വായയുടെ ആരോ​ഗ്യം കാത്തുസൂക്ഷിക്കുന്നതിലൂടെ നിരവധി രോ​ഗങ്ങളെ പ്രതിരോധിക്കാനാവും. ഇത് മുൻനിർത്തിയാണ് എല്ലാവർഷവും മാർച്ച് ഇരുപതിന് ഓറൽ ഹെൽത്ത് ഡേ ആയി ആചരിക്കുന്നത്. വായയുടെ ആരോ​ഗ്യം കാക്കുക, അതിനായി ചെയ്യേണ്ട കാര്യങ്ങൾ ശീലമാക്കുക തുടങ്ങിയവയൊക്കെയാണ് ഈ ദിനത്തിലൂടെ ലക്ഷ്യമിടുന്നത്. അറിവും നിലവിലുള്ള മാർ​ഗങ്ങളും ഉപയോ​ഗിച്ച് വായയെ ബാധിക്കുന്ന രോ​ഗങ്ങളെ പ്രതിരോധിക്കുകയാണ് പ്രധാനലക്ഷ്യം. 

To advertise here,

വേൾഡ് ഡെന്റൽ ഫെഡറേഷൻ 2007 മുതലാണ് ഈ ദിനം ആചരിച്ചുവരുന്നത്. ബീ പ്രൗഡ് ഓഫ് യുവർ മൗത്ത്, പ്രൊട്ടെക്റ്റ് യുവർ സ്മൈൽ എന്നതാണ് ഈ വർഷത്തെ തീം. വായയുടെ ആരോ​ഗ്യത്തിൽ അഭിമാനം കൊള്ളുക എന്നുപറയുന്നതിനൊപ്പം വായയുടെ ആരോ​ഗ്യം ഒരാളുടെ ആത്മവിശ്വാസത്തെ വർധിപ്പിക്കുന്നത് എങ്ങനെയെന്ന് ഊന്നിപ്പറയുകയും ചെയ്യുന്നതാണ് തീം. ആ​ഗോളതലത്തിൽ വായിലെ രോ​ഗങ്ങൾ മൂലം മുന്നൂറുകോടിയിലേറെ പേർ വലയുന്നുവെന്നാണ് ലോകാരോ​ഗ്യസംഘടനയുടെ കണക്കുകൾ പറയുന്നത്. 1990 മുതൽ 2019 വരെ മാത്രം വായിലെ രോ​ഗങ്ങൾ മൂലം ദുരിതം അനുഭവിക്കുന്നവർ നൂറുകോടിയിലധികമായിട്ടുണ്ട്. 

അമിത മധുരത്തിന്റെ ഉപയോ​ഗം, പുകയില ഉപയോ​ഗം, ദന്തശുചിത്വം ഇല്ലായ്മ, മദ്യോപയോ​ഗം തുടങ്ങിയവയാണ് വായിലുണ്ടാകുന്ന പലരോ​ഗങ്ങൾക്കും പിന്നിൽ. അതിനാൽ വായുടെ ആരോ​ഗ്യം കാക്കാൻ ഉതകുന്ന വഴികൾ സ്വീകരിക്കേണ്ടത് അനിവാര്യമാണ്. 

വായുടെ ആരോ​ഗ്യത്തിന് ചില ടിപ്സ്

  • വായിലെ വരൾച്ച നിയന്ത്രിക്കാൻ ധാരാളം വെള്ളം കുടിക്കണം
  • രാവിലെ ഭക്ഷണത്തിന് മുൻപും വൈകുന്നേരം ഭക്ഷണത്തിന് ശേഷവും പല്ല് തേയ്ക്കണം. മുകളിൽ നിന്ന് താഴേക്കും തിരിച്ചുമാണ് പല്ല് തേയ്‌ക്കേണ്ടത്.
  • പല്ലുതേയ്ക്കാൻ ബ്രഷിൽ നിറയെ പേസ്റ്റ് എടുക്കരുത്. പയറുമണിയോളം മാത്രമേ എടുക്കാവൂ
  • നാക്ക് വൃത്തിയാക്കാൻ ബ്രഷിന്റെ ബ്രിസിലുകൾ ഉപയോഗിക്കാം
  • ആറുമാസത്തിലൊരിക്കൽ നിർബന്ധമായും ദന്തപരിശോധന നടത്തണം.
  • രാത്രി പല്ല് വൃത്തിയാക്കിയതിനുശേഷം വെള്ളമല്ലാതെ മറ്റൊന്നും കഴിക്കാതിരിക്കുക.
  • അമ്ല രസമുള്ള ഭക്ഷണം കഴിച്ചയുടൻ പല്ല് ബ്രഷ് ചെയ്യാതിരിക്കുക. ഇനാമൽ നഷ്ടപ്പെടാൻ സാധ്യതയുണ്ട്.
  • പല്ല് വരുന്ന പ്രായം മുതൽ കുട്ടികളിലെ ദന്തപരിചരണത്തിൽ പ്രത്യേക ശ്രദ്ധ നൽകണം. അതിനായി  വിദഗ്ധ ഡോക്ടർമാരുടെ  സഹായം തേടാം.
  • ദന്തക്ഷയം തുടക്കത്തിലെ ചികിത്സിക്കണം.   രോഗം  തിരിച്ചറിയാൻ എത്രത്തോളം നേരത്തെ സാധിക്കുന്നുവോ അത്രത്തോളം ഫലപ്രദമായി ചികിത്സിക്കാനാവും.  
  • സ്വയം ചികിത്സ ആപത്താണ് ഡോക്ടറെ കണ്ടതിനു ശേഷം മാത്രം മരുന്നുകൾ കഴിക്കുക.
  • വർഷത്തിലൊരിക്കൽ ഡെന്റിസ്റ്റിനെ കണ്ട് പരിശോധനകൾ നടത്തി പല്ലുകളുടെയും മോണയുടെയും ആരോഗ്യം വിലയിരുത്താം.