ആക്ഷന്‍ സീനുകള്‍ക്ക് വളരെ അനുയോജ്യനായ നടനാണ് മോഹന്‍ലാല്‍- മരയ്ക്കാര്‍ ഫൈറ്റ് മാസ്റ്റർ | Exclusive

'മോഹന്‍ലാല്‍ ഇത്രവലിയ നടനാണെന്ന് അറിയില്ലായിരുന്നു'

ആക്ഷന്‍ സീനുകള്‍ക്ക് വളരെ അനുയോജ്യനാണ് മോഹന്‍ലാല്‍. ഓരോ സീനുകളും എടുക്കുന്നതിന് മുമ്പ് റിഹേഴ്‌സല്‍ നോക്കിയിരുന്നെങ്കിലും അദ്ദേഹം വളരെ പെട്ടന്ന് തന്നെ എല്ലാം പഠിച്ചു. അത് ആക്ഷന്‍ രംഗങ്ങള്‍ ചിത്രീകരിക്കുന്നത് കൂടുതല്‍ എളുപ്പവുമാക്കി, സമയലാഭവുമുണ്ടാക്കി. ഇന്ത്യയിലെ തന്നെ പ്രശസ്തനായ ഒരു നടനാണ് അദ്ദേഹമെന്ന് അറിയില്ലായിരുന്നു. താരജാഡകളില്ലാതെ സാധാരണക്കാരനേപ്പോലെയാണ് അദ്ദേഹം പെരുമാറിയത്.

മലയാളസിനിമയും മറ്റുഭാഷാസിനിമകളും

ഒരു സിനിമ രൂപീകരിച്ചെടുക്കുന്ന രീതിയില്‍ മറ്റു ഭാഷകളിലെ സിനിമകളെ അപേക്ഷിച്ച് വലിയ വ്യത്യാസമൊന്നും മലയാളത്തില്‍ ഞാന്‍ കണ്ടില്ല. എടുത്തുപറയേണ്ട ഒരുകാര്യം മരയ്ക്കാറിന്റെ സ്റ്റുഡിയോ ആണ്. ജോലിസ്ഥലത്തുനിന്നും സ്റ്റുഡിയോയിലേക്ക് കാറിലാണ് പോയത്. ഞങ്ങള്‍ മാത്രമായിരുന്നില്ല അവിടെ സിനിമാ ചിത്രീകരണത്തിനായുണ്ടായിരുന്നത്. അതുകൊണ്ട് ശരിയായ സെറ്റിലേക്കാണ് ഞാന്‍ പോകുന്നതെന്ന് ഉറപ്പുവരുത്തേണ്ടിയിരുന്നു.

ഒപ്പമുള്ള സംഘട്ടനസംവിധായകര്‍

കാസു നെഡ വളരെയധികം പ്രവര്‍ത്തിപരിചയമുള്ളയാളാണ്. എന്താണ് ചെയ്യുന്നതെന്ന് കൃത്യമായ ബോധമുള്ളയാള്‍. നല്ലൊരു സുഹൃത്തും സഹപ്രവര്‍ത്തകനുമാണ് അദ്ദേഹം. പത്ത് വര്‍ഷത്തിലേറെയായി ഞങ്ങള്‍ ഒരുമിച്ച് പ്രവര്‍ത്തിക്കുന്നു. ത്യാഗരാജന്‍ മാസ്റ്ററേക്കുറിച്ച് പറയുകയാണെങ്കില്‍ ഞാനെന്താണ് ചെയ്യാന്‍ ശ്രമിക്കുന്നതെന്ന് അദ്ദേഹത്തിന് കൃത്യമായി മനസിലാവുന്നുണ്ടായിരുന്നു. അതെന്റെ ജോലി എളുപ്പമാക്കി. ഇവര്‍ രണ്ടുപേരുമില്ലായിരുന്നെങ്കില്‍ ഈ ജോലി എനിക്ക് പൂര്‍ണതയില്‍ എത്തിക്കാനാവുമായിരുന്നില്ല.

പ്രൊഫഷണലായ സഹപ്രവര്‍ത്തകര്‍

കേരളത്തില്‍ ഞാനാദ്യമായാണ് വരുന്നത്. ഈ സിനിമയില്‍ ഏറ്റവും ആകര്‍ഷിച്ചത് പ്രൊഡക്ഷന്‍ ടീമാണ്. എല്ലാവരും തികഞ്ഞ പ്രൊഫഷണലുകള്‍. ഇവിടത്തെ ആളുകളെ വളരെയധികം ഇഷ്ടമായി. ഞങ്ങള്‍ രണ്ട് ഭാഷയാണ് സംസാരിക്കുന്നതെന്ന് എനിക്കറിയാമായിരുന്നു. പക്ഷേ പരസ്പരം സംസാരിച്ചു, തമാശകള്‍ പറഞ്ഞു.

ഇനിയുള്ള കാലവും സംഘട്ടനരംഗങ്ങള്‍ ചെയ്യണമെന്നാണ് സുമ്രെത് പറയുന്നത്. അത്രത്തോളം ഈ ജോലിയെ സ്‌നേഹിക്കുന്നു അദ്ദേഹം.

Content Highlights: Marakkar Lion of the Arabian Sea, fight master Sumret Muengput, Mohanlal, Arjun, Priyadarshan