മമ്മൂട്ടിക്കൊപ്പമുള്ള കാർ യാത്രയുടെ ഓർമ പങ്കുവെച്ച് നടൻ വി.കെ. ശ്രീരാമൻ. ഊട്ടിയിൽ സിനിമാ ഷൂട്ടിങ് സമയത്ത് മമ്മൂട്ടി ഓടിച്ച കാർ സ്‌കൂൾ കുട്ടിയെ ഇടിച്ച സംഭവമാണ് വി.കെ. ശ്രീരാമൻ പങ്കുവെച്ചത്. കുട്ടി പരിക്കേൽക്കാതെ രക്ഷപ്പെട്ടതും സംഭവത്തോട് നാട്ടുകാരുടെ പ്രതികരണവും ശ്രീരാമൻ പങ്കുവെച്ചു.
വി.കെ. ശ്രീരാമന്റെ കുറിപ്പിന്റെ പൂർണരൂപം:
ഏതാണ്ടൊരു നാൽപ്പതു കൊല്ലം മുമ്പ് നടന്ന കഥ, അല്ല സംഭവമാണ്. പവിത്രന്റെ ഉത്തരം സിനിമ ഊട്ടിയിൽ നടക്കുന്ന കാലത്ത് മമ്മൂട്ടി തന്റെ വിഖ്യാതമായ 369-ാം നമ്പർ കോണ്ടസ്സയോടിച്ചു മലയിറങ്ങുകയായിരുന്നു. ഒരു കോൺവെന്റ് സ്‌കൂളിന്റെ മുന്നിൽ വെച്ച് റോഡു മുറിച്ച് ബസ്സിൽ കയറാനോടിയ പത്തു വയസ്സുകാരനെ കോണ്ടസ ഇടിച്ചു തെറിപ്പിക്കുന്നു. പെട്ടെന്ന് ബ്രേക്ക് ചെയ്തപ്പോൾ മുൻ സീറ്റിലിരുന്ന എന്റെ തല ഗ്ലാസിൽ ചെന്നിടിക്കുന്നു.
മമ്മൂട്ടി ചാടിയിറങ്ങുന്നു. പിന്നാലെ നെറ്റി തടവി ഞാനും. തമിഴ് ശിങ്കങ്ങൾ അക്രമാസക്തരായി കാറു തല്ലിപ്പൊളിക്കുമെന്നും ഞങ്ങളെ കൈകാര്യം ചെയ്യുമെന്നുമൊക്കെ ആണ് ഞാൻ കണക്കുകൂട്ടിയത്. പക്ഷേ, കണ്ടത് മറ്റൊന്നാണ്. കാറിടിച്ച് റോഡരികിലെ കാനയിലേക്ക് തെറിച്ച കുട്ടിയെ പൊക്കിപ്പിടിച്ച് ഒരാൾ മുന്നിലും കൂട്ടം പിന്നിലുമായി വരുന്നു. ഇടികൊണ്ട് തെറിച്ച കുളന്തൈ ചിരിക്കുന്നു. കോട്ടും തലേക്കെട്ടും വീരപ്പൻ മീശയുമുള്ള തലൈവർ പറഞ്ഞതിന്റെ സാരം ഇതാണ്.
മൂപ്പരാണ് സ്‌കൂളിന്റെ സെക്യുരിറ്റി ചീഫ്. കാറിന്റെ ഇടി കൊണ്ടത് പയ്യന്റെ വലതുകാലിന്റെ തുടയിലാണ്. കൃത്യം ട്രൗസ്സേഴ്സിന്റെ പോക്കറ്റിൽ പയ്യൻ രണ്ടു ക്രിക്കറ്റ് ബോളുകൾ കുത്തി നിറച്ചു വെച്ചിരുന്ന സ്ഥലത്താണ് ഇടി. പയ്യൻ സ്മൂത്തായി കാനക്കു മേലെയുള്ള വള്ളിപ്പടർപ്പിലേക്കു വീഴുന്നു, സർക്കസ്സിലെ കളിക്കാർ നെറ്റിലേക്കു വീഴും പോലെ.
'പാർത്താൽ എന്നമോ പെരിയ ആക്‌സിഡന്റ് ആനാ, യാർക്കും ഒണ്ണും ആഹലെ. പടത്തിലെ സ്റ്റണ്ട് സീൻ മാതിരി. പെരിയവരേ നീങ്ക താൻ ഹീറോ കൊട് കൈ'.
മീശക്കാരൻ കൈ നീട്ടി. ഹീറോ ഹസ്തം ദാനം ചെയ്തു. 'നീ പേടിച്ചു പോയോ?'. തിരിച്ചു വണ്ടിയിൽ കയറിയശേഷം മമ്മൂട്ടി എന്നോടു ചോദിച്ചു.
'നിങ്ങളെ അവര് ഒഴിവാക്കിയിട്ട് എന്റെ നേരെ വന്ന് ഡായ് ഡ്രൈവർ സോമ്പേരി, നീ എത്ക്ക് പക്കത്തില് ഉക്കാരന്ത്ട്ട് ഇറ്ക്ക്. റോഡില് കുളന്തെകൾ ഇര്ക്ക് മെതുവാ വണ്ടി ഓട്ടണം എന്റ് സൊല്ലിക്കൊടുക്ക വേണ്ടിയതു താനേ എന്നും പറഞ്ഞ് എന്നെ കൈകാര്യം ചെയ്‌തേക്കുമോ എന്ന ഒരു പേടി ഉണ്ടാവാതിരുന്നില്ല'.
'ശരിയാ ഈ കോസ്റ്റ്യൂമിൽ നിനക്കൊരു ഡ്രൈവർ ലുക്ക് ഉണ്ട്.' കോയമ്പത്തൂരെത്തുംവരെ ഞാൻ തിരിഞ്ഞു നോക്കിക്കൊണ്ടിരുന്നു. അണ്ണാച്ചിമാർ ഇടി കൊണ്ട പയ്യനെയും കൂട്ടി ജാഥയായി വരുന്നുണ്ടോ എന്ന്.
Content Highlights: Actor V.K. Sreeraman shared a 40-year-old memory of a car accident involving Mammootty in Ooty during the shoot of the movie 'Uttaram'. Mammootty was driving his famous Contessa car when a 10-year-old schoolboy crossed the road and was hit. The boy miraculously escaped unhurt as the impact hit the cricket balls in his pocket, throwing him safely into bushes. Instead of becoming violent, the local crowd and school security head praised the incident like a movie stunt and shook hands with Mammootty. Sreeraman humorously recalled his initial fear that the locals would attack them or mistake him for Mammootty's driver.
Published: 04 Nov 2026, 12:17 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented