കൊല്ലം:തിരുവനന്തപുരം റെയിൽവേ ഡിവിഷനുകീഴിലെ കൂടുതൽ തീവണ്ടികൾ ആധുനിക എൽഎച്ച്ബി (ലിങ്ക് ഹോഫ്മാൻ ബുഷ്) കോച്ചുകളിലേക്ക് മാറുന്നു. തിരുവനന്തപുരം-കോഴിക്കോട്-തിരുവനന്തപുരം ജനശതാബ്ദി എക്സ്പ്രസും തിരുവനന്തപുരം-സെക്കന്തരാബാദ്, സെക്കന്തരാബാദ്-തിരുവനന്തപുരം ശബരി എക്സ്പ്രസും താമസിയാതെ എൽഎച്ച്ബി കോച്ചുകളിലേക്ക് മാറും. ജർമൻ ഡിസൈനിലുള്ള എൽഎച്ച്ബി കോച്ചുകൾ കൂടുതൽ സുരക്ഷിതവും സൗകര്യപ്രദവുമാണ്.
തിരുവനന്തപുരം-എറണാകുളം പാതയിൽ തീവണ്ടികൾ മണിക്കൂറിൽ നൂറുകിലോമീറ്റർ വേഗത്തിലോടാൻ കഴിയുംവിധം ട്രാക്ക് പരിഷ്കരിച്ച സാഹചര്യത്തിലാണ് കൂടുതൽ തീവണ്ടികൾ എൽഎച്ച്ബി കോച്ചിലേക്ക് മാറുന്നത്. തിരുവനന്തപുരം-കണ്ണൂർ ജനശതാബ്ദി ട്രെയിൻ നേരത്തേതന്നെ എൽഎച്ച്ബി കോച്ചിലേക്ക് മാറി. ജർമൻ സാങ്കേതികവിദ്യയിൽ നിർമിച്ച ആധുനിക റെയിൽ കോച്ചുകളാണ് എൽഎച്ച്ബി കോച്ചുകൾ. 160 കിലോമീറ്റർ വേഗത്തിൽവരെ ഓടാൻ കഴിയുന്ന കോച്ചുകളാണിവ.
നിലവിൽ ജനശതാബ്ദി ട്രെയിനുകളിൽ പത്തുവർഷത്തിലേറെ പഴക്കമുള്ള കോച്ചുകളാണുള്ളത്. സുരക്ഷാ കാരണങ്ങളാലാണ് കാലാവധി കഴിയുന്നതിനുമുൻപേ കോച്ചുകൾ മാറ്റുന്നത്. സാധാരണ ഇരുപത്തഞ്ച് വർഷമാണ് കോച്ചുകളുടെ കാലാവധി.
തിരുവനന്തപുരം ഡിവിഷനിലെ ഭൂരിഭാഗം എക്സ്പ്രസ് തീവണ്ടികളും എൽഎച്ച്ബി കോച്ചുകളിലേക്ക് മാറ്റിക്കഴിഞ്ഞു. ഉയർന്ന സുരക്ഷ നൽകുന്നതും സ്റ്റെയിൻലെസ് സ്റ്റീലിൽ നിർമിച്ചതുമാണിവ. വീതികൂടിയ സീറ്റുകളും കാൽനീട്ടിവയ്ക്കാനുള്ള സൗകര്യവും ഉണ്ട്. ഇന്ത്യൻ റെയിൽവേ 2000 മുതലാണ് ഇത്തരം കോച്ചുകൾ ഉപയോഗിച്ചുതുടങ്ങിയത്. ആദ്യഘട്ടത്തിൽ ജർമനിയിൽനിന്ന് ഇറക്കുമതിചെയ്തിരുന്നെങ്കിലും ഇപ്പോൾ പഞ്ചാബിലെ കപൂർത്തല റെയിൽ കോച്ച് ഫാക്ടറിയിലാണ് നിർമിക്കുന്നത്.
Content Highlights: Jan Shatabdi and Sabari to LHB coaches
Published: 21 Mar 2025, 07:57 am IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented