ന്യൂഡൽഹി: പാർലമെന്റിന്റെ വർഷകാല സമ്മേളനത്തിലെ പ്രതിപക്ഷബഹളത്തെ രൂക്ഷമായി വിമർശിച്ച് ബിജെപി എംപിയും നടിയുമായ കങ്കണ റണാവത്ത്. സഭയിലെ ബഹളങ്ങൾ ജനാധിപത്യപരമല്ലെന്നും തിരഞ്ഞെടുക്കപ്പെട്ട ഒരു സർക്കാരിനെ സമ്മർദ്ദത്തിലാക്കാൻ ആർക്കും അവകാശമില്ലെന്നും കങ്കണ വ്യക്തമാക്കി. ചർച്ചകൾക്കും ഉത്തരവാദിത്വങ്ങൾക്കും വേണ്ടിയുള്ള വേദിയാകണം പാർലമെന്റ് എന്നും അവർ ഓർമ്മിപ്പിച്ചു.

To advertise here,

തിരഞ്ഞെടുക്കപ്പെട്ട ഒരു സർക്കാരിന് അതിന്റെ പ്രവർത്തനം തീരുമാനിക്കാനുള്ള പരമാധികാരമുണ്ട്. മുഷ്ടിചുരുട്ടി ഭീഷണിപ്പെടുത്തിക്കൊണ്ട് സർക്കാരിനെക്കൊണ്ട് തീരുമാനങ്ങൾ എടുപ്പിക്കാൻ കഴിയില്ല. ആരെ പുറത്താക്കണം ആരെ നിലനിർത്തണം എന്ന് തീരുമാനിക്കാൻ സർക്കാരിനെ സമ്മർദ്ദത്തിലാക്കുന്നത് നല്ല പ്രവണതയല്ല.

പ്രതിപക്ഷത്തിന്റെ ബഹളം സഭയുടെ അന്തസ്സത്തിന് നിരക്കാത്തതാണ്. പാർലമെന്റ് സമ്മേളനത്തിന്റെ പ്രാഥമിക ലക്ഷ്യം അർത്ഥവത്തായ ചർച്ചകളും ഉത്തരവാദിത്വം ഉറപ്പാക്കലുമാണ്, അല്ലാതെ അരാജകത്വം സൃഷ്ടിക്കലല്ല. എല്ലാ വിഷയങ്ങളും വിശദമായി ചർച്ചചെയ്യാനും സർക്കാരിനെക്കൊണ്ട് മറുപടി പറയിപ്പിക്കാനുമാണ് സഭ കൂടുന്നത്, എന്നാൽ, പ്രതിഷേധത്തിലൂടെ ബഹളമുണ്ടാക്കുന്നത് ശരിയല്ല.

സർക്കാരിന്റെ ആഭ്യന്തര തീരുമാനങ്ങളിൽ നിർദ്ദേശങ്ങൾ നൽകാൻ ആഗ്രഹിക്കുന്നവർ ആദ്യം ജനവിധി തേടണമെന്നും അവർ പരിഹസിച്ചു. ജനങ്ങൾ തിരഞ്ഞെടുത്ത സർക്കാരിന് ഭരണം എങ്ങനെ വേണമെന്ന് തീരുമാനിക്കാൻ അവകാശമുണ്ടെന്നും അത്ര നിർബന്ധമാണെങ്കിൽ സ്വയം തിരഞ്ഞെടുപ്പിൽ മത്സരിക്കണമെന്നും അവർ പ്രതിപക്ഷത്തെ വെല്ലുവിളിച്ചു.

നീറ്റ് പരീക്ഷയിലെ ക്രമക്കേടുകളും രാമക്ഷേത്ര സംഭാവനാ വിവാദവും ഉന്നയിച്ച് പ്രതിപക്ഷം പ്രതിഷേധിച്ചതിനെ തുടർന്ന് സഭാനടപടികൾ തടസ്സപ്പെട്ടിരുന്നു. സർക്കാരിന്റെ പ്രവർത്തനങ്ങളിൽ ഇടപെടാൻ ആഗ്രഹിക്കുന്നവർ ജനവിധി തേടുകയാണ് വേണ്ടതെന്ന് അവർ പ്രതിപക്ഷത്തോട് ആവശ്യപ്പെട്ടു. സഭ സുഗമമായി നടത്താൻ സ്പീക്കർ ശ്രമിച്ചെങ്കിലും ബഹളംകാരണം ലോക്‌സഭ താൽക്കാലികമായി നിർത്തിവെക്കേണ്ടിവന്നിരുന്നു.