ജനപ്രിയ നായകന്‍ ദിലീപിനെ നായകനാക്കി, ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലന്‍ നിര്‍മിക്കുന്ന 'ഭ.ഭ.ബ'യിലെ ആദ്യഗാനം പുറത്ത്. 'അഴിഞ്ഞാട്ടം' എന്ന ടൈറ്റിലോടെ പുറത്ത് വന്നിരിക്കുന്ന ഗാനം അക്ഷരാര്‍ഥത്തില്‍ ഒരു ആഘോഷമാണ് പ്രേക്ഷകര്‍ക്ക് സമ്മാനിക്കുന്നത്. എം.ജി. ശ്രീകുമാര്‍, വിനീത് ശ്രീനിവാസന്‍, നിരഞ്ജ് സുരേഷ് എന്നിവര്‍ ചേര്‍ന്ന് ആലപിച്ച ഗാനത്തിന് വരികള്‍ രചിച്ചത് വിനായക് ശശികുമാര്‍ ആണ്. ഷാന്‍ റഹ്‌മാന്‍ ആണ് ഈണം പകര്‍ന്നത്.
ദിലീപും മോഹന്‍ലാലും ചുവട് വെക്കുന്ന ഗാനത്തിന് നൃത്തം ഒരുക്കിയത് സാന്‍ഡി മാസ്റ്റര്‍ ആണ്. ഇരുവരുടെയും തകര്‍പ്പന്‍ നൃത്ത ചുവടുകള്‍ തന്നെയാണ് ഗാനത്തിന്റെ ഏറ്റവും വലിയ ഹൈലൈറ്റ്. നവാഗതനായ ധനഞ്ജയ് ശങ്കര്‍ സംവിധാനംചെയ്ത ചിത്രം ഡിസംബര്‍ 18-നാണ് ആഗോള റിലീസായി എത്തുക. ദിലീപിനൊപ്പം വിനീത് ശ്രീനിവാസന്‍, ധ്യാന്‍ ശ്രീനിവാസന്‍ എന്നിവരും നിര്‍ണായക വേഷങ്ങള്‍ ചെയ്യുന്ന മാസ് കോമഡി ആക്ഷന്‍ എന്റര്‍ടെയ്‌നര്‍ ചിത്രത്തില്‍, തിയേറ്ററുകളെ പൂരപ്പറമ്പാക്കുന്ന വമ്പന്‍ അതിഥി വേഷത്തിലാണ് മലയാളത്തിന്റെ മഹാനടന്‍ മോഹന്‍ലാല്‍ എത്തുന്നത്.
കോ പ്രൊഡ്യൂസേര്‍സ്: ബൈജു ഗോപാലന്‍, വി.സി. പ്രവീണ്‍, എക്‌സിക്യൂട്ടീവ് പ്രൊഡ്യൂസര്‍: കൃഷ്ണമൂര്‍ത്തി. ഡ്രീം ബിഗ് ഫിലിംസ് ആണ് ചിത്രത്തിന്റെ കേരളത്തിലെ ഡിസ്ട്രിബൂഷന്‍ പാര്‍ട്ണര്‍.
ചിത്രത്തിന്റെ സെന്‍സറിങ് പൂര്‍ത്തിയായി. യു/എ 13+ സര്‍ട്ടിഫിക്കറ്റ് ആണ് ചിത്രത്തിന് ലഭിച്ചത്. ചിത്രത്തിന്റെ കേരളത്തിലെ ഓണ്‍ലൈന്‍ ടിക്കറ്റ് ബുക്കിങ്ങും ഉടന്‍ ആരംഭിക്കും. ട്രെയ്ലര് ദിവസങ്ങള്‍ക്ക് മുന്‍പ് പുറത്ത് വരികയും വമ്പന്‍ പ്രേക്ഷക പ്രതികരണം നേടുകയും ചെയ്തിരുന്നു. ആദ്യാവസാനം പ്രേക്ഷകര്‍ക്ക് ആഘോഷം സമ്മാനിക്കുന്ന രീതിയിലാണ് ചിത്രം അവതരിപ്പിക്കുന്നതെന്ന സൂചനയാണ് ട്രെയ്ലര് നല്‍കിയത്. അതിനോട് ചേര്‍ന്ന് നില്‍ക്കുന്ന രീതിയിലാണ് ഇപ്പോള്‍ റിലീസ് ചെയ്ത ഗാനവും അവതരിപ്പിച്ചിരിക്കുന്നത്.
