ന്യൂഡൽഹി: ലഹരി നൽകുന്ന താൽക്കാലികമായ ആനന്ദം ജീവിതകാലം മുഴുവൻ നീണ്ടുനിൽക്കുന്ന ദുരിതങ്ങൾക്ക് കാരണമാകുമെന്ന് യുവാക്കൾക്ക് മുന്നറിയിപ്പുമായി പ്രധാനമന്ത്രി നരേന്ദ്ര മോദി. ലഹരിയുടെ ഉപയോഗം വ്യക്തികളുടെ ആരോഗ്യത്തെയും ഭാവിയെയും തകർക്കുമെന്ന് ഓർമിപ്പിച്ചതിനൊപ്പം ലഹരി വിമുക്തി നേടി സാധാരണ ജീവിതത്തിലേക്ക് മടങ്ങിവരുന്നവരെ സമൂഹം പോരാളികളായി കാണണമെന്നും അവരെ ചേർത്തുപിടിക്കണമെന്നും അദ്ദേഹം അഭിപ്രായപ്പെട്ടു.

To advertise here,

അത്തരം വ്യക്തികളെ മാറ്റിനിർത്തുന്നതിന് പകരം സമൂഹം അവർക്ക് അർഹമായ ബഹുമാനവും അംഗീകാരവും നൽകണമെന്ന് അദ്ദേഹം ആഹ്വാനം ചെയ്തു. ഞായറാഴ്ച, 'വികസിത് ഭാരത് സങ്കൽപ് അഭിയാന് വേണ്ടിയുള്ള ലഹരിമുക്ത യുവ' (Nasha Mukt Yuva for Viksit Bharat Sankalp Abhiyan) കാമ്പയിൻ ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. രാജ്യത്തെ യുവാക്കളോട് ലഹരി ഉപയോഗത്തിനെതിരെ പ്രതിജ്ഞയെടുക്കാനും അദ്ദേഹം ആവശ്യപ്പെട്ടു.

പൊതു പരീക്ഷാ സമ്പ്രദായത്തിൽ പരിഷ്‌കാരങ്ങൾ ആവശ്യപ്പെട്ട് ഡൽഹിയിലും രാജ്യത്തിന്റെ മറ്റ് ഭാഗങ്ങളിലും വിദ്യാർത്ഥികളുടെ വൻ പ്രതിഷേധം നടന്നതിന് ദിവസങ്ങൾക്ക് ശേഷം, തങ്ങളെ 'ജെൻ സീ' പ്രതിനിധികളായി വിശേഷിപ്പിക്കുന്ന ധാരാളം യുവാക്കളുടെ സാന്നിധ്യത്തിലാണ് പ്രധാനമന്ത്രി മോദി വെർച്വലായി കാമ്പയിൻ ആരംഭിച്ചത്.

രാജ്യത്തെ യുവാക്കൾ മാനസികമായും ശാരീരികമായും ആരോഗ്യമുള്ളവരായി ഇരിക്കണമെന്നും, അതിനായി എല്ലാവിധ ലഹരി ഉപയോഗങ്ങളിൽ നിന്നും വിട്ടുനിൽക്കേണ്ടത് അത്യാവശ്യമാണെന്നും പ്രധാനമന്ത്രി പറഞ്ഞു. 'യുവാക്കളാണ് നമ്മുടെ രാജ്യത്തിന്റെ ഭാവി' എന്ന് ശത്രുരാജ്യങ്ങൾക്ക് അറിയാം, അതുകൊണ്ടുതന്നെ തങ്ങളുടെ ഭീകര പദ്ധതികളുടെ ഭാഗമായി അവർ മയക്കുമരുന്ന് വിതരണം ഉപയോഗിക്കുന്നു എന്നും മോദി പറഞ്ഞു.

'മയക്കുമരുന്ന് നിങ്ങൾക്ക് കുറച്ച് സമയത്തേക്ക് ഉന്മേഷം നൽകിയേക്കാം, പക്ഷേ അത് നിങ്ങളുടെ മുഴുവൻ കരിയറിനെയും വ്യക്തിജീവിതത്തെയും താഴ്ന്ന നിലയിലാക്കുന്നു. സമൂഹത്തിന്റെ പിന്തുണയിലൂടെയും യോഗയിലൂടെയും ധ്യാനത്തിലൂടെയും ലഹരി വസ്തുക്കളിൽ നിന്ന് മുക്തി നേടാൻ കഴിയുമെന്ന് നമ്മുടെ സംസ്‌കാരം നമ്മെ പഠിപ്പിക്കുന്നു. ലഹരിമുക്തി നേടി തിരിച്ചുവരുന്നവർ പോരാളികളാണ്. സമൂഹം അവരെ ബഹുമാനിക്കണം, അവരെ ചേർത്തുനിർത്തണം, അവർക്ക് രണ്ടാമതൊരു അവസരം കൂടി നൽകണം' പ്രധാനമന്ത്രി പറഞ്ഞു.

'നഷാ മുക്ത് യുവ' കാമ്പയിൻ വ്യക്തിക്കും കുടുംബത്തിനും സമൂഹത്തിനും അതിലുപരി രാജ്യത്തിനുമുള്ള ഒരു ദൃഢനിശ്ചയമാണെന്നും, ഈ സംരംഭത്തിന്റെ പേര് തന്നെ അതിന്റെ ലക്ഷ്യത്തെ പ്രതിഫലിപ്പിക്കുന്നുവെന്നും പ്രധാനമന്ത്രി പറഞ്ഞു. 'വികസിത ഇന്ത്യ കെട്ടിപ്പടുക്കുക എന്ന ലക്ഷ്യം രാജ്യം വെച്ചിരിക്കുമ്പോൾ, യുവാക്കൾ ശാരീരികമായും മാനസികമായും ആരോഗ്യത്തോടെയും ആത്മവിശ്വാസത്തോടെയും ഇരിക്കാൻ ദോഷകരമായ ലഹരികളിൽ നിന്ന് വിട്ടുനിൽക്കേണ്ടത് അത്യാവശ്യമാണ്.' അദ്ദേഹം പറഞ്ഞു.

ലഹരിയുടെ അപകടങ്ങളെക്കുറിച്ച് യുവാക്കൾ മനസ്സിലാക്കുന്നുവെന്ന് ഉറപ്പാക്കാനും എല്ലാ വിധത്തിലും ബോധവാന്മാരായിരിക്കാനും പ്രതിജ്ഞയെടുക്കാൻ അദ്ദേഹം എല്ലാവരോടും അഭ്യർത്ഥിച്ചു. 'ഇന്ന് മുതൽ രാജ്യത്തുടനീളം നഷാ മുക്ത് യുവ അഭിയാൻ (ലഹരിമുക്ത യുവ പ്രചാരണം) ആരംഭിക്കുകയാണ്. ഇതൊരു കൂട്ടായ കാമ്പയിനായി മാറുമ്പോൾ, സ്വന്തമായി ഒന്നും ചെയ്യാൻ കഴിയാത്തവർക്ക് പോലും പുതിയ ഊർജ്ജം ലഭിക്കും.' മോദി പറഞ്ഞു.

'ഇന്ന് എടുത്ത ദൃഢനിശ്ചയം അടുത്ത 100 ആഴ്ചത്തേക്ക് ഇതേ രീതിയിൽ മുന്നോട്ട് പോകും. എല്ലാ ഞായറാഴ്ചകളിലും കല, സംസ്‌കാരം, കായികം, ധ്യാനം, ആത്മീയത, സേവനം എന്നിവയുമായി ബന്ധപ്പെട്ട പ്രവർത്തനങ്ങൾ സംഘടിപ്പിക്കും. ലഹരിവിരുദ്ധ സന്ദേശം പുതിയ ആളുകളിലേക്ക് എത്തും. വരുന്ന 100 ഞായറാഴ്ചകൾ ലഹരിമുക്ത ഇന്ത്യയിലേക്കുള്ള 100 ശക്തമായ ചുവടുവെപ്പുകളായിരിക്കും.' അദ്ദേഹം കൂട്ടിച്ചേർത്തു.

