ന്യൂഡൽഹി: മതത്തിന്റെ അടിസ്ഥാനത്തിൽ പൗരത്വം അനുവദിക്കുന്നത് തടയണമെന്ന് ആവശ്യപ്പെട്ട് മുസ്ലിം ലീ​ഗും ഡി.വൈ.എഫ്.ഐയും സുപ്രീംകോടതിയെ സമീപിച്ചു. മറ്റ് മതത്തിൽ പെട്ടവർക്ക് അപേക്ഷ നൽകാൻ അനുമതി നൽകുകയാണെങ്കിൽ മുസ്ലീങ്ങൾക്കും ഓൺലൈനായി അപേക്ഷ സമർപ്പിക്കാൽ അനുവദിക്കണമെന്ന് ലീ​ഗ് ആവശ്യപ്പെട്ടു. അതേസമയം, സ്റ്റേ ആവശ്യം അടിയന്തിരമായി പരി​ഗണിക്കണമെന്നാണ് ഡി.വൈ.എഫ്.ഐയുടെ ആവശ്യം. 

To advertise here,

ആർക്കെങ്കിലും പൗരത്വം നൽകുന്നതിന് ലീ​ഗ് എതിരല്ല. ഒരു മതത്തിനെ മാത്രം മാറ്റി നിർത്തുന്നതിനെയാണ് എതിർക്കുന്നത്. ആവശ്യം അടിയന്തിരമായി പരിഗണിക്കണമെന്ന് ആവശ്യപ്പെട്ടുകൊണ്ട് ലീഗ് സുപ്രീം കോടതി രജിസ്ട്രാർക്ക് കത്ത് നൽകി. പൗരത്വനിയമ ഭേദഗതി ചോദ്യം ചെയ്തുള്ള 250-ഓളം ഹ‍ർജികൾ സുപ്രീംകോടതിയുടെ പരി​ഗണനയിലുണ്ട്. ഈ ഹർജികളിൽ തീരുമാനമാകുന്നതിന് മുമ്പ് നിയമ ഭേദ​ഗതിയുടെ അടിസ്ഥാനത്തിൽ പൗരത്വം നൽകാൻ അനുവദിക്കരുത്. സി.എ.എ ഭരണഘടനാവിരുദ്ധമാണെന്ന് കോടതി വിധിച്ചാൽ അനുവദിക്കുന്ന പൗരത്വം എന്തുചെയ്യുമെന്നും ലീ​ഗ് കോടതിയിൽ സമർപ്പിച്ച ഹർജിയിൽ ചോദിക്കുന്നുണ്ട്.  

മുസ്ലിം ലീ​ഗ് നേതാവ് പി.കെ കുഞ്ഞാലിക്കുട്ടിക്ക് വേണ്ടി അഭിഭാഷകൻ ഹാരിസ് ബീരാനാണ് അപേക്ഷ സമർപ്പിച്ചിരിക്കുന്നത്. ഡി.വൈ.എഫ്.ഐയ്ക്കുവേണ്ടി അഭിഭാഷകൻ കെ.ആർ സുഭാഷ് ചന്ദ്രനാണ് സുപ്രീംകോടതി രജിസ്ട്രാർക്ക് കത്ത് നൽകി.