വിവാഹജീവിതത്തിൽ പ്രണയത്തിനും സ്‌നേഹത്തിനും വലിയ സ്ഥാനമുണ്ട്. എന്നാൽ വർഷങ്ങൾ പിന്നിടുമ്പോൾ പ്രണയപ്രകടനങ്ങൾക്കും ചില മാറ്റങ്ങളുണ്ടാകാറുണ്ട്. പരസ്പരം സ്‌നേഹിക്കുന്നുണ്ടെങ്കിലും അത് പ്രകടിപ്പിക്കുന്ന രീതികൾ വ്യത്യസ്തമായിരിക്കും. അത്തരമൊരു ദാമ്പത്യജീവിതത്തിലെ രസകരമായ അനുഭവമാണ് ഇപ്പോൾ ശ്രദ്ധ നേടുന്നത്. ഭാര്യ ഒരിക്കലെങ്കിലും തന്റെ മടിയിലിരുന്നിട്ടില്ലെന്ന പരാതിയുമായി എത്തിയ ഭർത്താവും അതിന് രസകരമായ മറുപടികൾ നൽകിയ ഭാര്യയും ചേർന്നുള്ള സംഭാഷണം ചിരി പടർത്തുന്നതാണ്.

To advertise here,

ജംഷദ് വി രാജൻ എന്ന എക്‌സ് യൂസറാണ് തന്റെ ഭാര്യയുമായുള്ള രസകരമായ അനുഭവം പങ്കുവെച്ചിരിക്കുന്നത്. രാഹുൽ ഗാന്ധി പങ്കുവെച്ച ഒരു പഴയ ഓർമയാണ് ഇരുവരുടെയും ജീവിതത്തിൽ ഇത്തരമൊരു ചർച്ചയ്ക്ക് തുടക്കമിട്ടത്. ജംഷദ് വി രാജൻ വിവാഹജീവിതത്തിലെ രസകരമായ അനുഭവങ്ങളും ഭാര്യയുമായുള്ള ദൈനംദിന സംഭാഷണങ്ങളും നർമം കലർത്തി അവതരിപ്പിക്കുന്ന എഴുത്തുകാരനാണ്. സാമൂഹിക മാധ്യമമായ എക്‌സിൽ 'ഔച്ച് മൈ ടോ' എന്ന പേരിലാണ് അദ്ദേഹം അറിയപ്പെടുന്നത്. ഭാര്യയുമായുള്ള രസകരമായ സംഭാഷണങ്ങളിൽനിന്നും കുടുംബജീവിതത്തിലെ ചെറിയ പിണക്കങ്ങളിൽനിന്നും പ്രണയനിമിഷങ്ങളിൽനിന്നുമാണ് അദ്ദേഹത്തിന്റെ പല കുറിപ്പുകളും രൂപപ്പെടുന്നത്. വിവാഹിതരായവർക്കും അവിവാഹിതർക്കും ഒരുപോലെ ആസ്വദിക്കാവുന്ന രീതിയിൽ ദാമ്പത്യജീവിതത്തിലെ നർമം നിറഞ്ഞ മുഹൂർത്തങ്ങൾ അവതരിപ്പിക്കുന്നതാണ് അദ്ദേഹത്തിന്റെ എഴുത്തിന്റെ പ്രത്യേകത.

രാഹുൽ ഗാന്ധിയുടെ ഓർമയും ഭർത്താവിന്റെ പുതിയ ആഗ്രഹവും

കോൺഗ്രസ് നേതാവ് രാഹുൽ ഗാന്ധി അമ്മ സോണിയ ഗാന്ധിയുടെ ഓർമക്കുറിപ്പായ 'Belonging: A Journey of Love' എന്ന പുസ്തകത്തിന്റെ പ്രകാശനച്ചടങ്ങിൽ പങ്കുവെച്ച ഒരു അനുഭവമാണ് ഈ കഥയുടെ തുടക്കം. കുട്ടിക്കാലത്ത് അമ്മ സോണിയ ഗാന്ധി ഭക്ഷണം കഴിക്കുമ്പോൾ അച്ഛൻ രാജീവ് ഗാന്ധിയുടെ മടിയിലായിരുന്നു ഇരുന്നിരുന്നതെന്ന് രാഹുൽ ഓർത്തെടുത്തു. മാതാപിതാക്കൾ അങ്ങനെയാണ് ഭക്ഷണം കഴിക്കാറുള്ളതെന്ന് കരുതിയിരുന്ന അദ്ദേഹം, ഒരിക്കൽ സുഹൃത്തിന്റെ വീട്ടിലെത്തിയപ്പോൾ അവിടത്തെ അമ്മ അച്ഛന്റെ മടിയിലിരിക്കാത്തത് എന്തുകൊണ്ടാണെന്ന് ചോദിക്കുകയും ചെയ്തിരുന്നു.

ഈ വീഡിയോ കണ്ടപ്പോൾ ജംഷദ് രാജനും തന്റെ ദാമ്പത്യജീവിതത്തെക്കുറിച്ച് പുതിയൊരു ചിന്തയുണ്ടായി. 22 വർഷത്തെ വിവാഹജീവിതത്തിൽ ഭാര്യ രേഖ ഒരിക്കൽപ്പോലും തന്റെ മടിയിലിരുന്നിട്ടില്ലല്ലോ എന്നായിരുന്നു അദ്ദേഹത്തിന്റെ പരാതി. ഭക്ഷണമേശയ്ക്ക് എതിർവശത്തിരുന്ന ഭാര്യയോട് അദ്ദേഹം ചോദിച്ചു: 'രേഖ, നീ ഇതുവരെ ഒരിക്കലും എന്റെ മടിയിലിരുന്നിട്ടില്ലല്ലോ, എന്താണ് കാരണം?'ഭർത്താവിന്റെ ചോദ്യം കേട്ട രേഖ ആദ്യം മേശയ്ക്കടിയിലേക്ക് നോക്കി. എന്താണ് തിരയുന്നതെന്ന് ചോദിച്ചപ്പോൾ ഭർത്താവിന്റെ തലച്ചോറാണോ മടിയിലേക്ക് വീണുപോയതെന്ന് പരിശോധിക്കുകയാണെന്നായിരുന്നു രസകരമായ മറുപടി.

ശിവനും പാർവതിയും 

തന്റെ ആഗ്രഹം ഗൗരവമുള്ളതാണെന്ന് ബോധ്യപ്പെടുത്താൻ രാഹുൽ ഗാന്ധിയുടെ വീഡിയോയും അദ്ദേഹം ഭാര്യയെ കാണിച്ചു. എന്നാൽ വീഡിയോ കണ്ട രേഖയുടെ പ്രതികരണം വെറും 'അത് കൊള്ളാം' എന്നായിരുന്നു. ഇതോടെ ഭർത്താവിന്റെ പരാതി കൂടി. ഒടുവിൽ തന്റെ വാദത്തിന് കൂടുതൽ ശക്തി നൽകാൻ പന്ത്രണ്ടാം നൂറ്റാണ്ടിലെ ശിവപാർവതി വെങ്കലശിൽപത്തിന്റെ ചിത്രവും അദ്ദേഹം കണ്ടെത്തി. പാർവതി ശിവന്റെ മടിയിലിരിക്കുന്ന ചിത്രമായിരുന്നു അത്.

'ഇതാ നോക്കൂ, പാർവതി പോലും ശിവന്റെ മടിയിലിരുന്നിട്ടുണ്ട്' എന്നായിരുന്നു ഭർത്താവിന്റെ വാദം. എന്നാൽ ശിൽപം സൂക്ഷിച്ചുനോക്കിയ രേഖ ചോദിച്ചത് മറ്റൊന്നായിരുന്നു. 'ഈ ശിവന് എത്ര കൈകളുണ്ട്?'ആറ് കൈകളുണ്ടെന്ന് ഭർത്താവ് മറുപടി നൽകിയപ്പോൾ രേഖയുടെ വിശദീകരണം ഇങ്ങനെയായിരുന്നു: രണ്ട് കൈകൾ കൊണ്ട് പാർവതി താഴെ വീഴാതെ പിടിക്കാം, രണ്ട് കൈകൾ കൊണ്ട് ഭക്ഷണം കഴിക്കാം, ബാക്കിയുള്ള രണ്ട് കൈകൾ കൊണ്ട് ലോകകാര്യങ്ങളും നോക്കാം. എന്നാൽ ഭർത്താവിന് എത്ര കൈകളാണുള്ളതെന്നായിരുന്നു തമാശ കലർന്ന അടുത്ത ചോദ്യം. 

വിവാഹദിവസത്തെ ഇരിപ്പിടവും കാഞ്ചീപുരം സാരിയും

ദക്ഷിണേന്ത്യയിലെ ചില വിവാഹച്ചടങ്ങുകളിൽ വധു വരന്റെ മടിയിലിരിക്കുന്ന പതിവുണ്ടെന്നും എന്നാൽ തന്റെ വിവാഹദിവസം ഭാര്യയുടെ അച്ഛൻ അത്തരമൊരു അവസരം ഒരുക്കിയില്ലെന്നും ജംഷദ് പരാതിപ്പെട്ടു. എന്നാൽ ഈ ആചാരം തമിഴ് ബ്രാഹ്‌മണ കുടുംബങ്ങളിലും ചില തെലുങ്ക്, കന്നഡ കുടുംബങ്ങളിലുമാണ് പിന്തുടരുന്നതെന്നും മലയാളി വിവാഹങ്ങളിൽ പൊതുവെ അങ്ങനെയൊരു പതിവില്ലെന്നും രേഖ വിശദീകരിച്ചു. പിന്നീട് ഭർത്താവിന്റെ ശാരീരികക്ഷമതയെക്കുറിച്ചും രേഖ പരിഹാസം കലർത്തി ചോദിച്ചു. ആറു മീറ്റർ നീളമുള്ള കാഞ്ചീപുരം സാരി, 300 ഗ്രാം സ്വർണം, മൂന്ന് കിലോ മുല്ലപ്പൂവ്, 48 കിലോ ഭാരമുള്ള വധു എന്നിവയെല്ലാം കൂടി തന്റെ മടിയിലിരുന്നാൽ ഭർത്താവിന് എത്രനേരം അത് താങ്ങാനാകുമെന്നായിരുന്നു ചോദ്യം. വിവാഹച്ചടങ്ങിൽ അങ്ങനെ ഇരുന്നിരുന്നെങ്കിൽ  അഗ്‌നിക്ക് ചുറ്റും മൂന്ന് തവണ നടക്കാൻ പോലും ഭർത്താവിന് കഴിയുമായിരുന്നില്ലെന്നും രേഖ പറഞ്ഞു.

വിവാഹമോചനമെന്ന ഭീഷണിയും 18 മിനിറ്റ് നീണ്ട ചർച്ചയും

തർക്കത്തിൽ തോൽവി സമ്മതിക്കാൻ തയ്യാറാകാതിരുന്ന ജംഷദ് ഒടുവിൽ ഒരു വലിയ ഭീഷണിയിലേക്ക് കടന്നു. ചില പുരുഷന്മാർക്ക് ഇത്തരം സാഹചര്യങ്ങൾ വിവാഹമോചനത്തിന് കാരണമാകുമെന്നായിരുന്നു അദ്ദേഹത്തിന്റെ പരാമർശം. ഭാര്യയുടെ പ്രതികരണം അദ്ദേഹത്തെ വീണ്ടും ഞെട്ടിച്ചു.'വിവാഹമോചനമോ? ശരി, ആർക്കെന്തൊക്കെ കിട്ടുമെന്ന് നമുക്ക് തീരുമാനിക്കാം' എന്നായിരുന്നു രേഖയുടെ മറുപടി. അന്ന് രാവിലെ 10-ന് എൻഐഐടി ടീമുമായി ഒരു ഓൺലൈൻ മീറ്റിങ് ഉണ്ടായിരുന്നതിനാൽ അതിന് മുമ്പ് കാര്യങ്ങൾ തീരുമാനിക്കാമെന്നും രേഖ പറഞ്ഞു. അന്ന് സമയം 9.42 ആയിരുന്നു. 22 വർഷത്തെ വിവാഹബന്ധത്തിന്റെ ഭാവി തീരുമാനിക്കാൻ ഭാര്യ അനുവദിച്ചത് വെറും 18 മിനിറ്റ്!

ഒരു ഡബിൾ ബെഡ്, സോഫ, ഡൈനിങ് ടേബിൾ, അതിൽ ഒരു കസേര എന്നിവ ഭർത്താവിന് നൽകാമെന്നും രേഖ തീരുമാനിച്ചു. എന്തുകൊണ്ട് ഒരു കസേര മാത്രം എന്ന ചോദ്യത്തിന് രേഖ നൽകിയ മറുപടി അതിലും രസകരമായിരുന്നു.'നിനക്ക് രണ്ട് കസേരകൾ എന്തിനാണ്? ഈ വഴക്കിന്റെ കാര്യം തന്നെ അതല്ലേ?'ഭാര്യയുടെ മറുപടിയിൽ താൻ പരാജയപ്പെടുകയാണെന്ന് ജംഷദിന് മനസ്സിലായി.

സ്‌നേഹം പ്രകടിപ്പിക്കാൻ മടിയിലിരിക്കണമെന്നില്ല!

