കൊച്ചി: കേരളത്തിന്റെ മലയോര മേഖലകളിലെ പരിസ്ഥിതി തകർച്ചയുടെയും കാലാവസ്ഥാ വ്യതിയാനത്തിന്റെയും ഭീകരത ദൃശ്യങ്ങളിലൂടെ ആവിഷ്‌കരിച്ച മലയാള ചിത്രം 'ഭൂതലം' (Hidden Tremors) അന്താരാഷ്ട്ര തലത്തിൽ ചർച്ചയാകുന്നു. പ്രശസ്ത താരം ഇന്ദ്രൻസ് കേന്ദ്രകഥാപാത്രത്തെ അവതരിപ്പിക്കുന്ന ചിത്രം, വേറിട്ട ദൃശ്യഭാഷയിലൂടെയും സാങ്കേതിക മികവിലൂടെയുമാണ് ആഗോള പുരസ്‌കാരങ്ങൾ വാരിക്കൂട്ടുന്നത്.

To advertise here,

ഛായാഗ്രഹണ മികവിന് ആഗോള അംഗീകാരം

ദേശീയ പുരസ്‌കാര ജേതാവായ നിഖിൽ എസ്. പ്രവീണിന്റെ ക്യാമറ കണ്ണുകളാണ് ചിത്രത്തിന്റെ ആത്മാവ്. പ്രകൃതിയുടെ ശാന്തതയും അതിനുള്ളിൽ പതിയിരിക്കുന്ന പ്രഹരശേഷിയും ഒരേപോലെ ഒപ്പിയെടുത്ത അദ്ദേഹത്തിന്റെ ഛായാഗ്രഹണ മികവിന് അന്താരാഷ്ട്ര തലത്തിൽ മികച്ച പ്രശംസയാണ് ലഭിക്കുന്നത്.

സ്റ്റോക്ക്ഹോം സിറ്റി ഫിലിം ഫെസ്റ്റിവലിൽ മികച്ച ഛായാഗ്രഹണത്തിനുള്ള പുരസ്‌കാരം നിഖിൽ എസ്. പ്രവീൺ സ്വന്തമാക്കി. അതിശക്തമായ മഴയും പ്രതികൂല കാലാവസ്ഥയും നിലനിന്നിരുന്ന ഹൈറേഞ്ച് മേഖലകളിൽ വെറും ഒൻപതുദിവസം കൊണ്ടാണ് ചിത്രീകരണം പൂർത്തിയാക്കിയത് എന്നത് നേട്ടത്തിന്റെ തിളക്കം വർധിപ്പിക്കുന്നു.

ഭൂമിക്കടിയിലെ മാറ്റങ്ങളും ഉരുൾപൊട്ടലിന്റെ ഭീതിയും പ്രേക്ഷകരിലേക്ക് നേരിട്ട് എത്തിക്കുന്നതിൽ നിഖിലിന്റെ ലൈറ്റിങ്ങും ഫ്രെയിമിങ്ങും നിർണ്ണായക പങ്കുവഹിച്ചു.

സംവിധാനം: ശ്രീകാന്ത് പങ്കപ്പാട്ട്

രചയിതാവും ആർക്കിടെക്റ്റുമായ ശ്രീകാന്ത് പങ്കപ്പാട്ടിന്റെ ആദ്യസംവിധാന സംരംഭമാണ് ഭൂതലം. ക്വാറി ഖനനവും അശാസ്ത്രീയമായ നിർമാണ പ്രവർത്തനങ്ങളും പ്രകൃതിയിൽ വരുത്തുന്ന ആഘാതങ്ങൾ ഒരു കുടുംബത്തിന്റെ ജീവിതത്തിലൂടെ അദ്ദേഹം ഹൃദയസ്പർശിയായി അവതരിപ്പിച്ചിരിക്കുന്നു. അമോർ ഫിലിം ഹൗസ് അവതരിപ്പിക്കുന്ന ചിത്രം അന്താരാഷ്ട്ര മേളകളിലെ പ്രദർശനത്തിന് ശേഷം ഉടൻ തന്നെ കേരളത്തിലെ തിയേറ്ററുകളിലും ഒടിടി പ്ലാറ്റ്ഫോമുകളിലും എത്തുന്നതാണ്.