ദിലീപ്, വിനീത് ശ്രീനിവാസന്‍, ധ്യാന്‍ ശ്രീനിവാസന്‍ എന്നിവര്‍ക്കൊപ്പം മോഹന്‍ലാലിന്‍ന്റെ മാസ്സ് അഴിഞ്ഞാട്ടവും പ്രേക്ഷകരെ കാത്തിരിക്കുന്നുണ്ടെന്നാണ് ട്രെയ്ലര്, ഗാനം എന്നിവ കാണിച്ചു തരുന്നത്. സംഘട്ടനവും, ഹാസ്യവും പാട്ടും നൃത്തവുമെല്ലാം കോര്‍ത്തിണക്കി പ്രേക്ഷകര്‍ക്ക് ഗംഭീര തിയേറ്റര്‍ അനുഭവം സമ്മാനിക്കാനുള്ള ഒരുക്കത്തിലാണ് ചിത്രത്തിന്റെ അണിയറപ്രവര്‍ത്തകര്‍.
ടീസര്‍, ട്രെയ്ലര്, ഗാനം എന്നിവയിലൂടെ ചിത്രത്തെ കുറിച്ചുള്ള പ്രേക്ഷക പ്രതീക്ഷകള്‍ വാനോളം ഉയര്‍ന്നിട്ടുണ്ട്. ജനപ്രിയ നായകന്‍ ദിലീപിന്റെ ഒരു കംപ്ലീറ്റ് ഷോ വാഗ്ദാനം ചെയ്യുന്ന ചിത്രം, യുവ പ്രേക്ഷകര്‍ക്കും കുടുബ പ്രേക്ഷകര്‍ക്കും ക്രിസ്മസ് വെക്കേഷന്‍ അടിച്ചുപൊളിക്കാന്‍ സാധിക്കുന്ന സിനിമാനുഭവം സമ്മാനിക്കാനാണ് ഒരുങ്ങുന്നത്.
'വേള്‍ഡ് ഓഫ് മാഡ്നെസ്സ്' എന്ന ടാഗ് ലൈനോടെയാണ് ചിത്രം അവതരിപ്പിക്കുന്നത്. 'ഭയം ഭക്തി ബഹുമാനം' എന്നതിന്റെ ചുരുക്ക രൂപമായിട്ടാണ് 'ഭ.ഭ.ബ' എന്ന ടൈറ്റിലോടെ ചിത്രമെത്തുന്നത്. ഫാഹിം സഫര്‍, നൂറിന്‍ ഷെരീഫ് എന്നിവര്‍ ചേര്‍ന്നാണ് ചിത്രം രചിച്ചിരിക്കുന്നത്. സിദ്ധാര്‍ഥ് ഭരതന്‍, ബൈജു സന്തോഷ്, ബാലു വര്‍ഗീസ്, സലിം കുമാര്‍, അശോകന്‍, ദേവന്‍, ബിജു പപ്പന്‍, ജി. സുരേഷ് കുമാര്‍, നോബി, വിജയ് മേനോന്‍, റിയാസ് ഖാന്‍, സെന്തില്‍ കൃഷ്ണ, റെഡിന്‍ കിങ്‌സിലി, ഷമീര്‍ ഖാന്‍ (പ്രേമലു ഫെയിം), ഷിന്‍സ്, ശരണ്യ പൊന്‍വണ്ണന്‍, നൂറിന്‍ ഷെറീഫ്, ധനശ്രീ, ലങ്കാ ലഷ്മി, കോറിയോഗ്രാഫര്‍ സാന്റി എന്നിവരും ചിത്രത്തിന്റെ താരനിരയിലുണ്ട്. വമ്പന്‍ ബജറ്റില്‍ ഒരുക്കിയ ചിത്രം കോയമ്പത്തൂര്‍, പാലക്കാട്, പൊള്ളാച്ചി, കൊച്ചി എന്നിവിടങ്ങളിലായാണ് ചിത്രീകരിച്ചത്.
