'ഒറ്റക്കൈകൊണ്ട് കെട്ടിപ്പിടിക്കാനേ നിവൃത്തിയുള്ളൂ', ദേശീയ പുരസ്കാരത്തിൽ സന്തോഷംപ്രകടിപ്പിച്ച് ഷാരൂഖ്

സിനിമാ ജീവിതത്തിൽ ആദ്യമായി മികച്ച നടനുള്ള ദേശീയ പുരസ്കാരം ലഭിച്ച സന്തോഷത്തിലാണ് ഷാരൂഖ് ഖാൻ. അറ്റ്ലി സംവിധാനംചെയ്ത ജവാൻ എന്ന ചിത്രത്തിലെ പ്രകടനമാണ് അദ്ദേഹത്തെ പുരസ്കാരത്തിനർഹനാക്കിയത്. പുരസ്കാരം നൽകി ആദരിച്ചതിന് ജൂറിക്കും കേന്ദ്രസർക്കാരിനും വാർത്താവിതരണ പ്രക്ഷേപണ മന്ത്രാലയത്തിനും നന്ദിയുണ്ടെന്ന് അദ്ദേഹം വീഡിയോ സന്ദേശത്തിൽ പറഞ്ഞു. ഈ സ്നേഹത്താൽ താൻ മതിമറന്നുപോയെന്നും ഷാരൂഖ് ഖാൻ പറഞ്ഞു. പരിക്കുപറ്റിയ കൈയുമായാണ് അദ്ദേഹം വീഡിയോ പങ്കുവെച്ചത്.

ദേശീയ പുരസ്കാരം ലഭിക്കുക എന്നത് ജീവിതകാലം മുഴുവൻ നെഞ്ചേറ്റുന്ന ഒരു നിമിഷമാണെന്ന് ഷാരൂഖ് ഖാൻ പറഞ്ഞു. ജൂറിക്കും, ചെയർമാനും, വാർത്താവിതരണ പ്രക്ഷേപണ മന്ത്രാലയത്തിനും, ഈ ബഹുമതിക്ക് താൻ അർഹനാണെന്ന് കരുതിയ എല്ലാവർക്കും ഹൃദയം നിറഞ്ഞ നന്ദി അറിയിക്കുന്നു. 2023-ലെ തൻ്റെ എല്ലാ സംവിധായകരോടും എഴുത്തുകാരോടും നന്ദി പറയുന്നു. പ്രത്യേകിച്ച് രാജു സാറിനും, സിദ്ധിനും, അറ്റ്ലീ സാറിനും അദ്ദേഹത്തിൻ്റെ ടീമിനോടും. ജവാൻ' എന്ന അറ്റ്ലീയുടെ സിനിമയിൽ തനിക്ക് അവസരം നൽകിയതിനും, ഈ അവാർഡിന് അർഹനാകുമെന്ന് വിശ്വസിച്ചതിനും നന്ദി. അറ്റ്‌ലീ സർ, നിങ്ങൾ പറയുന്നതുപോലെ, ഇത് 'മാസ്' ആണ്. തനിക്കൊപ്പം അക്ഷീണം പ്രവർത്തിക്കുന്ന ടീമിനും മാനേജ്മെൻ്റിനും നന്ദി പറയുന്നു. അവർ തൻ്റെ വിചിത്ര സ്വഭാവങ്ങളും അക്ഷമയും സഹിക്കുകയും ചെയ്യുന്നുവെന്നും ഷാരൂഖ് പറഞ്ഞു.

"ദേശീയ അവാർഡ് എന്നത് ഒരു നേട്ടം മാത്രമല്ല. ഞാൻ ചെയ്യുന്നത് പ്രാധാന്യമുള്ളതാണെന്ന ഓർമ്മപ്പെടുത്തലാണ് അത്. മുന്നോട്ട് പോകാനും, കഠിനാധ്വാനം ചെയ്യാനും, പുതിയത് സൃഷ്ടിക്കാനും, സിനിമയെ സേവിക്കാനും അത് എന്നോട് പറയുന്നു. ബഹളങ്ങൾ നിറഞ്ഞ ഈ ലോകത്ത്, ആരെങ്കിലും നമ്മളെ കേൾക്കുന്നു എന്നത് ഒരു അനുഗ്രഹമാണ്. ഈ അംഗീകാരത്തെ ഒരു അവസാനമായിട്ടല്ല, മറിച്ച് തുടർച്ചയായി പ്രയത്നിക്കാനും പഠിക്കാനും തിരികെ നൽകാനുമുള്ള ഒരു ഇന്ധനമായി ഉപയോഗിക്കുമെന്ന് ഞാൻ വാഗ്ദാനം ചെയ്യുന്നു. ഈ അവാർഡ് എനിക്കൊരു ഓർമ്മപ്പെടുത്തലാണ്. അഭിനയം ഒരു ജോലി മാത്രമല്ല, ഉത്തരവാദിത്തമാണ്. സ്ക്രീനിൽ സത്യം കാണിക്കാനുള്ള ഉത്തരവാദിത്തം. നിങ്ങളുടെയെല്ലാം സ്നേഹത്തിന് ഞാൻ ഒരുപാട് കടപ്പെട്ടിരിക്കുന്നു, ഈ ബഹുമാനത്തിന് ഭാരത സർക്കാരിന് എൻ്റെ ഹൃദയം നിറഞ്ഞ നന്ദി. 

എൻ്റെ ആരാധകരോട്, നിങ്ങളുടെ എല്ലാ ആർപ്പുവിളികൾക്കും കണ്ണുനീരിനും നന്ദി, ഈ അവാർഡ് നിങ്ങൾക്കുള്ളതാണ്, നിങ്ങളെല്ലാവർക്കും. അതെ, നിങ്ങൾക്കായി എൻ്റെ കൈകൾ വിരിച്ച് സ്നേഹം പങ്കുവെക്കാൻ ഞാൻ ആഗ്രഹിക്കുന്നു. പക്ഷെ ഞാൻ സുഖമില്ലാതിരിക്കുകയാണ്. പക്ഷേ വിഷമിക്കേണ്ട. പോപ്പ്കോൺ തയ്യാറാക്കി വെക്കുക. ഞാൻ തിയേറ്ററുകളിലേക്കും ഉടൻ തന്നെ സ്ക്രീനിലേക്കും തിരിച്ചുവരും." ഷാരൂഖ് കൂട്ടിച്ചേർത്തു.

ഷാരൂഖ് ഖാന്റെ ഹോം പ്രൊഡക്ഷൻ കമ്പനിയായ റെഡ് ചില്ലീസ് എൻ്റർടെയ്ൻമെൻ്റാണ് 'ജവാൻ' നിർമ്മിച്ചത്. നയൻതാര, വിജയ് സേതുപതി, സാന്യ മൽഹോത്ര, സുനിൽ ഗ്രോവർ തുടങ്ങിയവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചു. രാജ്‌കുമാർ ഹിറാനിയുടെ 'ഡങ്കി' (2023) യിലാണ് ഖാൻ അവസാനമായി അഭിനയിച്ചത്. സിദ്ധാർത്ഥ് ആനന്ദിൻ്റെ 'കിംഗ്' ആണ് അദ്ദേഹത്തിൻ്റെ അടുത്ത ചിത്രം. മാർഫ്ലിക്സ് എൻ്റർടെയ്ൻമെൻ്റും റെഡ് ചില്ലീസ് എൻ്റർടെയ്ൻമെൻ്റും ചേർന്ന് നിർമ്മിക്കുന്ന ഈ ചിത്രത്തിൽ സുഹാന ഖാൻ (ഷാരൂഖ് ഖാന്റെ മകൾ), അഭയ് വർമ്മ, ജയ്ദീപ് അഹ്‌ലാവത്, അഭിഷേക് ബച്ചൻ, ജാക്കി ഷ്രോഫ് തുടങ്ങിയവരും പ്രധാന വേഷങ്ങളിൽ എത്തുന്നു. ചിത്രം 2026-ലെ ഗാന്ധി ജയന്തിക്ക് തിയേറ്ററുകളിൽ റിലീസ് ചെയ്യാനാണ് തീരുമാനിച്ചിരിക്കുന്നത്.