'ലഹരി ഉപയോഗം ശരീരത്തിന് ഹാനികരമാകുമെന്ന് മാത്രമല്ല, അത് ഒരു അമ്മയുടെ പുഞ്ചിരി കവർന്നെടുക്കുന്നു, അച്ഛന്റെ സ്വപ്നങ്ങൾ തകർക്കുന്നു, സഹോദരിയുടെ പ്രതീക്ഷകൾ ഇല്ലാതാക്കുന്നു, അനുജന്റെ ബഹുമാനം ഇല്ലാതാക്കുന്നു. തങ്ങളുടെ കുട്ടികൾ കൺമുന്നിൽ ക്രമേണ നശിക്കുന്നത് കണ്ട് കുടുംബാംഗങ്ങൾ ഓരോ ദിവസവും ഈ വേദനയോടെയാണ് കഴിയുന്നത്.' ലഹരിക്കെതിരായ ഈ പോരാട്ടത്തിൽ സർക്കാർ യുവാക്കൾക്കൊപ്പം ഉറച്ചുനിൽക്കുന്നുവെന്നും മോദി വ്യക്തമാക്കി.

'രാജ്യത്തുടനീളമുള്ള ലഹരി കടത്തുകാർക്കെതിരെ കർശന നടപടി സ്വീകരിക്കുന്നുണ്ട്. അറസ്റ്റുകൾ മുമ്പത്തേതിനേക്കാൾ പലമടങ്ങ് വർധിച്ചു, ആയിരക്കണക്കിന് കോടി രൂപയുടെ മയക്കുമരുന്ന് പിടിച്ചെടുത്തു. ലഹരിക്കെതിരെ നമ്മുടെ സർക്കാർ എത്രമാത്രം ശക്തമായാണ് പ്രവർത്തിക്കുന്നത് എന്നാണ് ഇത് കാണിക്കുന്നത്.' പ്രധാനമന്ത്രി പറഞ്ഞു.

സാമൂഹികമായ അന്തസ്സിനെ ഭയന്ന് മക്കളുടെ ലഹരി ഉപയോഗം ഒളിച്ചുവെക്കരുതെന്നും, പകരം അവരോട് തുറന്ന് സംസാരിക്കാനും ലഹരിമുക്തിക്കായി വിദഗ്ധ സഹായവും ചികിത്സയും തേടാനും അദ്ദേഹം കുടുംബങ്ങളോട് അഭ്യർത്ഥിച്ചു.

യുവാക്കളെ ലഹരിവസ്തുക്കളിൽ നിന്ന് അകറ്റി നിർത്താൻ പ്രചോദിപ്പിക്കാനും അവരുടെ ഇടയിൽ നല്ല മാറ്റങ്ങൾ കൊണ്ടുവരുന്ന അംബാസഡർമാരായി അവരെ മാറ്റാനുമാണ് 'വികസിത് ഭാരത് സങ്കൽപ് അഭിയാന് വേണ്ടിയുള്ള നഷാ മുക്ത് യുവ' കാമ്പയിൻ ലക്ഷ്യമിടുന്നത്.

ലഹരിമുക്തമായ ഒരു സമൂഹം കെട്ടിപ്പടുക്കുന്നതിൽ അവബോധം വളർത്തുന്നതിനും ജനപങ്കാളിത്തം പ്രോത്സാഹിപ്പിക്കുന്നതിനുമായി രാജ്യത്തുടനീളം എല്ലാ ഞായറാഴ്ചകളിലും പ്രവർത്തനങ്ങൾ സംഘടിപ്പിക്കുന്ന 100 ആഴ്ച നീണ്ടുനിൽക്കുന്ന രാജ്യവ്യാപകമായ 'ജനഭാഗിദാരി' കാമ്പയിന്റെ തുടക്കമാണ് പ്രധാനമന്ത്രി ഇന്ന് നിർവഹിച്ചത്.