ആരാധകരുടെ സ്‌നേഹമുണ്ടെങ്കിലേ ഒരു കലാകാരന് നിലനിൽപ്പുള്ളൂ, ആ സ്‌നേഹമാണ് കലാകാരന്മാരുടെ ജീവിതത്തിലെ നേട്ടം എന്ന് പറയുന്നത് അക്ഷരാർഥത്തിൽ ശരിവയ്ക്കുന്നതായിരുന്നു ട്രിച്ചി എൻഐടി ക്യാംപസിലെ വികാരഭരിതമായ മുഹൂർത്തങ്ങൾ. ക്യാംപസിൽ ലൈവ് മ്യൂസിക് ഷോയ്ക്ക് എത്തിയതായിരുന്നു ചിന്മയി. ചിന്മയി.. ചിന്മയി.. എന്ന് ആർത്തുവിളിച്ചാണ് ഗായികയ്ക്ക് വിദ്യാർഥികൾ സ്വാഗതമോതിയതുതന്നെ.

To advertise here,

തുടർന്ന് ഐ എന്ന ചിത്രത്തിലെ എന്നോടു നീയിരുന്താൽ എന്ന ഗാനം ചിന്മയി ആലപിച്ചു. ചിന്മയിയെയും അത്ഭുതപ്പെടുത്തിക്കൊണ്ട് അവർ പാടിയ ഗാനത്തിനൊപ്പം ഓഡിറ്റോറിയത്തിൽ തടിച്ചുകൂടിയ വിദ്യാർഥികളെല്ലാവരും ചേർന്ന് ആ ഗാനം ഏറ്റുപാടുകയായിരുന്നു. സന്തോഷംകൊണ്ട് കണ്ണുനിറഞ്ഞ ചിന്മയി പാട്ടുതുടർന്നെങ്കിലും ഒടുവിൽ വികാരഭരിതയായി പൊട്ടിക്കരയുകയായിരുന്നു. ചിന്മയി കരയുന്നത് കണ്ടതും വേദിയിലുണ്ടായിരുന്ന വിദ്യാർഥികൾ വലിയ കരഘോഷങ്ങളോടെയും ആർപ്പുവിളികളോടെയും ഗായികയ്ക്ക് പിന്തുണ നൽകി. ആരാധകരുടെ ഈ വലിയ സ്‌നേഹം കണ്ടതോടെ താരം വേദിയിൽവെച്ച് നന്ദി പറയുകയും പ്രകടനം പൂർത്തിയാക്കുകയുമായിരുന്നു.

പാട്ടുപാടാനാകാതെ ചിന്മയി കരഞ്ഞുപോയപ്പോഴും അവർക്ക് പിന്തുണയുമായി പശ്ചാത്തലസംഗീതത്തിന് അനുസരിച്ച്  വിദ്യാർഥികൾ എല്ലാവരും ചേർന്ന് ആ ഗാനം പാടി. നിറകണ്ണുകളോടെയാണ് ചിന്മയി ഒടുവിൽ ആ ഗാനം പാടി പൂർത്തിയാക്കിയത്. വീഡിയോ വൈറലായതോടെ നിരവധിപേരാണ് ചിന്മയിയെ അഭിനന്ദിച്ച് രംഗത്തെത്തിയത്. ഇതാണ് യഥാർഥ കലാകാരന്റെ വിജയമെന്നായിരുന്നു ഭൂരിഭാഗംപേരുടെയും പ്രതികരണം. ചിന്മയിയെ പാടുന്നതിൽനിന്ന് വിലക്കിയവരുടെ മുഖത്തേറ്റ അടിയാണ് ഈ ആരാധകസ്‌നേഹമെന്നും പലരും കുറിച്ചു.

വിദ്യാർഥികൾ ചിന്മയിയുടെ പേര് ആവർത്തിച്ചുവിളിക്കുന്ന വീഡിയോ പോസ്റ്റുചെയ്തുകൊണ്ട് ട്രിച്ചി എൻഐടിയിലെ സംഗീതപരിപാടി തനിക്ക് ഏറെ സ്‌പെഷ്യലാണെന്ന് ചിന്മയിയും സമൂഹമാധ്യമങ്ങളിൽ കുറിച്ചു. കോളേജ് ജീവിതത്തെക്കുറിച്ച് എന്നെന്നുമോർക്കാൻ മനോഹരമായ ഒരു ദിവസം സമ്മാനിച്ചതിന് നന്ദിപറഞ്ഞുകൊണ്ടുള്ള വിദ്യാർഥികളുടെ സ്‌നേഹപ്രകടനമാണ് ആ പോസറ്റിനുതാഴെ.

മീ ടൂ വെളിപ്പെടുത്തലുകൾക്ക് ശേഷം നേരിടേണ്ടിവന്ന വെല്ലുവിളികളെ അതിജീവിച്ച് സംഗീത ലോകത്ത് വീണ്ടും സജീവമാകുന്ന ചിന്മയിയുടെ ഈ സ്‌നേഹനിർഭരമായ രംഗം സംഗീതാസ്വാദകരുടെ ഇടയിൽ വലിയ ചർച്ചയായി മാറിയിട്ടുണ്ട്.