ന്യൂഡൽഹി: ജന്തർ മന്തറിലെ നിരോധിക്കപ്പെട്ട പ്രതിഷേധ സ്ഥലത്തേക്ക് അതിക്രമിച്ചു കയറിയെന്ന കേസിൽ സി.ജെ.പി. വക്താക്കളായ സൗരവ് ദാസ്, ആശുതോഷ് റങ്ക എന്നിവരുടെ ജുഡീഷ്യൽ കസ്റ്റഡി കോടതി രണ്ടു ദിവസത്തേക്കുകൂടി നീട്ടി. മന്ദിർ മാർഗ് പൊലീസ് സ്റ്റേഷനിലെ സ്‌പെഷ്യൽ എക്‌സിക്യൂട്ടീവ് മജിസ്‌ട്രേറ്റാണ് (എസ്.ഇ.എം.) ദാസിന്റെയും റങ്കയുടെയും ജുഡീഷ്യൽ കസ്റ്റഡി നീട്ടിയത്. ഒക്ടോബർ 11-ന് ഒപ്പിട്ട ബോണ്ടിലെ വ്യവസ്ഥകൾ ഇരുവരും മനഃപൂർവം ലംഘിച്ചതായി ഉത്തരവിൽ പറയുന്നു. നിയമത്തോട് ബഹുമാനമില്ലാത്ത സമീപനമാണ് ഇരുവരും സ്വീകരിക്കുന്നത്. പ്രതിഷേധത്തിന് അനുമതിയില്ലാത്ത സ്ഥലങ്ങളിൽ സമരങ്ങൾ സംഘടിപ്പിക്കുന്നതിൽ ഇവർ ആവർത്തിച്ചുള്ള പ്രവണത കാണിക്കുന്നുണ്ടെന്നും ഉത്തരവിൽ ചൂണ്ടിക്കാട്ടി.

To advertise here,

കോടതിയിൽനിന്ന് പുറത്തുവരുന്നതിനിടെ, രാജ്യത്ത് അടിയന്തരാവസ്ഥയ്ക്ക് സമാനമായ സാഹചര്യമാണുള്ളതെന്നും നീതി ലഭിക്കുന്നില്ലെന്നും സൗരവ് ദാസ് ആരോപിച്ചു. ജാമ്യത്തിനായി സമർപ്പിച്ച ആൾജാമ്യങ്ങൾ നിരസിക്കാൻ കോടതി സ്വീകരിച്ച കാരണങ്ങളെയും അദ്ദേഹം ചോദ്യം ചെയ്തു. 'നമ്മൾ അടിയന്തരാവസ്ഥയിലാണ്. ഇവിടെ നീതിയില്ല. ഇത് ഒരു പോലീസ് കോടതിയാണ്. ഇവിടെ എന്താണ് നടക്കുന്നതെന്ന് നോക്കൂ. അവർ സ്വീകരിച്ചിരിക്കുന്ന കാരണം എന്താണെന്ന് മാത്രം പരിശോധിച്ചാൽ മതി.' പൊലീസ് വാഹനത്തിലിരുന്ന് ദാസ് ഒരു യുറ്റിയൂബ് ചാനലിനോട് പ്രതികരിച്ചു.

ജന്തർ മന്തറിൽ അതിക്രമിച്ചു കയറിയെന്നാരോപിച്ച് ഒക്ടോബർ 13-നാണ് സൗരവ് ദാസ്, ആശുതോഷ് റങ്ക, അജിൻക്യ ഷിൻഡെ എന്നിവരെ കസ്റ്റഡിയിലെടുത്തത്. പ്രതിഷേധ സ്ഥലമെന്ന പദവി എടുത്തുകളഞ്ഞ ജന്തർ മന്തറിൽ പ്രവേശിക്കുന്നതിനായി പൂട്ടിയിട്ടിരുന്ന ഗേറ്റുകൾ ചാടിക്കടക്കുന്ന മൂവരുടെയും ദൃശ്യങ്ങൾ അന്ന് സി.ജെ.പി. പങ്കുവെച്ചിരുന്നു. അജിൻക്യ ഷിൻഡെയെ സ്വന്തം ജാമ്യത്തിലും 5,000 രൂപയുടെ ആൾജാമ്യത്തിലും പിന്നീട് വിട്ടയച്ചു.