
ന്യൂഡൽഹി: കോവിഡ്-19 മഹാമാരിയുണ്ടാക്കിയിരിക്കുന്ന ആഗോളസാഹചര്യം തൊണ്ണൂറുകളുടെ ആദ്യം ബംഗ്ലാദേശിൽ പൊട്ടിപ്പുറപ്പെട്ട കോളറയുടെ സമയത്ത് രോഗികളെ ചികിത്സിച്ച ദിവസങ്ങളെ ഓർമപ്പെടുത്തുന്നെന്ന് സാഹിത്യകാരി തസ്ലിമ നസ്രീൻ. എഴുത്തുകാരിയാകുംമുമ്പ് ഡോക്ടറായിരുന്ന തസ്ലിമ 1991-ൽ 8000 പേരുടെ ജീവനെടുത്ത കോളറയുടെ സമയത്ത് മൈമെൻസിങ്ങിലെ ആശുപത്രിയിൽ ഡോക്ടറായിരുന്നു. വിവാദ രചനകളുടെപേരിൽ ബംഗ്ലാദേശ് നാടുകടത്തിയ അവർ ഇപ്പോൾ സ്വീഡനിലാണു താമസം.
''അന്നു ഞാൻ ഡോക്ടറായിരുന്നു. അസ്വസ്ഥതയുണ്ടാക്കുമായിരുന്നതിനാൽ കൈയുറയിടാതെയാണ് ദിവസവും നൂറുകണക്കിനു രോഗികളെ നോക്കിയത്. ഭാഗ്യത്തിന് അണുബാധയുണ്ടായില്ല. ഈ കോവിഡ്-19 വളരെ അപകടകാരിയാണ്. അതിനാൽ, എല്ലാ മുൻകരുതലുമെടുക്കേണ്ടത് അത്യാവശ്യമാണ്''-വാർത്താ ഏജൻസിയായ പി.ടി.ഐ.യോട് അവർ പറഞ്ഞു.
''ലോകമെങ്ങും മടുപ്പില്ലാതെ ജോലി ചെയ്യുന്ന ആതുരസേവക സമൂഹത്തെക്കുറിച്ച് എനിക്കഭിമാനമാണ്. മനുഷ്യകുലത്തെ രക്ഷിക്കാനാണല്ലോ അവർ സ്വന്തം ജീവനുകൾ അപകടത്തിലാക്കുന്നത്''- തസ്ലിമ പറഞ്ഞു.
1984-ൽ മൈമെൻസിങ് മെഡിക്കൽ കോളേജിൽ നിന്നാണ് തസ്ലിമ വൈദ്യശാസ്ത്രത്തിൽ ബിരുദം നേടിയത്. രചനകൾ വിവാദമായതോടെ 1993-ൽ അവർക്ക് തൊഴിൽരംഗവും പിന്നീട് രാജ്യവും വിടേണ്ടിവന്നു. പ്രസിദ്ധീകരിക്കുംമുമ്പ് രചനകളെല്ലാം കാണിക്കണമെന്ന സർക്കാരിന്റെ ഉത്തരവിൽ പ്രതിഷേധിച്ചാണ് അവർ ഡോക്ടർജോലി രാജിവെച്ചത്.
മുസ്ലിം സമുദായത്തിന് ആധുനികവത്കരണവും പുരോഗമനവും ആവശ്യമായ സമയത്ത് അതിനെ പിന്നാക്കം വലിക്കുന്ന പ്രസ്ഥാനമായ തബ്ലീഗ് ജമാ അത്തിനെ നിരോധിക്കണമെന്ന് തസ്ലിമ പറഞ്ഞു.
ഇപ്പോൾ മുഴുവൻസമയ എഴുത്തുകാരിയായിക്കഴിയുന്ന തസ്ലിമയുടെ 'എന്റെ പെൺകുട്ടിക്കാല'വും 'ലജ്ജ'യുടെ മുന്നുരയായ 'ലജ്ജയില്ലാത്തവളും' ഈ സമയത്ത് വിൽപ്പനശാലകളിലെത്തേണ്ടതായിരുന്നു.
Content Highlights: Taslima Nasrin, Covid 19, Corona Virus
Published: 13 Apr 2020, 12:15 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..


Most Commented