ചെറുകിട നിക്ഷേപകരുടെ വിപണി പങ്കാളിത്തം വര്‍ധിപ്പിക്കുന്നതിനും എംപ്ലോയീ സ്റ്റോക്ക് ഓപ്ഷനുകളുടെ (ESOPs) ഉപയോഗം മെച്ചപ്പെടുത്തുന്നതിനുമായി കമ്പനി നിയമം ഭേദഗതി ചെയ്‌തേക്കും. 'ഫ്രാക്ഷണല്‍ ഓഹരികള്‍'ക്ക് നിയമപരമായ അംഗീകാരം നല്‍കാനും കോര്‍പ്പറേറ്റ് നിയമ (ഭേദഗതി) ബില്‍ വ്യവസ്ഥ ചെയ്യുന്നു. പാര്‍ലമെന്റിന്റെ ശൈത്യകാല സമ്മേളനത്തില്‍ ബില്‍ അവതരിപ്പിച്ചേക്കുമെന്നാണ് റിപ്പോര്‍ട്ടുകള്‍.
റെസ്ട്രിക്റ്റഡ് സ്റ്റോക്ക് യൂണിറ്റുകള്‍ (RSUs), സ്റ്റോക്ക് അപ്രീസിയേഷന്‍ റൈറ്റ്സ് (SARs) പോലുള്ള ജീവനക്കാരുടെ ആനുകൂല്യ പദ്ധതികള്‍ക്ക് അംഗീകാരം നല്‍കാനും നിര്‍ദ്ദേശമുണ്ട്. ചെറുകിട നിക്ഷേപകര്‍ക്ക് ഉയര്‍ന്ന വിലയുള്ള ഓഹരികള്‍ ലഭ്യമാക്കാനും ഇന്ത്യയുടെ കമ്പനി നിയമ ചട്ടക്കൂടിനെ വികസിത വിപണികളുമായി ഒരുമിപ്പിക്കാനും ഈ ഭേദഗതികള്‍ സഹായിക്കുമെന്നാണ് വിലയിരുത്തല്‍.
ഫ്രാക്ഷണല്‍ ഓഹരി
ഓഹരി പല അംശങ്ങളായി വീതിച്ച് നിക്ഷേപം നടത്താനുള്ള അവസരമാണ് ഫ്രാക്ഷണല്‍ ഷെയര്‍ അനുവദിക്കുന്നതിലൂടെ ലഭിക്കുക. അതായത് ഓഹരിയുടെ വില 100 രൂപയാണെങ്കില്‍ 10 രൂപ മുടക്കിയാല്‍ 0.10 ശതമാനം നിക്ഷേപം നടത്താം. റീട്ടെയില്‍ നിക്ഷേപകരുടെ പങ്കാളിത്തം വര്‍ധിപ്പിക്കുന്നതിനുള്ള പ്രധാന ചുവടുവെപ്പായി ഇതിനെ കാണാം. ഉയര്‍ന്ന മൂല്യമുള്ള ഓഹരികളുടെ ഇടപാട് വര്‍ധിപ്പിക്കാനും അതിലൂടെ ലിക്വിഡിറ്റി കൂട്ടാനും പുതിയ വ്യവസ്ഥകള്‍ ഉപകരിക്കും.
ചില കമ്പനികള്‍ നിലവില്‍ ഇത്തരത്തില്‍ ഓഹരികള്‍ കൈമാറാറുണ്ടെങ്കിലും കമ്പനീസ് ആക്ട് പ്രകാരം അനുമതിയില്ല. ഇത്തരം സാഹചര്യത്തില്‍ കമ്പനി ബോര്‍ഡ് നിയമിക്കുന്ന ട്രസ്റ്റിയാകും ഈ ഓഹരികള്‍ കൈവശം വെക്കുക. ട്രസ്റ്റി ഈ ഓഹരികള്‍ അനുയോജ്യമായ സമയത്ത് വിപണിയില്‍ വിറ്റ് തുക ഓഹരിയുടമകള്‍ക്ക് വിതരണം ചെയ്യും.
പുതിയ വ്യവസ്ഥ പ്രാബല്യത്തിലായാല്‍ കമ്പനികള്‍ക്ക് ഫ്രാക്ഷണല്‍ ഓഹരികള്‍ കൈവശംവെക്കാനും പുതിയതായി പുറത്തിറക്കാനും അനുമതി ലഭിക്കും. ലിസ്റ്റ് ചെയ്ത കമ്പനിയുടെ കാര്യത്തില്‍ സെബിയുമായി ചര്‍ച്ചചെയ്താകും തീരുമാനമെടുക്കുക.
നിലവില്‍ യുഎസ്, ജപ്പാന്‍, കാനഡ തുടങ്ങിയ രാജ്യങ്ങളിലും ഗിഫ്റ്റ് സിറ്റിയിലെ എന്‍എസ്ഇ ഐ.എഫ്.എസ്.എസ്.സി എക്‌സ്‌ചേഞ്ചിലും ഫ്രാക്ഷണല്‍ ഓഹരികളുടെ വ്യാപാരം നടക്കുന്നുണ്ട്.
|
|
|
| ഫ്രാക്ഷണൽ ഷെയറുകൾ (Fractional Shares) | ഓഹരികളെ ചെറിയ യൂണിറ്റുകളായി വിഭജിക്കുന്നത്. ഉയർന്ന വിലയുള്ള ഓഹരികൾ ചെറുകിട നിക്ഷേപകർക്ക് ലഭ്യമാക്കാൻ സഹായിക്കുന്നു. |
| കോർപ്പറേറ്റ് നിയമ (ഭേദഗതി) ബിൽ | ഫ്രാക്ഷണൽ ഷെയറുകൾക്ക് നിയമപരമായ അംഗീകാരം നൽകുന്നതിനും ജീവനക്കാരുടെ ആനുകൂല്യ പദ്ധതികൾ മെച്ചപ്പെടുത്തുന്നതിനും വേണ്ടി കമ്പനി നിയമത്തിൽ ഭേദഗതികൾ നിർദ്ദേശിക്കുന്ന ബിൽ. |
| റെസ്ട്രിക്റ്റഡ് സ്റ്റോക്ക് യൂണിറ്റുകൾ (RSUs) | നിശ്ചിത കാലയളവിനും വ്യവസ്ഥകൾക്കും ബാധകമായി ജീവനക്കാര്ക്ക് കമ്പനി നല്‍കുന്ന ഓഹരി. |
| സ്റ്റോക്ക് അപ്രീസിയേഷൻ റൈറ്റ്സ് (SARs) | ഓഹരി വാങ്ങാതെ തന്നെ കമ്പനിയുടെ ഓഹരി വിലയിലുണ്ടാകുന്ന വര്‍ധനവിന് തുല്യമായ തുക പണമായി ലഭിക്കാന്‍ ജീവക്കാര്‍ക്ക് അവകാശം നല്‍കുന്ന ഒരുതരം ഇക്വിറ്റി കോമ്പന്‍സേഷന്‍. |
| എംപ്ലോയീ സ്റ്റോക്ക് ഓപ്ഷനുകൾ (ESOPs) | കമ്പനിയുടെ ഓഹരികൾ നിശ്ചിത വിലയ്ക്ക് വാങ്ങാൻ ജീവനക്കാര്ക്ക് അവകാശം നൽകുന്ന ആനുകൂല്യ പദ്ധതി. |
| സ്വെറ്റ് ഇക്വിറ്റി ഷെയറുകൾ (Sweat Equity Shares) | ജീവനക്കാർക്കോ ഡയറക്ടർമാർക്കോ അവരുടെ സംഭാവനകൾക്ക് പകരമായി ഇളവുകളോടെ നൽകുന്ന ഓഹരി. |
| വെസ്റ്റിംഗ് പിരീഡ് (Vesting Period) | ജീവനക്കാരന് സ്റ്റോക്ക് ഓപ്ഷനുകളിലോ മറ്റ് ആനുകൂല്യങ്ങളിലോ അവകാശം ലഭിക്കുന്നതിന് മുമ്പ് പൂർത്തിയാക്കേണ്ട സേവന കാലയളവ്. |
Content Highlights: India`s Companies Act may soon allow fractional share trading and improve ESOPs. Discover how this could boost small investors and align with global markets.
Published: 01 Dec 2025, 02:25 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented