സത്യേന്ദര്‍ ജെയിനെ സെല്ലിലെത്തി കണ്ട് തിഹാര്‍ ജയില്‍ സൂപ്രണ്ട്; പുതിയ വീഡിയോ പുറത്തുവിട്ട് ബി.ജെ.പി.

ന്യൂഡല്‍ഹി: കള്ളപ്പണക്കേസില്‍ തിഹാര്‍ ജയിലില്‍ കഴിയുന്ന ഡല്‍ഹി മന്ത്രി സത്യേന്ദര്‍ ജെയിനെ പ്രതിരോധത്തിലാക്കി ബി.ജെ.പി. പുതിയ വീഡിയോ പുറത്തുവിട്ടു.

ജയില്‍ സൂപ്രണ്ട് അജിത് കുമാര്‍, ജെയിനെ സെല്ലിലെത്തി കാണുന്നതാണ് വീഡിയോയിലുള്ളത്. തടവുകാരെ സന്ദര്‍ശിക്കാനുള്ള സമയപരിധി കഴിഞ്ഞായിരുന്നു സൂപ്രണ്ട് ജെയിന്റെ സെല്ലിലെത്തിയതെന്ന് ബി.ജെ.പി. ആരോപിച്ചു.

ബി.ജെ.പി. നേതാവ് ഷെഹ്‌സാദ് ജയ് ഹിന്ദ് സൂപ്രണ്ട്-ജെയിന്‍ കൂടിക്കാഴ്ചയുടെ ദൃശ്യങ്ങള്‍ ട്വിറ്ററില്‍ പങ്കുവെച്ചിട്ടുണ്ട്. ജയില്‍ സൂപ്രണ്ട് ജെയിന്റെ സെല്ലില്‍ എത്തുമ്പോള്‍ മൂന്നുപേര്‍ അതിനുള്ളിലുള്ളത് കാണാം. സൂപ്രണ്ട് വന്നതിന് പിന്നാലെ ഇവരെല്ലാം പുറത്തുപോകുന്നുമുണ്ട്.

ശേഷം അവിടുള്ള കസേരയില്‍ സൂപ്രണ്ട് ഇരുന്ന് ജെയിനോടു സംസാരിക്കുന്നതും ദൃശ്യങ്ങളില്‍ കാണാം. സെപ്റ്റംബര്‍ മാസത്തിലേതാണ് ദൃശ്യങ്ങള്‍. ജെയിന് വി.ഐ.പി. പരിഗണന ലഭ്യമാകുന്നെന്ന ആരോപണത്തിന്റെ പശ്ചാത്തലത്തില്‍ അജിത് കുമാറിനെ സ്ഥാനത്തുനിന്ന് സസ്‌പെന്‍ഡ് ചെയ്തിരുന്നു.