ന്യൂഡൽഹി: കേന്ദ്രസര്ക്കാര് ലോക്സഭയില് അവതരിപ്പിച്ച വഖഫ് ബില്ലിനു സംയുക്ത പാർലമെന്ററി സമിതിയുടെ (ജെപിസി) അംഗീകാരം. കഴിഞ്ഞ വര്ഷം ഓഗസ്റ്റില് പാര്ലമെന്റില് അവതരിപ്പിച്ച കരട് രേഖയില് 14 ഭേദഗതികൾ വരുത്തിയാണ് ബില്ലിന് ജെപിസി അംഗീകാരം നല്കിയത്. അമുസ്ലിങ്ങളായ രണ്ടുപേർ ഭരണസമിതിയിൽ ഉണ്ടാകുമെന്നതുൾപ്പടെയുള്ളവ അംഗീകാരം നൽകിയവയിൽ ഉൾപ്പെടും.
പ്രതിപക്ഷം നിർദേശിച്ച 44 ഭേദഗതികളെല്ലാം വോട്ടിനിട്ട് തള്ളുകയും ചെയ്തു. 10 എംപിമാർ പ്രതിപക്ഷ ഭേദഗതികളെ പിന്തുണച്ചപ്പോൾ 16 പേർ എതിർത്തു. ഭരണപക്ഷത്തിന്റെ നിർദേശങ്ങൾ കൂടി ഉൾപ്പെടുത്തിയാവും റിപ്പോർട്ട് സമർപ്പിക്കുക. ഫെബ്രുവരി 13 നകം റിപ്പോർട്ട് സമർപ്പിക്കാനായിരുന്നു ജെപിസിക്ക് സമയം അനുവദിച്ചിരുന്നത്.
രാജ്യത്തെ മുസ്ലീം ചാരിറ്റബിള് സ്വത്തുക്കള് കൈകാര്യം ചെയ്യുന്ന രീതിയില് ആകെ 44 ഭേദഗതികളാണ് ബില്ലില് നിര്ദേശിക്കുന്നത്.കഴിഞ്ഞവർഷം ഓഗസ്റ്റ് എട്ടിനാണ് കേന്ദ്ര ന്യൂനപക്ഷകാര്യ മന്ത്രി കിരണ് റിജിജു വഖഫ് ഭേദഗതി ബില് പാര്ലമെന്റില് അവതരിപ്പിച്ചത്. പ്രതിപക്ഷസഖ്യത്തിന്റെ ശക്തമായ പ്രതിഷേധത്തെ തുടര്ന്ന് വിശദമായ ചര്ച്ചകള്ക്ക് ബില് ജോയിന്റ് പാര്ലമെന്ററി സമിതിക്ക് വിടുകയായിരുന്നു. അതേസമയം, ജെ.പി. സി. യോഗത്തിൽ ബഹളം ഉണ്ടാക്കിയെന്നാരോപിച്ച് കഴിഞ്ഞ ദിവസം 10 പ്രതിപക്ഷ എം.പി.മാരെ സസ്പെൻഡ് ചെയ്തിരുന്നു.
ബില്ലില് കേന്ദ്ര സര്ക്കാര് വരുത്തുന്ന പ്രധാന ഭേദഗതികള്
- ഒരു വസ്തുവിനെ വഖഫ് സ്വത്താണെന്ന് പ്രഖ്യാപിക്കാന് വഖഫ് ബോര്ഡിന് അധികാരംനല്കുന്ന നിയമത്തിലെ 40-ാം വകുപ്പ് ഒഴിവാക്കി
- അഞ്ചുവര്ഷമെങ്കിലും ഇസ്ലാം വിശ്വാസിയായിരിക്കുന്ന വ്യക്തി നല്കുന്നതേ ഇനി വഖഫ് സ്വത്താകൂ. നിലവില് മുസ്ലിം ഇതരര്ക്കും വഖഫ് നല്കാം
- രേഖാമൂലമുള്ള കരാര് (ഡീഡ്) വഴി മാത്രമേ വഖഫ് ഉണ്ടാക്കാനാകൂ. നിലവില് ഡീഡ് വഴിയോ വാക്കാലോ ദീര്ഘകാലമായുള്ള ഉപയോഗത്തിലൂടെയോ വഖഫ് ആകുമായിരുന്നു
- വഖഫ് സ്വത്താണോ എന്ന് പരിശോധിക്കാനുള്ള അധികാരം സര്വേ കമ്മിഷണറില്നിന്ന് ജില്ലാ കളക്ടറിലേക്ക് മാറ്റി
- വഖഫ് ബോര്ഡിന്റെയും ട്രിബ്യൂണലിന്റെയും തീരുമാനങ്ങള് ഹൈക്കോടതിയില് ചോദ്യംചെയ്യാം
- കേന്ദ്ര വഖഫ് കൗണ്സിലിലും സംസ്ഥാന വഖഫ് ബോര്ഡുകളിലും മുസ്ലിം ഇതര വിഭാഗക്കാരെയും മുസ്ലിം വനിതകളെയും ഉള്പ്പെടുത്തും
- വഖഫ് നിയമത്തിന്റെ പേര് ഏകീകൃത വഖഫ് മാനേജ്മെന്റ്, ശാക്തീകരണ, കാര്യക്ഷമതാ, വികസന നിയമം എന്നാകും
- മക്കളുടെപേരില് സ്വത്തുക്കള് വഖഫാക്കുമ്പോള് (വഖഫ്-അലല്-ഔലാദ്) സ്ത്രീകള് ഉള്പ്പെടെ ആരുടെയും പിന്തുടര്ച്ചാവകാശം ഇല്ലാതാവില്ല
- സര്ക്കാര് വസ്തുവകകള് ഇനി വഖഫ് സ്വത്താവില്ല
- ബോറ, അഘാഖനി വിഭാഗങ്ങള്ക്ക് പ്രത്യേക വഖഫ് ബോര്ഡുകള്
- ബോര്ഡിന്റെ സി.ഇ.ഒ. മുസ്ലിം ആയിരിക്കണമെന്ന വ്യവസ്ഥ ഒഴിവാക്കി
- വഖഫ് രജിസ്ട്രേഷന് പോര്ട്ടല് വഴി, മുഴുവന് വിവരങ്ങളും പോര്ട്ടലില് ഫയല് ചെയ്യണം
Content Highlights: JPC approves Waqf Bill
Published: 27 Jan 2025, 07:04 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented