ഗുരുവായൂര്‍: ക്ഷേത്രനഗരിയില്‍ വാഹനം പാര്‍ക്ക് ചെയ്യാനുള്ള സ്ഥലമന്വേഷിച്ച് ചുറ്റിക്കറങ്ങേണ്ടാ, ക്യൂആര്‍ കോഡ് സ്‌കാന്‍ ചെയ്താല്‍ പാര്‍ക്കിങ് സൗകര്യമറിയാം. ഗുരുവായൂരില്‍ ശബരിമല സീസണ്‍ മുന്നൊരുക്കത്തിന്റെ ഭാഗമായി നഗരസഭയുടെ നേതൃത്വത്തില്‍ നടന്ന യോഗത്തിലായിരുന്നു ഇങ്ങനെയൊരു സംവിധാനം ചര്‍ച്ചചെയ്തത്. നഗരത്തിന്റെ പ്രധാന സ്ഥലങ്ങളില്‍ ക്യൂആര്‍ കോഡുകള്‍ സ്ഥാപിക്കും. വൃശ്ചികം ഒന്നിനുമുമ്പ് ഇത് സ്ഥാപിക്കാനാണ് തീരുമാനം.
ശബരിമല സീസണില്‍ ഗുരുവായൂരിലെ ഔട്ടര്‍ റിങ് റോഡില്‍ മുഴുവന്‍ വാഹനങ്ങള്‍ക്കും വണ്‍വേ ഏര്‍പ്പെടുത്തും. നിലവില്‍ ചെറുവാഹനങ്ങളെയാണ് ഒഴിവാക്കിയത്. മഞ്ജുളാല്‍-ക്ഷേത്രം റോഡില്‍ രാവിലെ ഏഴുമുതല്‍ രാത്രി ഏഴുവരെ വഴിയോരക്കച്ചവടം അനുവദിക്കില്ല. നഗര ഉപജീവനമിഷന്റെ തിരിച്ചറിയല്‍ കാര്‍ഡുള്ളവരെ മാത്രമേ കച്ചവടം ചെയ്യാന്‍ അനുവദിക്കൂ.
തെക്കേനടയില്‍ പഴയ ദേവസ്വം ക്വാര്‍ട്ടേഴ്സ് സ്ഥലം ഹെവി വാഹനങ്ങള്‍ക്കുള്ള പാര്‍ക്കിങ് സ്ഥലമാക്കും. മഞ്ജുളാല്‍ മുതല്‍ ക്ഷേത്രനട വരെ ഇരുചക്രവാഹനങ്ങള്‍ നിര്‍ത്താന്‍ അനുവദിക്കില്ല. അമ്പാടി പാര്‍ക്കിനോട് ചേര്‍ന്നുള്ള സ്ഥലത്താണ് നിര്‍ത്തേണ്ടത്. ശുചീകരണമുള്‍പ്പെടെയുള്ള ജോലികള്‍ക്കായി നഗരസഭ 2000 തൊഴിലാളികളെ നിയോഗിക്കും. അടിയന്തരചികിത്സയ്ക്കായി ദേവസ്വം ആശുപത്രിയില്‍ കൂടുതല്‍ സൗകര്യമൊരുക്കുമെന്ന് ദേവസ്വം അഡ്മിനിസ്ട്രേറ്റര്‍ ഒ.ബി. അരുണ്‍കുമാര്‍ അറിയിച്ചു.
നഗരസഭാ ചെയര്‍മാന്‍ എം. കൃഷ്ണദാസ് അധ്യക്ഷനായി. ഗുരുവായൂര്‍ എസിപി പ്രേമാനന്ദകൃഷ്ണന്‍, നഗരസഭാ സെക്രട്ടറി എച്ച്. അഭിലാഷ്, ഗുരുവായൂര്‍ ആര്‍ടിഒ രമേഷ്, നഗരസഭാ ഹെല്‍ത്ത് സൂപ്രണ്ട് കെ.സി. അശോക് തുടങ്ങിയവരും പങ്കെടുത്തു.
Content Highlights: Find available parking in Guruvayoor easily! Scan QR codes for real-time parking info. Essential for devotees during Sabarimala season. Plan your visit now!
Published: 05 Nov 2025, 08:03 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented