മാന്തുരുത്തി : ഉദ്ഘാടനം കഴിഞ്ഞ് ഒരുവർഷം പിന്നിട്ടിട്ടും മാന്തുരുത്തിയിലെ വഴിയിട വിശ്രമകേന്ദ്രം അടഞ്ഞുകിടക്കുകയാണ്. ഇത് തുറക്കാത്തതിന് കാരണം പഴയ ഭരണ സമിതിയുടെ തെറ്റായ നടപടികളാണെന്ന് യു.ഡി.എഫും ഭരണത്തിലെത്തിയിട്ടും തുറക്കാത്തത് യു.ഡി.എഫിന്റെ പിടിപ്പുകേടാണെന്ന് എൽ.ഡി.എഫും ആരോപിക്കുന്നു. 30 ലക്ഷം രൂപയോളം മുടക്കി നിർമിച്ച കെട്ടിടത്തിൽ വെള്ളമില്ലാത്തതാണ് പ്രശ്‌നം.

To advertise here,

തിരഞ്ഞെടുപ്പിന് മുന്നോടിയായി കെട്ടിടം ഉദ്ഘാടനം ചെയ്യാനാണ് അന്നത്തെ ഭരണസമിതി ശ്രമിച്ചതെന്നാണ് യു.ഡി.എഫ്. നേതൃത്വം പറയുന്നു. കെട്ടിടം നിർമിക്കുന്നതിന് മുന്നോടിയായി ജലശ്രോതസ്സ് കണ്ടെത്തിയില്ലെന്നും ഇവർ ആരോപിക്കുന്നു. ഭൂജല വകുപ്പ് ഇവിടെ പരിശോധന നടത്തിയെങ്കിലും കുഴൽകിണറിന് അനുയോജ്യമല്ലെന്ന് കണ്ടെത്തിയതോടെയാണ് നിർമാണം മുടങ്ങിയതെന്നാണ് സി.പി.എം. നേതൃത്വം പറയുന്നത്.

നിലവിൽ കെട്ടിടം തുറക്കണമെങ്കിൽ വെള്ളം കണ്ടെത്തണം. റോഡു പുറമ്പോക്കിൽ കുഴൽകിണർ കുത്താൻ പി.ഡബ്ല്യു.ഡി. അടുത്തിടെ അനുമതി നൽകിയിട്ടുണ്ട്. ഇതേത്തുടർന്ന് ഭൂജലവകുപ്പ് അധികൃതരെത്തി എസ്റ്റിമേറ്റും നൽകി. പുതിയ കിണറിനായി 2.55 ലക്ഷം രൂപ അടച്ചെന്ന് പഞ്ചായത്ത് അധികൃതർ പറയുന്നു.