ഹാലോവീൻ ആഘോഷങ്ങൾക്ക് വ്യത്യസ്തമായ വേഷങ്ങളിലൂടെ ആരാധകരെ അമ്പരപ്പിക്കുന്നത് കിം കർദാഷിയാന്റെ പതിവാണ്. എന്നാൽ ഇത്തവണ വേഷത്തിനുള്ള പ്രചോദനം തേടി കിമ്മിന് അധികദൂരം പോകേണ്ടിവന്നില്ല. സ്വന്തം മകൾ നോർത്ത് വെസ്റ്റിന്റെ രൂപവും ഫാഷൻ സ്‌റ്റൈലും അതേപടി പകർത്തിയാണ് കിം 2026-ലെ ആദ്യ ഹാലോവീൻ ലുക്ക് അവതരിപ്പിച്ചിരിക്കുന്നത്. നീലനിറത്തിലുള്ള മുടിയും മുഖത്തെ പിയേഴ്സിങ്ങുകളും വ്യത്യസ്തമായ മേക്കപ്പുമെല്ലാമായി എത്തിയ കിമ്മിന്റെ ചിത്രങ്ങൾ സമൂഹമാധ്യമങ്ങളിൽ ശ്രദ്ധ നേടുകയാണ്. ഹാലോവീൻ 2026' എന്ന അടിക്കുറിപ്പോടെയാണ് കിം പുതിയ ചിത്രങ്ങൾ ഇൻസ്റ്റഗ്രാമിൽ പങ്കുവച്ചത്. പതിമൂന്നുകാരിയായ മകൾ നോർത്ത് വെസ്റ്റിന്റെ ചിത്രങ്ങളാണോ ഇതെന്ന് സംശയിച്ചുപോകുന്ന തരത്തിലായിരുന്നു കിമ്മിന്റെ രൂപമാറ്റം.

To advertise here,

മകളുടെ മ്യൂസിക് ആൽബത്തിലെ ലുക്ക് 

റാപ്പറും മുൻ ഭർത്താവുമായ കാന്യേ വെസ്റ്റുമായുള്ള ബന്ധത്തിൽ കിമ്മിന് ജനിച്ച മൂത്ത മകളാണ് നോർത്ത് വെസ്റ്റ്. സംഗീതരംഗത്തും ഫാഷനിലും സ്വന്തമായ വ്യക്തിത്വം രൂപപ്പെടുത്തിക്കൊണ്ടിരിക്കുന്ന നോർത്ത്, ഈ വർഷം മേയിൽ പുറത്തിറക്കിയ തന്റെ ആദ്യ ഇപിയായ 'N0rth4evr'ന്റെ പ്രമോഷണൽ ചിത്രങ്ങളിൽ പ്രത്യക്ഷപ്പെട്ട ലുക്കാണ് കിം പുനരാവിഷ്‌കരിച്ചത്. കറുത്ത നിറത്തിലുള്ള 'N0rth4evr' പ്രിന്റുള്ള ടി-ഷർട്ടായിരുന്നു വേഷത്തിലെ പ്രധാന ആകർഷണം. അതിനുള്ളിൽ കറുപ്പും വെള്ളയും വരകളുള്ള നീളൻ കൈയുള്ള ടോപ്പും ധരിച്ചു. പ്ലീറ്റുകളുള്ള മിനി സ്‌കർട്ടാണ് ഇതിനൊപ്പം തിരഞ്ഞെടുത്തത്. നോർത്തിന്റെ സ്‌റ്റൈലിന്റെ പ്രധാന സവിശേഷതയായ അക്വാമറൈൻ നീലനിറത്തിലുള്ള മുടിയും കിം പകർത്തി. ഇതിനായി നീളമുള്ള നീല വിഗ്ഗാണ് ഉപയോഗിച്ചത്.

മേക്കപ്പിലും ആഭരണങ്ങളിലും വിട്ടുവീഴ്ചയില്ല

വസ്ത്രവും മുടിയും മാത്രമല്ല, നോർത്തിന്റെ ലുക്കിലെ ചെറിയ വിശദാംശങ്ങൾപോലും കിം ശ്രദ്ധിച്ചിരുന്നു. മുഖത്തെ സിൽവർ സ്റ്റഡുകൾ, യഥാർഥ പിയേഴ്സിങ് പോലെ തോന്നിക്കുന്ന കൃത്രിമ ആഭരണങ്ങൾ, കട്ടിയുള്ള കൃത്രിമ കൺപീലികൾ, നാടകീയമായ ഐ മേക്കപ്പ് എന്നിവയെല്ലാം ലുക്കിന്റെ ഭാഗമായിരുന്നു. മുള്ളുകൾ നിറഞ്ഞ ഡിസൈനിലുള്ള സ്‌കൾ നെക്ലേസും ബ്രേസ്ലെറ്റുകളും നീളമുള്ള നഖങ്ങളിലെ വ്യത്യസ്തമായ നെയിൽ ആർട്ടും കിമ്മിന്റെ രൂപമാറ്റത്തിന് കൂടുതൽ ഭംഗി നൽകി. ഹൈ ആങ്കിൾ സ്‌നീക്കറുകളും ധരിച്ചതോടെ നോർത്തിന്റെ ഗോഥിക് ഫാഷൻ സ്‌റ്റൈൽ കിം പൂർണമായും പകർത്തി.

'ഇത് നോർത്ത് തന്നെയല്ലേ?' ആരാധകരുടെ പ്രതികരണം

ചിത്രങ്ങൾ പുറത്തുവന്നതോടെ കിമ്മിന്റെയും നോർത്തിന്റെയും രൂപസാദൃശ്യമാണ് ആരാധകർക്കിടയിൽ ചർച്ചയായത്. ഒറ്റനോട്ടത്തിൽ നോർത്ത് തന്നെയാണെന്ന് കരുതിപ്പോയെന്നാണ് പലരും അഭിപ്രായപ്പെട്ടത്. മകളുടെ ഫാഷൻ സ്‌റ്റൈൽ ഇത്രയും കൃത്യമായി പകർത്തിയ കിമ്മിനെ അഭിനന്ദിച്ചും നിരവധി പ്രതികരണങ്ങളെത്തി. സഹോദരി ക്ലോയി കർദാഷിയാനും കിമ്മിന്റെ ചിത്രങ്ങൾക്ക് താഴെ ഇരുവരും ഇരട്ടകളെപ്പോലെയുണ്ടെന്ന് പ്രതികരിച്ചു.

കിം കർദാഷിയാന്റെയും കാന്യേ വെസ്റ്റിന്റെയും മൂത്ത മകളായ നോർത്ത് ചെറുപ്പംമുതൽ തന്നെ സമൂഹമാധ്യമങ്ങളിൽ ശ്രദ്ധ നേടിയിട്ടുണ്ട്. മാതാപിതാക്കളുടെ പ്രശസ്തിക്കപ്പുറം സ്വന്തം ഫാഷൻ പരീക്ഷണങ്ങളിലൂടെയും സംഗീതത്തിലൂടെയും വ്യക്തിത്വം സൃഷ്ടിക്കാനുള്ള ശ്രമത്തിലാണ് നോർത്ത്. 2026 മേയിൽ പുറത്തിറങ്ങിയ 'N0rth4evr' എന്ന ആദ്യ ഇപിയിലൂടെ സംഗീതരംഗത്തും നോർത്ത് സജീവമായി. 2023-ൽ പുറത്തിറങ്ങിയ ആനിമേഷൻ ചിത്രമായ 'PAW Patrol: The Mighty Movie'-യിൽ ശബ്ദം നൽകിയും നോർത്ത് ശ്രദ്ധ നേടിയിരുന്നു. മുമ്പും ഹാലോവീൻ ആഘോഷങ്ങളിൽ കിമ്മും നോർത്തും ഒരുമിച്ച് വ്യത്യസ്ത കഥാപാത്രങ്ങളായി വേഷമിട്ടിട്ടുണ്ട്. എന്നാൽ ഇത്തവണ മകളോടൊപ്പം മറ്റൊരു കഥാപാത്രമായി എത്തുന്നതിനുപകരം മകളെത്തന്നെ കഥാപാത്രമാക്കിയാണ് കിം ആരാധകരെ അമ്പരപ്പിച്ചിരിക്കുന്നത്. സെലിബ്രിറ്റികളെയും സിനിമാ കഥാപാത്രങ്ങളെയും അനുകരിക്കുന്ന ഹാലോവീൻ വേഷങ്ങൾക്കിടയിൽ സ്വന്തം മകളുടെ ഫാഷൻ സ്‌റ്റൈൽ തിരഞ്ഞെടുത്ത കിമ്മിന്റെ പരീക്ഷണം അമ്മയും മകളും തമ്മിലുള്ള ആത്മബന്ധത്തിന്റെ ആഴമായാണ് ആരാധകർ വിലയിരുത്തുന്നത്.