65 വയസ്സിന് മുകളിലുള്ള മുതിര്‍ന്ന പൗരന്മാര്‍ക്കുകൂടി ആരോഗ്യ പരിരക്ഷ ഏര്‍പ്പെടുത്തുന്നത് ഉള്‍പ്പടെ നിരവധി പരിഷ്‌കാരങ്ങളാണ് രാജ്യത്തെ ഇന്‍ഷുറന്‍സ് റെഗുലേറ്ററായ ഐആര്‍ഡിഎഐ ഈയിടെ പ്രഖ്യാപിച്ചത്. ഇതോടെ പ്രായ വ്യത്യാസമില്ലാതെ ലളിതമായി ഹെല്‍ത്ത് ഇന്‍ഷുറന്‍സ് എടുക്കാനുള്ള അവസരമൊരുങ്ങി.
65 വയസ്സുവരെയുള്ളവര്‍ക്കു മാത്രമെ നേരത്തെ ഹെല്‍ത്ത് ഇന്‍ഷുറന്‍സില്‍ ചേരാന്‍ കഴിയുമായിരുന്നുള്ളൂ. അതായത് ആരോഗ്യ പരിരക്ഷ ലഭിക്കാനുള്ള പ്രവേശന പ്രായം 65 വയസ്സായി നിശ്ചയിച്ചിരുന്നു. 65ന് മുകളിലുള്ളവര്‍ക്ക് ഇന്‍ഷുറന്‍സ് അനുവദിക്കണമോയെന്ന കാര്യത്തില്‍ നേരത്തെ കമ്പനികള്‍ക്ക് തീരുമാനമെടുക്കാമായിരുന്നു. ഇപ്പോഴിത് നിര്‍ബന്ധ വ്യവസ്ഥയായി. മുതിര്‍ന്ന പൗരന്മാര്‍ക്ക് ആരോഗ്യ ഇന്‍ഷുറന്‍സ് നല്‍കുന്നുണ്ടെങ്കിലും നിയന്ത്രണങ്ങളും ഉപാധികളും ഏറെയുണ്ടായിരുന്നു. കോ-പേയ്‌മെന്റ് ഉള്‍പ്പടെ. അതുകൊണ്ടുതന്നെ പരിരക്ഷ പലപ്പോഴും നാമമാത്രമാകുന്ന സാഹചര്യവുമുണ്ടായി. ഈ വ്യവസ്ഥകളില്‍ ഇനി മാറ്റംവന്നേക്കാം.
പ്രീമിയം കൂടുമോ?
മുതിര്‍ന്ന പൗരന്മാര്‍ക്ക് താരതമ്യേന ഉയര്‍ന്ന പ്രീമിയമാണ് ഇന്‍ഷുറന്‍സ് കമ്പനികള്‍ ഈടാക്കിവരുന്നത്. നിലവില്‍ നിശ്ചിത രോഗങ്ങള്‍ ഇല്ലാത്ത 65 വയസ്സുള്ള ഒരാള്‍ക്ക് 10 ലക്ഷം രൂപയുടെ പരിരക്ഷയ്ക്കായി 50,000 രൂപവരെ പ്രീമിയമിനത്തില്‍ നല്‍കേണ്ടിവന്നേക്കാമെന്നാണ് ഈ മേഖലയില്‍നിന്നുള്ളവര്‍ പറയുന്നത്. ഇതേ കവറേജിനായി 55 വയസ്സുള്ളയാള്‍ക്ക് 25,000 മുതല്‍ 30,000 രൂപവരെയാണ് നല്‍കേണ്ടിവരുന്നത്.
കാത്തിരിപ്പ് സമയം കുറച്ചു
നിലവിലുള്ള രോഗങ്ങള്‍ക്ക് ബാധകമായ കാത്തിരിപ്പ് കാലയളവ് നാല് വര്‍ഷത്തില്‍നിന്ന് മൂന്നു വര്‍ഷമായി കുറയ്ക്കുകയും ചെയ്തിട്ടുണ്ട്. ചില ഇന്‍ഷുറന്‍സ് കമ്പനികള്‍ ഇതിലും കുറഞ്ഞ(12 മാസം മുതല്‍ 24 മാസംവരെ)കാലയളവും വാഗ്ദാനം ചെയ്യുന്നുണ്ട്. വ്യവസ്ഥകള്‍ ലഘൂകരിക്കുമ്പോള്‍ പ്രീമിയമിനത്തില്‍ കൂടിയ തുക നല്‍കാന്‍ പോളിസി ഉടമ ബാധ്യസ്ഥനാകുന്ന സാഹചര്യമുണ്ടായിരുന്നു.
തുടര്‍ച്ചയായി അഞ്ച് വര്‍ഷത്തെ കവറേജിന് ശേഷം ഒരുകാരണവശാലും ക്ലെയിം നിരസിക്കാന്‍ പാടില്ലെന്നും ഇന്‍ഷുറന്‍സ് റെഗുലേറ്റര്‍ കമ്പനികള്‍ക്ക് നിര്‍ദേശം നല്‍കിയിട്ടുണ്ട്. നേരത്തെ എട്ടു വര്‍ഷമായിരുന്നു(മോറട്ടോറിയം)പരിധി.
നിലവിലുള്ളവര്‍ക്ക് ബാധകമാകുമോ?
കാത്തിരിപ്പ് കാലയളവിലെ ഇളവ് പുതിയ പോളിസികള്‍ക്കു പുറമെ നിലവിലുള്ളവര്‍ക്കും ബാധകമാണ്. അതുകൊണ്ടുതന്നെ നിലവിലുള്ള പോളിസി ഉമടകളുടെ കാത്തിരിപ്പ് കാലാവധി ഗണ്യമായി കുറയും. കൂടുതല്‍ പേരിലേയ്ക്ക് ആരോഗ്യ ഇന്‍ഷുറന്‍സ് എത്തിക്കുന്നതിന്റെ ഭാഗമായാണ് ഇന്‍ഷുറന്‍സ് റെഗുലേറ്ററി അതോറിറ്റി പരിഷ്‌കാരങ്ങള്‍ പ്രഖ്യാപിച്ചത്.
വ്യവസ്ഥകള്‍ ചുരുക്കത്തില്‍:
Content Highlights: Health Insurance Now Available for Individuals Over 65: Reduced Waiting Period
Published: 24 Apr 2024, 01:22 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented