കാഞ്ഞങ്ങാട്: വടക്കന്‍ കേരളത്തിന്റെ ഏറ്റവും വലിയ ആകര്‍ഷണമായ ബേക്കല്‍ കോട്ടയുടെ തീരം ഇപ്പോള്‍ മറ്റൊരു ഉല്ലാസലഹരിയിലാണ്. കോട്ടയുടെ തെക്കന്‍ താഴ്‌വാരമായ പള്ളിക്കരയില്‍ അന്താരാഷ്ട്ര ബീച്ച് ഫെസ്റ്റിവല്‍ നടക്കുകയാണ്. കഴിഞ്ഞ ദിവസം മുഖ്യമന്ത്രി പിണറായി വിജയനാണ് മേളയ്ക്കു തിരിതെളിയിച്ചത്. ഇരുന്നൂറില്‍പ്പരം സ്റ്റാളുകളാണ് ഇതിന്റെ ഭാഗമായൊരുക്കിയിട്ടുള്ളത്.
തിരമാലകളില്‍ ഉയര്‍ന്നുതാഴ്ന്ന് ആനന്ദാനുഭവം സമ്മാനിക്കുന്ന ഫ്‌ലോട്ടിങ് ബ്രിഡ്ജ് കാണാനും അതില്‍ കയറാനും തിക്കും തിരക്കുമാണ്. വെള്ളത്തില്‍ പൊങ്ങിക്കിടക്കുന്ന ഹൈ- ഡെന്‍സിറ്റി പോളി എത്തലിന്‍ (എച്ച്.ഡി.പി.ഇ.) പ്ലാസ്റ്റിക് ഉപയോഗിച്ചാണ് പാലം നിര്‍മിച്ചിരിക്കുന്നത്. ഇത് വിനോദസഞ്ചാരികള്‍ക്ക് നവ്യാനുഭവം പകരുന്നു. മൂന്ന് മീറ്റര്‍ വീതിയും 150 മീറ്റര്‍ നീളവുമുണ്ടിതിന്. രാവിലെ 11 മുതല്‍ വൈകീട്ട് ആറുവരെ പ്രവേശനം അനുവദിച്ചിട്ടുണ്ട്. ഒരേസമയം 50 പേര്‍ക്കാണ് പാലത്തില്‍ പ്രവേശിക്കാന്‍ സാധിക്കുന്നത്.
ഗ്രാന്‍ഡ് കാര്‍ണിവല്‍, വാട്ടര്‍ സ്‌പോര്‍ട്‌സ്, ഹെലികോപ്റ്റര്‍ റൈഡ്, ഫ്‌ളവര്‍ ഷോ, ബിസിനസ്സ് മേള, അലങ്കാര മത്സ്യമേള, എഡ്യു എക്‌സ്‌പോ, ബി2സി മാര്‍ക്കറ്റ് തുടങ്ങിയ കാഴ്ചകള്‍ ജനുവരി രണ്ടിന് സമാപിക്കും.
ഫെസ്റ്റിവല്‍ കാണാനെത്തുന്നവര്‍ക്ക് ആവശ്യമായ സൗകര്യങ്ങളെല്ലാം ഒരുക്കിയിട്ടുണ്ടെന്ന് സംഘാടകസമിതി ചെയര്‍മാന്‍ സി.എച്ച്. കുഞ്ഞമ്പു എം.എല്‍.എ.യും ബേക്കല്‍ റിസോര്‍ട്ട് ഡെവലപ്പ്‌മെന്റ് കോര്‍പ്പറേഷന്‍ (ബി.ആര്‍.ഡി.സി.) എം.ഡി. ഷിജിന്‍ പറമ്പത്തും അറിയിച്ചു.
Content Highlights: bekal international beach festival kasargode bekal fort
Published: 25 Dec 2022, 06:05 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented