭ്യര്‍ഥനകള്‍ ചര്‍ച്ചചെയ്യാന്‍ ഇത്തവണ ഏഴുദിവസം മാത്രമാണ് അനുവദിച്ചിട്ടുള്ളത്. ഇത് അംഗീകരിക്കാനാവില്ലെന്നാണ് പ്രതിപക്ഷത്തിന്റെ നിലപാട്.

സർവകലാശാല നിയമഭേദഗതി ബിൽ സഭയിൽ വരുന്നത് ഗവർണറുടെ അംഗീകാരമില്ലാതെ

തിരുവനന്തപുരം: സർവകലാശാല നിയമഭേദഗതി ബിൽ തിങ്കളാഴ്ച നിയമസഭയിൽ വരുന്നത് ഗവർണറുടെ അംഗീകാരമില്ലാതെ. സാങ്കേതിക സർവകലാശാല, കൊച്ചി സർവകലാശാല, മലയാളം സർവകലാശാല എന്നിവയുടെ നിയമഭേദഗതിക്കായി ഒരു സെറ്റ് ബിൽ ഗവർണർക്ക് സർക്കാർ സമർപ്പിച്ചിരുന്നു. ചട്ടപ്രകാരം ഇതിന്റെ ഇംഗ്ലീഷ് തർജമയാണ് നൽകിയത്. എന്നാൽ കേരള, എം.ജി., കാലിക്കറ്റ്, കണ്ണൂർ സർവകലാശാലകളുടെ നിയമഭേദഗതിക്കുള്ള ബിൽ ഗവർണർക്ക് സമർപ്പിച്ചിട്ടുമില്ല.

സർവകലാശാലകളുടെ സ്വയംഭരണം കവരുന്നതും ചാൻസലർ എന്ന നിലയിൽ ഗവർണർക്കുള്ള അധികാരം പരിമിതപ്പെടുത്തുന്നതുമാണ് സർവകലാശാല ഭേദഗതി ബില്ലെന്ന് ആക്ഷേപം ഉയർന്നിരുന്നു.