ഇത്തവണ ഫെഡ് നിരക്ക് കുറച്ചേക്കുമെന്ന് പ്രതീക്ഷിച്ചിരുന്നുവെങ്കിലും അര ശതമാനം താഴ്ത്തിയത് നിക്ഷേപ ലോകത്തിന് വലിയ സൂചനയാണ് നല്‍കുന്നത്. ഫെഡ് മേധാവി ജെറോം പവല്‍ നിരക്ക് കുറയ്ക്കലിന്റെ ട്രാക്കിലേക്ക് മാറിക്കഴിഞ്ഞു. ഈ വര്‍ഷംതന്നെ അര ശതമാനംകൂടി കുറച്ചേക്കുമെന്നും വിലയിരുത്തലുകള്‍ വരുന്നു.
2020ന് ശേഷം ഇതാദ്യമായാണ് അമേരിക്കന്‍ കേന്ദ്ര ബാങ്ക് നിരക്ക് കുറയ്ക്കാന്‍ തയ്യാറാകുന്നത്. 4.75-5 ശതമാനം എന്ന ഉയര്‍ന്ന നിരക്കിന്റെ കാലം 14 മാസമായിരുന്നു. സമാനതകളില്ലാത്ത തീരുമാനങ്ങളിലൂടെ ശ്രദ്ധേയനായ പവല്‍ നിരക്ക് കുറയ്ക്കലിന്റെ തുടര്‍ നീക്കങ്ങള്‍ക്കായിരിക്കും ഇനി ശ്രദ്ധ കൊടുക്കുക.
എങ്ങനെ നേട്ടമാക്കാം
നിരക്ക് കുറയ്ക്കല്‍ രാജ്യത്തെ വിപണിയിലേയ്ക്ക് വിദേശ നിക്ഷേപം ഒഴുകാനുള്ള സാഹചര്യമൊരുക്കും. യുഎസിലെ കടപ്പത്ര ആദായം ആകര്‍ഷകമല്ലാതാകുന്നതോടെ വന്‍കിടക്കാര്‍ ഇന്ത്യ പോലുള്ള വികസ്വര വിപണികള്‍ ലക്ഷ്യമിടുമെന്ന കാര്യത്തില്‍ സംശയമില്ല.
വിദേശികള്‍ വരുമ്പോള്‍, ചെറുകിട ഓഹരികള്‍ക്കാവില്ല നേട്ടം. അവര്‍ ലക്ഷ്യംവെയ്ക്കുന്നത് വന്‍കിട കമ്പനികളിലാണ്. ബുധനാഴ്ചയിലെ നിരക്ക് കുറയ്ക്കല്‍ ആദ്യം നേട്ടമാക്കിയത് വന്‍കിട ഓഹരികള്‍ തിങ്ങിനിറഞ്ഞ സെന്‍സെക്‌സും നിഫ്റ്റിയുമാണെന്നകാര്യം ഓര്‍ക്കണം. മിഡ്, സ്‌മോള്‍, മൈക്രോ ക്യാപ് ഓഹരികളില്‍ പലതും വില്പന സമ്മര്‍ദം നേരിട്ടത് കാണാതെ പോകരുത്.
ഏറെക്കാലം കുതിപ്പിന്റെ പാതയിലായിരുന്ന പൊതുമേഖല ഓഹരികള്‍ നഷ്ടക്കണക്കുകള്‍ പറഞ്ഞുതുടങ്ങി. നിക്ഷേപകര്‍ക്ക് വന്‍തോതില്‍ നേട്ടം സമ്മാനിച്ച ഇടത്തരം ചെറുകിട ഓഹരികള്‍ ചുവപ്പ് രാശിയിലാണ്. വ്യാഴാഴ്ച വിശാല വിപണിയില്‍ കുതിപ്പുണ്ടായെങ്കിലും ബിഎസ്ഇയില്‍ ലിസ്റ്റ് ചെയ്ത മൊത്തം ഓഹരികളുടെ വിപണി മൂല്യത്തില്‍ മൂന്ന് ലക്ഷം കോടി രൂപയുടെ കുറവുണ്ടായത് ഒരു സൂചനയാണ്.
ഗുണമേന്മതന്നെ പ്രധാനം
വിപണി ഒരു ആവൃത്തി പിന്നിടുകയാണ്. നേട്ടം സമ്മാനിക്കുന്ന സെക്ടറുകളില്‍ മാറ്റമുണ്ടാകുന്നു. മൂല്യത്തേക്കാള്‍ ഗുണനിലവാരമുള്ള ഓഹരികലിലേക്കുള്ള മാറ്റം പ്രകടമായി തുടങ്ങി. വന്‍കിട ഓഹരികളിലെ വിദേശ നിക്ഷേപകരുടെ താത്പര്യം ഈ മാറ്റത്തെ അതിവേഗം ചലിപ്പിച്ചേക്കാം. പല വന്‍കിട ഓഹരികളും ന്യായമായ വിലയില്‍ ഇപ്പോള്‍ ലഭ്യമാണ്. കുറഞ്ഞ വിലയില്‍ ഗുണമേന്മയുള്ള ഓഹരികള്‍ തേടിയാണ് അവര്‍ പലപ്പോഴും വരുന്നത്. നാട്ടിലെ റീട്ടെയിലുകാര്‍ക്കാണെങ്കില്‍ കുതിക്കുന്ന ഓഹരികളുടെ പിന്നാലെ ഓടാനാണ് താത്പര്യം.
രണ്ടുമാസത്തെ ചലനം നിരീക്ഷിച്ചാല്‍ ഇടത്തരം ചെറുകിട ഓഹരികളിലെ കിതപ്പ് പ്രകടമാകും. വന്‍കിട സ്വകാര്യ ബാങ്കുകള്‍, ടെലികോം, ഉപഭോഗം, ഐടി, ഫാര്‍മ എന്നീ മേഖലകളാകും ഈ കാലയളവില്‍ പ്രതിരോധം തീര്‍ക്കുക.
ഇപ്പോള്‍ നിരക്ക് കുറച്ചത് ഫെഡ് ആണ്. പണപ്പെരുപ്പം വരുതിയിലാകുന്നതോടെ റിസര്‍വ് ബാങ്കും അതിന് പിന്നാലെയാകും. അധികകാലം കാത്തിരിക്കേണ്ടിവരില്ല. മുമ്പെ പറക്കുന്ന പക്ഷിയാണ് എപ്പോഴും യുഎസ്. അതുകൊണ്ടുതന്നെ ആഗോളതലത്തിലുള്ള നിരക്ക് കുറയ്ക്കലിന്റെ വാതില്‍ തുറന്നുകഴിഞ്ഞു. ഈ വര്‍ഷം അവസാനത്തോടെയോ അടുത്ത വര്‍ഷം തുടക്കത്തിലോ രാജ്യത്ത് കാല്‍ ശതമാനമെങ്കിലും നിരക്ക് താഴ്ത്തിയാല്‍ അത്ഭുതപ്പെടാനില്ല.
Content Highlights: The recent Fed rate cut signals a shift towards easing monetary policy, potentially impacting India
Published: 19 Sept 2024, 04:24 pm IST
ABOUT THE AUTHOR
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented