ഭോപ്പാൽ: വരവിൽ കവിഞ്ഞ സ്വത്ത് സമ്പാദനക്കേസുമായി ബന്ധപ്പെട്ട് വനംവകുപ്പ് ഉദ്യോഗസ്ഥന്റെ വസതിയിൽ നടത്തിയ പരിശോധനയിൽ, മധ്യപ്രദേശ് ലോകായുക്ത പിടിച്ചെടുത്തത് 7.6 കോടിരൂപയുടെ വസ്തുവകകൾ. 2.5 കിലോഗ്രാം സ്വർണം(മതിപ്പുവില 3.5 കോടിരൂപ), 1.6 കിലോഗ്രാം വെള്ളി (2.9 ലക്ഷംരൂപ), 26.36 ലക്ഷം രൂപ തുടങ്ങിയവയാണ് പിടിച്ചെടുത്തത്. സാത്പുര ടൈഗർ റിസർവ് അസിസ്റ്റന്റ് ഡയറക്ടറായ സഞ്ജീവ് കുമാർ ശർമയുടെ വസതിയിലും ഇയാളുമായി  ബന്ധപ്പെട്ട മറ്റിടങ്ങളിലുമാണ് ലോകായുക്ത പരിശോധന നടത്തിയത്.

To advertise here,

നിയമാനുസൃതമായ സ്രോതസ്സുകളിൽനിന്ന് ലഭിക്കുന്നതിനേക്കാൾ, 228 ശതമാനം അധികം സ്വത്ത് സഞ്ജീവ് കുമാർ സമ്പാദിച്ചതായി കണ്ടെത്തിയെന്നാണ് പ്രാഥമിക വിലയിരുത്തൽ.

ഭാര്യയുടെയും മറ്റ് സ്വകാര്യ വ്യക്തികളുടെയും പേരുകളിൽ ഇയാൾ ചില സ്വത്തുക്കൾ സമ്പാദിച്ചിട്ടുണ്ടെന്നും സൂചനയുണ്ട്. രണ്ടുകോടിരൂപ വിലമതിക്കുന്ന റിസോർട്ട്, ഒരു കോടി രൂപ വില മതിക്കുന്ന വീട് എന്നിവയുമായും കുമാറിന് ബന്ധമുണ്ടെന്നാണ് സൂചന. സ്‌കോർപിയോ, മഹിന്ദ്ര കെയുവി, റോയൽ എൻഫീൽഡ്, സ്‌കൂട്ടർ എന്നീ വാഹനങ്ങളും പിടിച്ചെടുത്തിട്ടുണ്ട്.