വിപണിയിൽ മികച്ച തുടക്കത്തോടെ ആന്ത്രോപിക്കിന്റെ അരങ്ങേറ്റം. വ്യാപാരം ആരംഭിച്ച് നിമിഷങ്ങൾക്കകം കമ്പനിയുടെ വിപണിമൂല്യം രണ്ടുലക്ഷം കോടി ഡോളറിന് മുകളിലെത്തി. 17.07 ശതമാനം നേട്ടത്തോടെ 97.17 ഡോളറിലെത്തി ഓഹരിവില. വ്യാപാരം അവസാനിക്കുമ്പോൾ മൂല്യം 1.76 ലക്ഷം കോടി ഡോളറിൽ സ്ഥിരതയാർജിച്ചു.

To advertise here,

വിപണി വിവരങ്ങൾ

സൂചിക

വിവരങ്ങൾ

വിപണി / ടിക്കർ

നാസ്ഡാക് / ANT

ഐപിഒ ഓഫർ വില

$83

ഓപ്പണിംഗ് വില

$111.50

(30%-ലധികം

വർധന)

ഇൻട്രാഡേ

ഉയർന്ന വില

$115.10

ക്ലോസിംഗ് വില

$97.17 (17.07%

വർധന)

അന്തിമ വിപണി

മൂല്യം

$1.76 ട്രില്യൺ

(ഹ്രസ്വനേരത്തേക്ക് $2

ട്രില്യൺ കടന്നു)

ആസ്ഥാനം

സാൻ ഫ്രാൻസിസ്കോ

സ്പേസ് എക്സിനെയും മറികടന്ന ഐ.പി.ഒ.

ആഗോള മൂലധനവിപണികളുടെ ചരിത്രം തിരുത്തിയെഴുതിയ സാമ്പത്തികസമാഹരണത്തിനാണ് ആന്ത്രോപിക് സാക്ഷ്യംവഹിച്ചത്.

ഐ.പി.ഒ. വഴി ചരിത്രത്തിലെ ഏറ്റവും ഉയർന്ന തുകയായ 8,131 കോടി ഡോളറാണ് (81.31 ബില്യൺ ഡോളർ) ആന്ത്രോപിക് വിപണിയിൽനിന്ന് സമാഹരിച്ചത്. കമ്പനിയുടെ പുതിയ ഓഹരികളും ആദ്യകാല നിക്ഷേപകരുടെയും നിലവിലുള്ള ഓഹരിയുടമകളുടെയും വിഹിതവും ഉൾപ്പെടെ 98 കോടി ഓഹരികളാണ് പൊതുവിപണിയിൽ വിൽപ്പനയ്ക്കെത്തിയത്. വൻകിട-ചെറുകിട നിക്ഷേപകരുടെ ശക്തമായ പങ്കാളിത്തം മുൻനിർത്തി, തുടക്കത്തിൽ നിശ്ചയിച്ചിരുന്ന 70 മുതൽ 78 ഡോളർ വരെയുള്ള വിലപരിധി മറികടന്ന് ഓഹരിയൊന്നിന് 83 ഡോളറിലാണ് ഐ.പി.ഒ. ഓഫർവില അന്തിമമായി തീരുമാനിച്ചത്.

കഴിഞ്ഞ ജൂണിൽ 7,500 കോടി ഡോളർ സമാഹരിച്ച് റെക്കോഡിട്ട ഇലോൺ മസ്കിന്റെ സ്പേസ് എക്സിനെ മറികടന്നാണ് ആന്ത്രോപിക് നേട്ടം സ്വന്തമാക്കിയത്.

പണപ്പെരുപ്പ ആശങ്കകളും എ.ഐ. കമ്പനികളുടെ വൻതോതിലുള്ള ഫണ്ടിങ് ആവശ്യങ്ങളും കാരണം വായ്പയെടുപ്പ് ചെലവേറിയ സാഹചര്യമാണ്. ഉയർന്ന പലിശഭാരമുള്ള കടപ്പത്രങ്ങളെയും ബാങ്ക് കടങ്ങളെയും ആശ്രയിക്കുന്നത് കുറയ്ക്കാൻ പൊതുവിപണിയിൽനിന്നുള്ള മൂലധനസമാഹരണം സഹായിക്കും.

സാമ്പത്തിക വെല്ലുവിളികൾ

ആന്ത്രോപിക് വിപണിയിൽ നേടിയിരിക്കുന്ന ലക്ഷം കോടി ഡോളർ മൂല്യനിർണയവും കമ്പനി നിലവിൽ നേരിടുന്ന കടുത്ത സാമ്പത്തിക ബാധ്യതകളും തമ്മിൽ ശ്രദ്ധേയമായ വൈരുധ്യമുണ്ട്. നിലവിലെ ഔദ്യോഗിക അക്കൗണ്ടിങ് മാനദണ്ഡങ്ങൾ പ്രകാരം ലാഭത്തിലല്ലാത്ത കമ്പനിക്ക് ഭാവിയിൽ അടിസ്ഥാനസൗകര്യങ്ങൾക്കായി ഭീമമായ തുക ചെലവഴിക്കേണ്ടതുണ്ട്.

ധനകാര്യ റിപ്പോർട്ടുകൾ പ്രകാരം കമ്പനിക്ക് നിലവിൽ 620 കോടി ഡോളറിന്റെ കടബാധ്യതയുണ്ട്. ഇതിനെ 'വലിയ ബാധ്യത' എന്നാണ് കമ്പനി വിശേഷിപ്പിച്ചിരിക്കുന്നത്. ആന്ത്രോപിക് ഇതുവരെ ലാഭക്ഷമത കൈവരിച്ചിട്ടുമില്ല.

കംപ്യൂട്ടിങ് ശേഷിക്കും ഡേറ്റ സെന്റർ അടിസ്ഥാനസൗകര്യങ്ങൾക്കുമായി വരുംവർഷങ്ങളിൽ ഏകദേശം 90,000 കോടി ഡോളറിന്റെ പാട്ടക്കരാറുകളിലും മറ്റ് ദീർഘകാല നിക്ഷേപങ്ങളിലുമാണ് കമ്പനി ഒപ്പുവെച്ചിരിക്കുന്നത്. ഇതിൽത്തന്നെ അടുത്ത 12 മാസത്തിനുള്ളിൽ 7,000 കോടി ഡോളർ നേരിട്ട് ചെലവഴിക്കേണ്ടതുണ്ട്. കമ്പനിയുടെ പക്കൽ നിലവിൽ വൻതോതിൽ പണശേഖരമുണ്ടെങ്കിലും ഭാവിയിൽ പ്രവർത്തനങ്ങളിൽനിന്നുള്ള വരുമാനവർധനയോ അധിക ഫണ്ട് സമാഹരണമോ സാധ്യമായില്ലെങ്കിൽ ഈ ചെലവുകൾ കമ്പനിയുടെ സാമ്പത്തികഭദ്രതയ്ക്ക് മേൽ കടുത്ത സമ്മർദം ചെലുത്തിയേക്കാം.