മഴക്കാലത്ത് അച്ചാറുകള്‍ വേഗത്തില്‍ കേടാകുന്നുണ്ടോ? തയ്യാറാക്കുമ്പോള്‍ ഇക്കാര്യങ്ങള്‍ ശ്രദ്ധിക്കാം

മഴക്കാലത്ത് വീടിന്റെ ചുമരിലും വാതിലിലുമൊന്നും മാത്രമല്ല വീട്ടില്‍ തയ്യാറാക്കി വെച്ച ഭക്ഷണങ്ങളിലും പെട്ടെന്നു പൂപ്പല്‍ വരാറുണ്ട്. ദീര്‍ഘകാലത്തേക്ക് ഉപയോഗിക്കാനായി എടുത്തുവെക്കുന്ന ഉപ്പിലിട്ട മാങ്ങയും അച്ചാറും കൊണ്ടാട്ടങ്ങളുമെല്ലാം ഇതില്‍ പെടും. പ്രധാന ഭക്ഷണത്തോടൊപ്പം കഴിക്കാനായി മാറ്റിവെച്ച ഇത്തരം സാധനങ്ങള്‍ കേടായിപ്പോയാല്‍ അതൊരു വിഷമമുള്ള കാര്യംതന്നെയാണ്. 

പല സാധനങ്ങള്‍ ഉപയോഗിച്ചും തയ്യാറാക്കി വെക്കുന്ന അച്ചാറുകള്‍ പെട്ടെന്ന് കേടാകാതിരിക്കാന്‍ താഴെ പറയുന്ന കാര്യങ്ങള്‍ ശ്രദ്ധിക്കാം;

അച്ചാറിടുന്നതിന് മുന്‍പ് അതിനുപയോഗിക്കുന്ന സാധനങ്ങള്‍ പഴക്കം ചെന്നതല്ലെന്ന് ഉറപ്പുവരുത്തണം. എണ്ണ, മസാല,തുടങ്ങിയവ പഴക്കം ചെന്നതാണെങ്കില്‍ അച്ചാറിന്റെ രുചിയെ ബാധിക്കും. എണ്ണ തിരഞ്ഞെടുക്കുമ്പോള്‍ ശ്രദ്ധിക്കേണ്ടതുണ്ട്. എണ്ണ നല്ലതല്ലെങ്കില്‍ അച്ചാര്‍ വളരെ വേഗത്തില്‍ കേടുവരും.

കൃത്യമായി മിക്സ് ചെയ്താല്‍ മാത്രമേ എല്ലാ ചേരുവകളും ഒത്തുചേര്‍ന്ന സ്വാദിഷ്ഠമായ അച്ചാര്‍ ലഭിക്കുകയുള്ളൂ. അല്ലെങ്കില്‍ ഏതെങ്കിലും ഒരു ചേരുവയുടെ രുചി വേറിട്ട് അറിയുന്നവിധത്തിലാകും. ഇത് അച്ചാറിന്റെ രുചി നഷ്ടമാക്കും. അച്ചാറിടുന്നത് മാങ്ങയോ നാരങ്ങയോ എന്തുമാകട്ടെ, ആദ്യം തന്നെ എല്ലാ ചേരുവകളും മിക്‌സ് ചെയ്യുമ്പോള്‍, സ്പൂണിന് പകരം കൈയുറകള്‍ ധരിച്ച് കൈകൊണ്ട് മിക്സ് ചെയ്യുന്നതും നന്നാകും. 

അച്ചാറില്‍ ഉപയോഗിക്കുന്ന വിനാഗിരിയുടെ അളവും ശ്രദ്ധിക്കണം. അധികമായി വിനാഗിരി ചേര്‍ക്കുന്നത് അച്ചാറിന് പുളിരുചി കൂടുന്നതിന് കാരണമാകും. അച്ചാറിന്റെ രുചി നഷ്ടപ്പെടുകയും ചെയ്യും. 

അച്ചാറില്‍ ഉപയോഗിക്കുന്ന എണ്ണയുടെ അളവില്‍ പിശുക്ക് കാണിക്കാന്‍ പാടില്ല. വെളിച്ചെണ്ണയോ കടുകെണ്ണയോ എന്തുമാകട്ടെ എണ്ണ ആവശ്യത്തിന് ഉപയോഗിച്ചിരിക്കണം. എണ്ണയുടെ അളവില്‍ പോരായ്മയുണ്ടെങ്കില്‍ അച്ചാര്‍ വേഗത്തില്‍ കേടാകും. 

നനഞ്ഞ സ്പൂണ്‍ ഉപയോഗിച്ച് അച്ചാര്‍ ഇളക്കാനും പാടില്ല. കൂടാതെ അച്ചാര്‍ സൂക്ഷിക്കുന്ന പാത്രവും ഉണങ്ങിയതാകണം. പാത്രത്തില്‍ ഈര്‍പ്പമുണ്ടെങ്കില്‍ അച്ചാര്‍ പൂപ്പല്‍ ബാധിച്ചു കേടായിപ്പോകും. 

ചില അച്ചാറുകള്‍ തയ്യാറാക്കിയതിന് ശേഷം നേരിട്ട് കഴിക്കാവുന്നതാണ്. എന്നാലും അച്ചാറിട്ടശേഷം അവയുടെ ചേരുവകള്‍ പരസ്പരം ചേരാനുള്ള സമയം കൊടുക്കേണ്ടതുണ്ട്. ഉണ്ടാക്കിയ ശേഷം അച്ചാറുകള്‍ ഒന്നുകില്‍ മുറിയിലെ ഊഷ്മാവില്‍ സൂക്ഷിക്കാം. അല്ലെങ്കില്‍ വേനല്‍ക്കാലത്ത് സൂര്യപ്രകാശത്തില്‍ പോലും സൂക്ഷിക്കാം. ഉണ്ടാക്കിയ ഉടനേ ഫ്രിഡ്ജിനുള്ളില്‍ അച്ചാര്‍ സൂക്ഷിക്കേണ്ടതില്ല.