മലബാര്‍ ജീവിതത്തിന്റെ നേര്‍ക്കാഴ്ച; 'ഒരു വടക്കന്‍ സന്ദേശം' ഒരുങ്ങുന്നു

മലബാറിന്റെ സാംസ്‌കാരികവും സാമൂഹികവുമായ പശ്ചാത്തലത്തില്‍ ഒരു നാടിന്റെ ജീവിതവും ചെറുപ്പക്കാരുടെ ആഗ്രഹങ്ങളും പ്രണയവും സമന്വയിപ്പിച്ച് പുതിയൊരു മലയാള സിനിമ എത്തുന്നു - 'ഒരു വടക്കന്‍ സന്ദേശം'. സാരഥി പ്രൊഡക്ഷന്‍സിന്റെ ബാനറില്‍ അജയന്‍ ചോയങ്കോട് സംവിധാനം ചെയ്യുന്ന ഈ ചിത്രത്തിന്റെ രചന സത്യചന്ദ്രന്‍ പൊയില്‍ക്കാവ് ആണ്. കണ്ണൂര്‍ മേഖലയിലെ കലാകാരന്മാര്‍ക്ക് പ്രാധാന്യം നല്‍കി തയ്യാറാക്കുന്ന ഈ സിനിമയില്‍ പ്രമുഖ അഭിനേതാക്കളുടെ സാന്നിധ്യവും ശ്രദ്ധേയമാണ്.

'ഒരു വടക്കന്‍ സന്ദേശം' മലബാറിന്റെ ജീവിത സംസ്‌കാരം, ആനുഷ്ടാനങ്ങള്‍, കലാപ്രവര്‍ത്തനങ്ങള്‍, രാഷ്ട്രീയ-സാമൂഹിക കാഴ്ചപ്പാടുകള്‍ എന്നിവയെല്ലാം പ്രതിഫലിപ്പിക്കുന്ന ഒരു ചിത്രമാണ്. കണ്ണാടിപ്പൊയില്‍ എന്ന ഗ്രാമത്തില്‍ നടക്കുന്ന കഥ, നാടിന്റെ നന്മയ്ക്കായി പ്രവര്‍ത്തിക്കുന്ന ഒരു കൂട്ടം ചെറുപ്പക്കാരെയും സാമൂഹ്യപ്രവര്‍ത്തകയും അങ്കണവാടി അധ്യാപികയുമായ ജ്യോതി ലക്ഷ്മിയെയും ചുറ്റിപ്പറ്റിയാണ് വികസിക്കുന്നത്. 

മലബാര്‍ മേഖലയിലെ പ്രശസ്ത മോണോ ആക്ട് കലാകാരന്‍ റസല്‍ ഹാരിസാണ് ചിത്രത്തിലെ കേന്ദ്ര കഥാപാത്രത്തെ അവതരിപ്പിക്കുന്നത്. സുരഭി, അനില്‍ വടക്കുമ്പാട്, രാജന്‍ കണ്ടത്തില്‍, ലസിത ദാമോദരന്‍, റീന എന്നിവര്‍ മറ്റ് പ്രധാന വേഷങ്ങളില്‍ എത്തുന്നു. ഇവരെല്ലാം ഈ മേഖലകളിലെ കലാരംഗങ്ങളുമായി ചേര്‍ന്നു പ്രവര്‍ത്തിക്കുന്നവരാണ്.

ഛായാഗ്രഹണം കമല്‍നാഥ് പയ്യന്നൂര്‍ നിര്‍വഹിക്കുമ്പോള്‍, നിര്‍മാണ നിര്‍വഹണം ജോബി ആന്റണിയുടെ കീഴിലാണ് പൂര്‍ത്തിയാകുന്നത്. പ്രശസ്തനായ വാഴൂര്‍ ജോസും ചിത്രവുമായി ബന്ധപ്പെട്ട് പ്രവര്‍ത്തിക്കുന്നു.

കണ്ണൂര്‍, തലശ്ശേരി, തളിപ്പറമ്പ് തുടങ്ങിയ മലബാര്‍ മേഖലയിലെ പ്രധാന സ്ഥലങ്ങളില്‍ ചിത്രീകരണം നടക്കുന്ന 'ഒരു വടക്കന്‍ സന്ദേശം' മെയ് ഒന്നിന് ഷൂട്ടിംഗ് ആരംഭിക്കും.