രാജ്കോട്ട്: ഗുജറാത്തിലെ രാജ്കോട്ടില് ടി.പി.ആര്. ഗെയിമിങ് സോണിലുണ്ടായ തീപ്പിടിത്തത്തില് ഒന്പത് കുട്ടികളടക്കം 27 പേര് മരിച്ചു. ഒട്ടേറെപ്പേര്ക്ക് പരിക്കേറ്റു. നാനാ-മാവാ റോഡിലെ ഗെയിമിങ് സോണില് ശനിയാഴ്ച വൈകീട്ട് നാലരയോടെയാണ് അപകടമുണ്ടായത്. ഗെയിമിങ്ങിനായി നിര്മിച്ച ഫൈബര് കൂടാരം പൂര്ണമായി കത്തിയമരുകയായിരുന്നു. മരണസംഖ്യ ഇനിയും ഉയരാന് സാധ്യതയുണ്ട്.
സംഭവത്തില് ഗെയിമിങ് സോണ് ഉടമ യുവരാജ് സിങ് സോളങ്കി, മാനേജര് നിതിന് ജെയ്ന് എന്നിവരുള്പ്പെടെ മൂന്നു പേരെ പോലീസ് അറസ്റ്റ് ചെയ്തു.
അവധിയാഘോഷിക്കാന് ഒട്ടേറെപ്പേരാണ് കുട്ടികള്ക്കൊപ്പം ഇവിടെയെത്തിയിരുന്നത്. പ്രദേശത്ത് രക്ഷാപ്രവര്ത്തനം തുടരുകയാണ്. തീപ്പിടിത്തത്തിന്റെ കാരണം വ്യക്തമല്ല. മൃതദേഹങ്ങള് തിരിച്ചറിയാനാകാത്തവിധം കത്തിക്കരിഞ്ഞതിനാല് ഡി.എന്.എ. പരിശോധന വേണ്ടിവന്നേക്കുമെന്ന് രാജ്കോട്ട് പോലീസ് കമ്മിഷണര് രാജു ഭാര്ഗവ പറഞ്ഞു.
തീപിടിത്തത്തിനുള്ള കാരണം എന്താണ് എന്നത് സംബന്ധിച്ച് വ്യക്തതയില്ല. ഗുജറാത്ത് മുഖ്യമന്ത്രി ഭൂപേന്ദ്ര പട്ടേല് സ്ഥിതിഗതികള് വിലയിരുത്തി. പ്രദേശത്ത് ശക്തമായ കാറ്റ് തുടരുന്നതിനാല് തീ അണക്കുന്നത് പ്രതിസന്ധിസൃഷ്ടിച്ചതായി ഉദ്യോഗസ്ഥരെ ഉദ്ധരിച്ച് ഇന്ത്യ ടുഡേ റിപ്പോര്ട്ട് ചെയ്യുന്നു.
എത്രയും പെട്ടെന്ന് രക്ഷാപ്രവര്ത്തനത്തിന് ആവശ്യമായത് ചെയ്യണമെന്ന് മുനിസിപ്പല് കോര്പ്പറേഷനും അധികൃതര്ക്കും നിര്ദേശം നല്കിയതായി ഭൂപേന്ദ്ര പട്ടേല് അറിയിച്ചു.
സംഭവം അന്വേഷിക്കാനായി പ്രത്യേക അന്വേഷണത്തെ രൂപീകരിച്ചിട്ടുണ്ടെന്ന് ഭൂപേന്ദ്ര പട്ടേല് പറഞ്ഞു. മരിച്ചവരുടെ കുടുംബാംഗങ്ങള്ക്ക് നാല് ലക്ഷം രൂപയും പരിക്കേറ്റവര്ക്ക് 50000 രൂപയും സംസ്ഥാന സര്ക്കാര് പ്രഖ്യാപിച്ചിട്ടുണ്ട്.
Content Highlights: massive fire breaks out at gaming zone in Gujarat Rajkot
Published: 25 May 2024, 08:37 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented