ഹ്രസ്വകാലയളവിൽ ചാഞ്ചാട്ടം തുടരും: വളർച്ചാ സാധ്യത നേട്ടമാക്കാം

സങ്കീർണവും അതേസമയം നിക്ഷേപ സാധ്യതകൾ നിറഞ്ഞതുമായ ഘട്ടത്തിലൂടെയാണ് ഓഹരി വിപണി കടന്നുപോകുന്നത്. ഭൗമരാഷ്ട്രീയ സംഘർഷങ്ങളും സാമ്പത്തിക അനിശ്ചിതത്വങ്ങളും വിപണിയിൽ ഹ്രസ്വകാല ചാഞ്ചാട്ടങ്ങൾ സൃഷ്ടിക്കുന്നുണ്ടെങ്കിലും വിപണി പ്രകടിപ്പിക്കുന്ന പ്രതിരോധശേഷി ശ്രദ്ധേയമാണ്. വിപണി ചലനങ്ങളെക്കാളുപരി, ദീർഘകാലാടിസ്ഥാനത്തിലുള്ള വളർച്ചാ പ്രതീക്ഷകളാണ് ഇന്ത്യൻ വിപണിയെ ആഗോളതലത്തിൽ വേറിട്ടുനിർത്തുന്നത്. ആഗോള പ്രതിസന്ധികൾക്കിടയിലും നിലനിൽക്കുന്ന ഈ തന്ത്രപരമായ കരുത്ത് വിശകലനം ചെയ്യുമ്പോൾ, വിപണിയെ ഏറ്റവും കൂടുതൽ സ്വാധീനിക്കുന്ന ഘടകമായ ക്രൂഡോയിൽ വിലയിലേക്കാണ് ശ്രദ്ധ തിരിയേണ്ടത്.

ക്രൂഡോയിൽ വിലയും സമ്പദ്‌വ്യവസ്ഥയും

രാജ്യത്തെ സാമ്പത്തിക ചലനാത്മകത നിർണയിക്കുന്നതിൽ ക്രൂഡോയിൽ വില പ്രധാന പങ്കുവഹിക്കുന്നു. ആവശ്യകതയുടെ 90 ശതമാനവും ഇറക്കുമതിയെ ആശ്രയിക്കുന്നതിനാൽ ആഗോള വിപണിയിലെ വിലവർധന ആഭ്യന്തര വിപണിയിൽ പ്രതിഫലിക്കും. സാധാരണഗതിയിൽ എണവിലയും വിപണിയും തമ്മിൽ വിപരീത ബന്ധമാണുള്ളതെങ്കിലും സമീപകാലത്ത് ഈ പ്രവണത മറികടക്കുന്ന കരുത്ത് വിപണി പ്രകടിപ്പിച്ചിട്ടുണ്ട്.

എണ്ണവില വർധനയുടെ പ്രത്യാഘാതങ്ങൾ

കോർപ്പറേറ്റ് ലാഭക്ഷമത: അസംസ്‌കൃത വസ്തുക്കളുടെ ചെലവ് വർധിക്കുന്നത് കമ്പനികളുടെ പ്രവർത്തന ലാഭം (Operating Margin) കുറയ്ക്കും.

കറണ്ട് അക്കൗണ്ട് കമ്മി: ഇറക്കുമതി ബില്ല് കൂടുന്നത് രാജ്യത്തെ കറണ്ട് അക്കൗണ്ട് കമ്മി ഉയരാനിടയാക്കും.

രൂപയുടെ മൂല്യത്തകർച്ച: കൂടുതൽ ഡോളർ ഇറക്കുമതിക്കായി മാറ്റിവെക്കേണ്ടി വരുന്നത് കറൻസി മൂല്യത്തെ ബാധിക്കുന്നു.

എണ്ണവില ബാരലിന് 126 ഡോളർ വരെ ഉയർന്ന സാഹചര്യത്തിലും ഇന്ത്യൻ വിപണി തകർച്ച നേരിടാത്തത് നിക്ഷേപകർക്ക് സമ്പദ്വ്യവസ്ഥയിലുള്ള വിശ്വാസത്തെയാണ് സൂചിപ്പിക്കുന്നത്. എങ്കിലും, എണ്ണവിലയിലെ വർധന നടപ്പു സാമ്പത്തിക വർഷത്തെ ഒന്നാം പാദത്തിലെയും രണ്ടാം പാദത്തിലെയും കോർപ്പറേറ്റ് വരുമാനത്തെ പ്രതികൂലമായി ബാധിക്കാൻ സാധ്യതയുണ്ട്. അതായത് ഉയർന്ന എണ്ണവില സാമ്പത്തിക വീണ്ടെടുപ്പിനെ താമസിപ്പിച്ചേക്കാം എന്നതല്ലാതെ വളർച്ചയെ തകിടം മറിക്കാൻ സാധ്യതയില്ല എന്നതാണ്.

വിപണി മൂല്യനിർണയവും കോർപ്പറേറ്റ് വരുമാനവും

വിപണിയിലെ ചാഞ്ചാട്ടങ്ങൾക്കിടയിലും മൂല്യനിർണയത്തിൽ വന്ന യുക്തിസഹമായ ക്രമീകരണങ്ങൾ ദീർഘകാല നിക്ഷേപകർക്ക് അനുകൂലമായ സാഹചര്യം ഒരുക്കിയിട്ടുണ്ട്.

പി.ഇ (PE) അനുപാതം: നിഫ്റ്റിയുടെ ഒരു വർഷ ഫോർവേഡ് പി.ഇ അനുപാതം ഇപ്പോൾ 18.5 മടങ്ങാണ്. ഇത് കഴിഞ്ഞ അഞ്ചുവർഷത്തെ ശരാശരിയേക്കാൾ താഴ്ന്ന നിലയിലാണെന്നത് വിപണിയുടെ സുരക്ഷിതത്വത്തെ സൂചിപ്പിക്കുന്നു.

ലാഭ വളർച്ച: നിഫ്റ്റി 500 സൂചികയിലെ 119 കമ്പനികൾ വാർഷികാടിസ്ഥാനത്തിൽ 12 ശതമാനം ലാഭ വളർച്ച രേഖപ്പെടുത്തിയിട്ടുണ്ട്. ഇത് സമീപ പാദങ്ങളിലെ ഏറ്റവും മികച്ച നിരക്കാണ്.

നടപ്പു സാമ്പത്തിക വർഷത്തെ കോർപ്പറേറ്റ് വരുമാന പ്രതീക്ഷകളിൽ (Earnings expectations) മുൻപത്തെക്കാൾ നേരിയ കുറവുണ്ടായിട്ടുണ്ട് എന്നകാര്യം ശ്രദ്ധിക്കണം.

വിവിധ സെക്ടറുകളുടെ പ്രകടനം

ബാങ്കിംഗ് & ഫിനാൻസ്: പ്രകടനം സമ്മിശ്രമാണ്. അറ്റ പലിശ വരുമാനത്തിൽ (Net Interest Income) നേരിയ ഇടിവുണ്ടായെങ്കിലും വായ്പാ വളർച്ച ശക്തമായി തുടരുന്നത് ആശ്വാസകരമാണ്. മികച്ച ധനസ്ഥിതിയും സുസ്ഥിരമായ ലാഭക്ഷമതയും മുൻനിർത്തി വലിയ സ്വകാര്യ ബാങ്കുകൾ ഇപ്പോഴും മികച്ച നിക്ഷേപ സാധ്യതയായി തുടരുന്നു.

ഐടി: ആഗോള അനിശ്ചിതത്വങ്ങളും വിദേശ ക്ലയന്റുകളുടെ ജാഗ്രതയോടുള്ള ചെലവാക്കലും ഐടി മേഖലയുടെ വളർച്ചാ സാധ്യതകളെ താൽക്കാലികമായി മന്ദീഭവിപ്പിച്ചിട്ടുണ്ട്. അതിനാൽ, ഹ്രസ്വകാലയളവിൽ വലിയ കുതിപ്പ് പ്രതീക്ഷിക്കാതെ, മികച്ച കമ്പനികളുടെ ഓഹരികൾ സാവകാശം സമാഹരിക്കുന്ന തന്ത്രമാണ് ഇവിടെ ഉചിതം.

മെറ്റൽസ് & എനർജി: ആഗോള വിതരണ ശൃംഖലയിലെ തടസം കാരണം മെറ്റൽ ഓഹരികൾ മികച്ച നേട്ടമുണ്ടാക്കി. എന്നാൽ, ഉയർന്ന ക്രൂഡോയിൽ വില ഓയിൽ റിഫൈനറികളുടെയും വിതരണ കമ്പനികളുടെയും ലാഭവിഹിതത്തെ സാരമായി ബാധിച്ചു.

ഓട്ടോമൊബൈൽ, എഫ്എംസിജി & ക്യാപിറ്റൽ ഗുഡ്സ്: ആഭ്യന്തര ഡിമാൻഡിലുണ്ടായ വർധന ഈ മേഖലകളെ ഉത്തേജിപ്പിച്ചിട്ടുണ്ട്. ഉത്പാദന മേഖലയിലും ഉപഭോക്തൃ കേന്ദ്രീകൃത ഓഹരികളിലും ആഭ്യന്തര നിക്ഷേപകരുടെ ശക്തമായ പങ്കാളിത്തം പ്രകടമാണ്.

ആഗോള വെല്ലുവിളികൾ

വിപണിയുടെ ആഭ്യന്തര അടിത്തറ ഭദ്രമാണെങ്കിലും, ആഗോള ഘടകങ്ങൾ മൂലധന ചോർച്ചയ്ക്ക് കാരണമാകുന്നുണ്ട്. അമേരിക്കൻ ഫെഡറൽ റിസർവ് പലിശ നിരക്കുകൾ കുറയ്ക്കാത്തതും ജപ്പാൻ ബോണ്ട് യീൽഡിലുണ്ടാകുന്ന തുടർച്ചയായ വർധനവും ഇന്ത്യയുൾപ്പെടെയുള്ള വളരുന്ന വിപണികളിൽ നിന്ന് നിക്ഷേപം പിൻവലിക്കാൻ ആഗോള ഫണ്ടുകളെ പ്രേരിപ്പിക്കുന്നു. ഹോർമുസ് കടലിടുക്കിലെ സംഘർഷങ്ങൾ വിതരണ ശൃംഖലയിൽ സൃഷ്ടിക്കുന്ന തടസ്സങ്ങളും കറൻസി മൂല്യശോഷണവും നിക്ഷേപകർ ജാഗ്രതയോടെ വീക്ഷിക്കേണ്ട ഘടകങ്ങളാണ്.

വിപണി സാധ്യതകൾ

വരുന്ന മാസങ്ങളിൽ വിപണി പ്രത്യേക പരിധിയിൽ തുടരാനാണ് സാധ്യതയെന്ന് അടിസ്ഥാന നിഗമനങ്ങൾ സൂചിപ്പിക്കുന്നു. നിഫ്റ്റി സൂചിക 23,500 നും 24,500 നും ഇടയിൽ വ്യാപാരം നടത്താനാണ് കൂടുതൽ സാധ്യത.

നിലവിലെ സാഹചര്യത്തിൽ വിപണിയിൽ ശരാശരി 8 മുതൽ 12 ശതമാനം വരെ വരുമാന വളർച്ച പ്രതീക്ഷിക്കാം. എന്നാൽ ഇത് ക്രൂഡോയിൽ വിലയിലെ സ്ഥിരതയെയും ആഗോള രാഷ്ട്രീയ സംഘർഷങ്ങളുടെ ലഘൂകരണത്തെയും ആശ്രയിച്ചിരിക്കും. വിപണി ചെറിയ തോതിൽ മുന്നേറുമ്പോൾ തന്നെ ലാഭമെടുക്കാനുള്ള പ്രവണത നിക്ഷേപകർക്കിടയിൽ പ്രകടമായേക്കാം.

നടപ്പു സാമ്പത്തിക വർഷത്തെ വരുമാന പ്രതീക്ഷകളിൽ നേരിയ കുറവുണ്ടെങ്കിലും ആഗോള പ്രക്ഷോഭങ്ങളെ ചെറുക്കാനുള്ള ആഭ്യന്തര കരുത്ത് വിപണിക്ക് പ്രതീക്ഷ നൽകുന്നു. അച്ചടക്കത്തോടെയുള്ള പോർട്ട്ഫോളിയോ നിർമാണത്തിനും ദീർഘകാല നിക്ഷേപത്തിനും അനുയോജ്യമായ സമയമാണിത്.