അവസാനം ഭർത്താവ് മറ്റൊരു ചോദ്യം കൂടി ചോദിച്ചു. താൻ സ്‌നേഹിക്കപ്പെടുന്നില്ലേ? മറ്റൊരു പുരുഷൻ ഭാര്യയുടെ ജീവിതത്തിലുണ്ടോ? എന്നായിരുന്നു സംശയം. എന്നാൽ രേഖയുടെ മറുപടി അദ്ദേഹത്തെ വികാരഭരിതനാക്കി.

'നിന്നെ ഞാൻ സ്‌നേഹിക്കുന്നത് നിർത്തിയിട്ടില്ല, വിഡ്ഢീ. ഇന്ന് പുലർച്ചെ മൂന്ന് മണിക്ക് നീ ചുമയ്ക്കുന്ന ശബ്ദം കേട്ടാണ് ഞാൻ എഴുന്നേറ്റത്. നിനക്ക് ചൂടുവെള്ളം കൊണ്ടുവന്നു തന്നു. അത് കുടിച്ചുവെന്ന് ഉറപ്പാക്കിയശേഷം നീ ഉറങ്ങുന്നതും കൂർക്കംവലിക്കുന്നതും കേട്ടുകൊണ്ട് ഞാൻ കിടന്നു. അപ്പോൾ ഞാൻ എവിടെയായിരുന്നു ഇരുന്നതെന്ന് അറിയാമോ?''എന്റെ അടുത്ത്,' ജംഷദ് മറുപടി നൽകി.'അതെ, ഞാൻ എപ്പോഴും നിന്റെ അടുത്തുതന്നെയാണല്ലോ,' എന്നായിരുന്നു രേഖയുടെ മറുപടി. ഭാര്യയുടെ വാക്കുകൾ കേട്ടതോടെ ഭർത്താവിന് ആ പഴയ ഓർമ തിരിച്ചുവന്നു. പുലർച്ചെ ചൂടുവെള്ളം കൈയിൽ തന്നതും ഉറക്കത്തിനിടയിൽ തനിക്കരികിൽ കിടക്കാൻ ഭാര്യയ്ക്ക് ഇടം നൽകിയതുമെല്ലാം അദ്ദേഹം ഓർത്തെടുത്തു.

അതിനിടെ രേഖ ചായക്കപ്പുമായി ഭർത്താവിന്റെ അടുത്തേക്ക് വന്നു. ഒടുവിൽ അദ്ദേഹത്തിന്റെ മടിയിലിരിക്കാൻ തയ്യാറായെങ്കിലും പഴയൊരു ശസ്ത്രക്രിയയുടെ കാര്യം ഓർത്തുകൊണ്ട് ഭർത്താവ് തടഞ്ഞു. വലതുകാലിൽ എസിഎൽ ശസ്ത്രക്രിയ നടത്തിയതിനാൽ ഇടതുകാലിൽ ഇരിക്കാമെന്ന് അദ്ദേഹം നിർദേശിച്ചു. എന്നാൽ അവിടെയും ഒരു ചെറിയ തടസ്സമുണ്ടായി. വിവാഹസമയത്ത് 50 കിലോ ഭാരമുണ്ടായിരുന്ന ഭാര്യ ഇപ്പോൾ അത്രയും ഭാരമുള്ളവളല്ലെന്നായിരുന്നു അതിനുള്ള രസകരമായ സൂചന. ഇരുവരും പൊട്ടിച്ചിരിച്ചു. ചായ അൽപ്പം വീഴുകയും ചെയ്തു. ഒടുവിൽ ഭാര്യ മറ്റൊരു കസേര വലിച്ചിട്ട് ഭർത്താവിന്റെ അരികിലിരുന്നു. ഇപ്പോൾ ഇരുവരും വിവാഹബന്ധം തുടരാനാണ് തീരുമാനിച്ചിരിക്കുന്നത്. ഭാര്യ എവിടെ ഇരിക്കണമെന്ന് തീരുമാനിക്കാനുള്ള സ്വാതന്ത്ര്യവും അവൾക്കുതന്നെ വിട്ടുകൊടുത്തിരിക്കുകയാണ് ഭർത്താവ്. 22 വർഷത്തെ ദാമ്പത്യജീവിതത്തിലെ ചെറിയ പരാതികളും വലിയ സ്‌നേഹവും തമാശയും നിറഞ്ഞ ഈ അനുഭവം പങ്കുവെച്ച ജംഷദ് വി രാജന്റെ കുറിപ്പ് ശ്രദ്ധ നേടുകയാണ്.