ആലപ്പുഴ: കടയ്ക്കൽ സബ് ട്രഷറി ഓഫീസറായ ഇടതു യൂണിയൻ നേതാവിനെ കുടുംബശ്രീ ആലപ്പുഴ ജില്ല മിഷനിൽ നിയമിക്കാൻ കൊല്ലം ഡി.സി.സി. പ്രസിഡന്റ് പി. രാജേന്ദ്രപ്രസാദ് മുഖ്യമന്ത്രിക്കു നൽകിയ ശുപാർശക്കത്ത് പിൻവലിച്ചു.

To advertise here,

വലതു യൂണിയനിലുള്ളവരെ നിയമിക്കാൻ ശുപാർശ നൽകാതെ ഇടതു നേതാവിനുവേണ്ടി പ്രവർത്തിച്ചത് കോൺഗ്രസ് അനുകൂല സംഘടനകൾക്കിടയിൽ വ്യാപക പ്രതിഷേധമുയർന്ന സാഹചര്യത്തിലാണിത്.

ഡി.സി.സി. ജനറൽ സെക്രട്ടറി ഫൈസൽ കുളപ്പാടം തന്നെ തെറ്റിദ്ധരിപ്പിച്ചാണ് കത്തു വാങ്ങിയതെന്നും അദ്ദേഹത്തോട് വിശദീകരണം തേടുമെന്നും രാജേന്ദ്രപ്രസാദ് പറഞ്ഞു.

ഡി.സി.സി.യുടെ പ്രമുഖനായ നേതാവു പറഞ്ഞത് താൻ വിശ്വസിച്ചു. അതിനാൽ, രണ്ടാമതൊരു പരിശോധന നടത്തിയില്ല. വലതുപക്ഷ യൂണിയൻ നേതാക്കൾ വിവരം അറിയിച്ചപ്പോഴാണ് തെറ്റുപറ്റിയെന്ന് അറിഞ്ഞത്. ഉടൻതന്നെ കത്തു പരിഗണിക്കരുതെന്ന് ബന്ധപ്പെട്ട ഓഫീസിൽ വിളിച്ച് അറിയിച്ചെന്നും അദ്ദേഹം പറഞ്ഞു.

ഇടതു സർക്കാരിന്റെ കാലത്ത് ജില്ല മിഷൻ കോഡിനേറ്ററായി പ്രവർത്തിച്ച കടയ്ക്കൽ സബ്ട്രഷറി ഓഫീസർ എസ്. രഞ്ജിത്തിനെ ആലപ്പുഴ കുടുംബശ്രീ മിഷനിൽ തിരികെ നിയമിക്കാനുള്ള കത്താണ് വിവാദമായത്.

ഇടത്‌ അനുകൂല സംഘടനയായ കെ.ജി.ഒ.എ.യുടെ ആലപ്പുഴ ജില്ല ജോയിന്റ് സെക്രട്ടറിയും എൻ.ജി.ഒ. യൂണിയൻ മുൻ ജില്ല ജോയിന്റ് സെക്രട്ടറിയുമാണ് രഞ്ജിത്ത്. കാലാവധി കഴിഞ്ഞതിനെത്തുടർന്നാണ് ഏതാനുംമാസം മുൻപ് ജില്ല മിഷൻ കോഡിനേറ്റർ തസ്തികയിൽനിന്നു മാറ്റി രഞ്ജിത്തിനെ മാതൃവകുപ്പായ ട്രഷറി വകുപ്പിലേക്കു തിരിച്ചയച്ചത്.