ഒരിക്കലും ദുഃഖിച്ചിരുന്നിട്ടില്ല; നിരാശനായിരുന്നാല്‍ മുന്നേറാന്‍ പറ്റില്ല | ഗോവിന്ദ് കൃഷ്ണ | അഭിമുഖം

നടനാവുക എന്നത് എന്റെ മാത്രം ആവശ്യമാണ്

നായകനായി വന്ന് പിന്നീട് ചെറിയ വേഷങ്ങളിലേക്ക് പോയെങ്കിലും ആളുകളില്‍നിന്ന് കുത്തുവാക്കുകളൊന്നും കേള്‍ക്കേണ്ടിവന്നിട്ടില്ല. നടനാവുക എന്നത് എന്റെ മാത്രം ആവശ്യമാണ്. നന്നായി ആളുകളെ രസിപ്പിക്കുന്ന ഒരാളാണെന്ന് തെളിയിച്ചുകഴിഞ്ഞാല്‍ മറ്റുള്ളവര്‍ക്കും ഞാന്‍ ആവശ്യമുള്ള ഒരു ഘടകമായി മാറും. പക്ഷേ, അതുവരെ തെളിയിച്ചു കൊണ്ടേയിരിക്കുകയെന്നത് എന്റെ ഉത്തരാവാദിത്തമാണ്. പിന്നെ ആളുകള്‍ ഓരോരുത്തരും ഓരോ തരത്തിലാണ്. എങ്ങനെ പറയണം എന്നറിയാത്ത ആളുകളുണ്ടാവാം. അതൊന്നും എന്നെ വിഷമിപ്പിച്ചിട്ടില്ല. 

നിരാശനായി മാത്രമിരുന്നാല്‍ ജീവിതത്തില്‍ മുന്നേറാന്‍ പറ്റില്ല

ദുഃഖിച്ചിരിക്കുക എന്നൊരു കാര്യം എന്റെ ജീവിതത്തിലുണ്ടായിട്ടില്ല. എപ്പോഴും സന്തോഷവാനായിട്ടിരിക്കുന്നയാളാണ് ഞാന്‍. സാഹചര്യങ്ങളെ മനസിലാക്കുക എന്നത് മാത്രമേയുള്ളൂ. നിരാശനായി മാത്രമിരുന്നാല്‍ ജീവിതത്തില്‍ ഒട്ടും മുന്നേറാന്‍ പറ്റില്ല. അവസരങ്ങള്‍ എന്നുവരും എന്ന് തിരിച്ചറിയാന്‍ പറ്റില്ല. സിനിമയില്‍ നിലനില്‍ക്കണമെന്നുണ്ടെങ്കില്‍ ശ്രമിച്ചുകൊണ്ടേയിരിക്കുക മാത്രമേ ചെയ്യാനുള്ളൂ. ഏതെങ്കിലും ഒരുസമയത്ത് അത് വരും. 'ഹാങ് ഓവറി'ലൂടെ കരിയര്‍ മാറുമെന്ന് ഞാന്‍ പ്രതീക്ഷിച്ചിരുന്നു. അത് സംഭവിച്ചില്ല, എങ്കില്‍ അടുത്ത കാര്യം എന്ന് കരുതി. ഇതിനിടെ പഠിക്കാനായി ശ്രമിച്ചിട്ടുണ്ട്. ദ ഫ്‌ളോര്‍ എന്ന പേരില്‍ ഒരു ഡാന്‍സ് സ്റ്റുഡിയോ ഉണ്ടായിരുന്നു. ഞാനതിന്റെ ഭാഗമായിരുന്നു. ചെറുപ്പംതൊട്ടേ നൃത്തം ചെയ്യുന്നയാളാണ്. സിനിമയ്ക്കുവേണ്ടി ഞാന്‍ പഠിച്ച കാര്യങ്ങള്‍ മറ്റുള്ളവരെ പഠിപ്പിക്കുകയും പഠിച്ചത് മറക്കാതിരിക്കാനുമുള്ള വഴികള്‍ ആലോചിക്കുകയുമൊക്കെ ഇക്കാലയളവില്‍ ചെയ്തു. എന്തെങ്കിലുമൊക്കെ എപ്പോഴും പഠിക്കാനായി ഞാന്‍ ശ്രമിച്ചിരുന്നു. ചെയ്യാനാഗ്രഹിച്ച കാര്യമാണ് ചെയ്തുകൊണ്ടിരുന്നത് എന്നതിനാല്‍ നിരാശയൊന്നും തോന്നിയിട്ടില്ല. 

'മിഖായേലി'ലെ വൈറല്‍ ഫൈറ്റ് സീന്‍

'മിഖായേലി'ലെ ഞാനുള്‍പ്പെടുന്ന സംഘട്ടനരംഗം യൂട്യൂബില്‍ ഇപ്പോഴും ആളുകള്‍ വീണ്ടും വീണ്ടും കാണുന്നതില്‍ വളരെ സന്തോഷവാനാണ്. 'മിഖായേലി'ന്റെ ലൊക്കേഷനില്‍ ഞാന്‍ പോയിരുന്നു. വേറൊരു നടനുവേണ്ടി വെച്ചിരുന്ന വേഷമായിരുന്നു അത്. അദ്ദേഹത്തിന് എത്താനാവാത്ത ഒരു സാഹചര്യം വന്നപ്പോള്‍ അത് എന്നിലേക്ക് വരികയായിരുന്നു. എന്നെങ്കിലും ഒരു നടനാവുന്ന സമയത്ത് ഏറ്റവും നന്നായി ചെയ്യണമെന്ന് കരുതി ഞാന്‍ പഠിച്ച ഒരുപാട് കാര്യങ്ങളുണ്ട്. ചെറുപ്പംമുതലേ ഡാന്‍സ് അറിയാം. മാര്‍ഷ്യല്‍ ആര്‍ട്‌സ് പഠിച്ചിട്ടുണ്ട്. എല്ലാം പഠിച്ചത് സിനിമയ്ക്കു വേണ്ടിയാണ്. 'മിഖായേല്‍' തുടങ്ങിയ സമയത്ത് അതെല്ലാം ആവശ്യം വന്നു. എല്ലാ നടന്മാരും കേള്‍ക്കാന്‍ ആഗ്രഹിക്കുന്ന വാക്കുകളാണ് അന്ന് ആദ്യഷോട്ട് എടുത്തുകഴിഞ്ഞപ്പോള്‍ സംവിധായകന്‍ ഹനീഫ് അദേനി എന്നോടുപറഞ്ഞത്. എന്നെ സംബന്ധിച്ചടത്തോളം അത് വലിയ ഒരു കാര്യമാണ്. കാരണം കാലങ്ങളായി ഇങ്ങനെയൊരു വാക്ക് കേള്‍ക്കാന്‍ ആഗ്രഹിക്കുന്നു. 

മറാഠി സിനിമയിലെ അപ്രതീക്ഷിത തുടക്കം

എന്റെ സുഹൃത്ത് സിമ്മി ജോസഫ് ആയിരുന്നു അന്യ എന്ന മറാഠി സിനിമയുടെ സംവിധായകന്‍. സിമ്മി കാലങ്ങളായി ഡല്‍ഹിയിലാണ്. ഒരു സിനിമ ചെയ്യണമെന്ന് ആലോചിച്ചിരുന്നയാളാണ് അദ്ദേഹം. അത് പക്ഷേ വേറൊരു കഥയായിരുന്നു. ജെ.എന്‍.യുവിനെ ഒക്കെ അടിസ്ഥാനമാക്കിയുള്ള ചിത്രമായിരുന്നു അത്. അതില്‍ ഒരു കഥാപാത്രമുണ്ടെന്ന് സിമ്മി എന്നോട് പറഞ്ഞിരുന്നു. ഇതിന്റെ ജോലികളുമായി മുന്നോട്ടുപോവുന്നതിനിടെയാണ് 'അന്യ'യുടെ കഥ കേള്‍ക്കുന്നതും അത് ആദ്യം ചെയ്യാമെന്ന് തീരുമാനിക്കുന്നതും. എന്തെങ്കിലും വേഷമുണ്ടോ എന്ന് സിമ്മിയെ വിളിച്ചപ്പോള്‍ പറ്റിയതൊന്നും ഇല്ല എന്നാണ് പറഞ്ഞത്. എന്തെങ്കിലും മതിയെന്ന് പറഞ്ഞപ്പോള്‍ സിമ്മി ഒരു ചെറിയ കഥാപാത്രത്തേക്കുറിച്ച് പറഞ്ഞു. ഒരാള്‍ വെടിവെക്കുന്നതാണ് രംഗം. ആ രംഗം മൊബൈല്‍ ഫോണില്‍ ആളുകള്‍ കാണുന്നതും വൈറലാവുന്നതുമാണ് സീന്‍. അതുകൊണ്ട് മൊബൈല്‍ സ്‌ക്രീനിലാണ് ആ രംഗം സിനിമയിലുണ്ടാവുക. ഇത് കേട്ടപ്പോള്‍ ഞാന്‍ ഓ.കെ പറഞ്ഞു. അങ്ങനെ ഈ രംഗം ചിത്രീകരിച്ചുകഴിഞ്ഞപ്പോള്‍ സിമ്മിയും പടത്തിന്റെ രണ്ട് അസോസിയേറ്റ് ഡയറക്ടര്‍മാരും വന്നുപറഞ്ഞു ചെയ്തത് നന്നായിട്ടുണ്ട്. കൂടാതെ ഈ ചിത്രത്തിലെ നെഗറ്റീവ് സ്വഭാവമുള്ള എല്ലാ കഥാപാത്രങ്ങളേയും ചേര്‍ത്ത് ഒറ്റ കഥാപാത്രമാക്കുകയാണ്, ഞാനാണ് ആ കഥാപാത്രം ചെയ്യേണ്ടതെന്ന്. അതോടെ സിനിമയില്‍ തുടക്കംമുതല്‍ അവസാനംവരെയുള്ള ഒരു കഥാപാത്രമായി അത്.

കൂടുതല്‍ സമയമെടുത്ത് ചിത്രീകരിക്കുന്ന മറാഠി ചിത്രങ്ങള്‍

കുറച്ചുകൂടി വലിയ ക്യാന്‍വാസാണ് മറാഠി ചിത്രങ്ങളുടേത്. എല്ലാവര്‍ക്കും കാരവാനും വണ്ടികളും. പിന്നെ ഞാന്‍ ചെയ്ത അന്യ എന്ന ചിത്രം സത്യത്തില്‍ ഹിന്ദി-മറാഠി ഹൈബ്രിഡ് ചിത്രമായിരുന്നു. അഭിനേതാക്കളെല്ലാവരും ഹിന്ദിയില്‍ സുപരിചിതരായവരാണ്. അതുല്‍ കുല്‍ക്കര്‍ണി, റെയ്മാ സെന്‍, ഭൂഷണ്‍ പ്രധാന്‍, യശ്പാല്‍ ശര്‍മ അങ്ങനെ. കൂടുതല്‍ സമയമെടുത്താണ് ചിത്രീകരിക്കുക.

ഇതുവരെ കാത്തിരുന്നതിനൊക്കെ ഫലമുണ്ടായി

ഇതുവരെ കാത്തിരുന്നതിനൊക്കെ ഫലമുണ്ടായി. നമ്മളുടെ വളര്‍ച്ച എന്നത് ഘട്ടംഘട്ടമായാണ് സംഭവിക്കാറ്. കിട്ടുന്ന ഓരോ പുതിയ അവസരവും വളരാനുള്ള പുതിയ സാഹചര്യങ്ങളാണ്. ചിലപ്പോള്‍ ഉദ്ദേശിക്കുന്ന രീതിയില്‍ കാര്യങ്ങള്‍ നടക്കില്ല. ഉദ്ദേശിക്കുന്ന രീതിയില്‍ത്തന്നെ കാര്യങ്ങള്‍ നടന്നാല്‍ ഈയൊരു ജോലിക്കുവേണ്ടി വന്നിട്ട് കാര്യമില്ല. കാരണം ഏറ്റവും അപ്രവചനീയമായ സംഭവങ്ങള്‍ നടക്കുന്ന മേഖലയാണ്. ക്ഷമയോടെയും സന്തോഷത്തോടെയുമിരിക്കുക എന്നുമാത്രമേ ചെയ്യാനുള്ളൂ. ഞാന്‍ വളരെ സന്തോഷവാനായി മുന്നോട്ടുപോകുന്ന മനുഷ്യനാണ്. കഴിഞ്ഞ വര്‍ഷത്തേക്കാളും ഇത്തവണ മെച്ചപ്പെട്ടു. കോവിഡ് വന്ന സമയത്ത് മാത്രമാണ് നെഗറ്റീവായത് സംഭവിച്ചിട്ടുള്ളത്. 'മിഖായേലി'നും 'തൃശ്ശൂര്‍ പൂര'ത്തിനും ശേഷം ഒമ്പത് ചിത്രങ്ങള്‍ എനിക്കായി വന്നിരുന്നു. കോവിഡ് വന്നതോടെ രണ്ടു വര്‍ഷത്തിനിടെ അതില്‍ പല ചിത്രങ്ങളും നടക്കാതെവന്നു. അപ്പോള്‍ വീണ്ടും പിന്നോട്ടായി. പക്ഷേ അത് എന്റെ മാത്രം അവസ്ഥയായിരുന്നില്ല. ഇന്‍ഡസ്ട്രി മൊത്തം അങ്ങനെയായിരുന്നല്ലോ.

'കിംഗ് ഓഫ് കൊത്ത'യില്‍ വലിയ പ്രതീക്ഷ

'കിംഗ് ഓഫ് കൊത്ത'യാണ് ഇനി വരാനിരിക്കുന്നതില്‍ പ്രധാനചിത്രം. ഒരു ആരാധകനേ പോലെ വലിയ പ്രതീക്ഷയാണ് 'കൊത്ത'യേക്കുറിച്ചുള്ളത്. ഇന്ത്യ മൊത്തം ഉറ്റുനോക്കുന്ന വലിയ സിനിമയാണത്. വലിയ സ്‌കെയിലില്‍ ചെയ്തിരിക്കുന്ന മെഗ് പ്രോജക്റ്റ് കൂടിയാണ്. ഡബ്ബ് ചെയ്ത് കഴിഞ്ഞപ്പോള്‍ ചില ദൃശ്യങ്ങള്‍ കണ്ടപ്പോളാണ് അതിന്റെ ഗാംഭീര്യം എത്ര മാത്രമുണ്ടെന്ന് മനസിലായത്. ഓഗസ്റ്റില്‍ തുടങ്ങാനായി വലിയൊരു ചിത്രത്തിന്റെ ചര്‍ച്ചകള്‍ നടന്നുകൊണ്ടിരിക്കുകയാണ്. 'സമാറ'യേപ്പോലെ തന്നെ പൊതുവേ മലയാളത്തില്‍ കണ്ടിട്ടില്ലാത്ത തരം വിഷയമാണ്.