അഡീഷണല്‍ തിരക്കഥ, സംഭാഷണം: ധനഞ്ജയ് ശങ്കര്‍, ഛായാഗ്രഹണം: അര്‍മോ, സംഗീതം: ഷാന്‍ റഹ്‌മാന്‍, പശ്ചാത്തല സംഗീതം: ഗോപി സുന്ദര്‍, എഡിറ്റിങ്: രഞ്ജന്‍ ഏബ്രഹാം, കലാസംവിധാനം: നിമേഷ് താനൂര്‍, പ്രൊഡക്ഷന്‍ കണ്‍ട്രോളര്‍ സുരേഷ് മിത്രക്കരി, ആക്ഷന്‍: കലൈ കിങ്‌സണ്‍, സുപ്രീംസുന്ദര്‍, കോസ്റ്റ്യൂം ഡിസൈനര്‍മാര്‍: ധന്യ ബാലകൃഷ്ണന്‍, വെങ്കിട്ട് സുനില്‍ (ദിലീപ്), മേക്കപ്പ്: റോണെക്‌സ് സേവ്യര്‍, നൃത്തസംവിധാനം: സാന്‍ഡി, സൗണ്ട് ഡിസൈന്‍: സിങ്ക് സിനിമ, സൗണ്ട് മിക്‌സിങ്: അജിത് എ. ജോര്‍ജ്, ട്രെയ്ലര് കട്ട്: എജി, വരികള്‍: കൈതപ്രം ദാമോദരന്‍ നമ്പൂതിരി, വിനായക് ശശികുമാര്‍, മനു മഞ്ജിത്ത്, ഫിനാന്‍സ് കണ്‍ട്രോളര്‍: ശ്രീജിത്ത് മണ്ണാര്‍ക്കാട്, ചീഫ് അസോസിയേറ്റ് ഡയറക്ടര്‍: അനില്‍ എബ്രഹാം, വിഎഫ്എക്‌സ്: ഐഡന്റ് ലാബ്‌സ്, ഡിഐ: കളര്‍ പ്ലാനറ്റ് സ്റ്റുഡിയോസ്, കളറിസ്റ്റ്: രമേഷ് സി.പി., സ്റ്റില്‍സ്: സെറീന്‍ ബാബു, പബ്ലിസിറ്റി ഡിസൈനുകള്‍: യെല്ലോ ടൂത്ത്‌സ്, വിതരണ പങ്കാളി: ഡ്രീം ബിഗ് ഫിലിംസ്, ഓവര്‍സീസ് വിതരണം: ഫാര്‍സ് ഫിലിംസ്, സബ്‌ടൈറ്റിലുകള്‍: ഫില്‍ ഇന്‍ ദി ബ്‌ളാങ്ക്‌സ്, പ്രൊജക്ട് മാനേജ്‌മെന്റ് പ്ലാറ്റ്‌ഫോം: ബിഹൈന്‍ഡ് ദി സീന്‍ ആപ്പ്, പ്രൊമോഷന്‍സ്: ദി യൂനിയന്‍, വിഷ്വല്‍ പ്രമോഷന്‍സ്: സ്നേക് പ്ലാന്റ് എല്‍എല്‍പി, ആന്റി പൈറസി: ഒബ്‌സ്‌ക്യൂറ, പിആര്‍ഒ: വൈശാഖ് സി. വടക്കേവീട്, ജിനു അനില്‍കുമാര്‍.
Content Highlights: First song `Azhinjam` from Dileep & Mohanlal`s `BhaBhaBa` released.
Published: 15 Dec 2025, 08:28 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented