ശരീരത്തിന് അത്യന്താപേക്ഷിതമായ വിറ്റാമിനുകളിലൊന്നാണ് വിറ്റാമിൻ ഡി. എല്ലുകളുടെയും പല്ലുകളുടെയും ആരോഗ്യത്തിനും പേശീസംരക്ഷണത്തിനും പ്രതിരോധശേഷി വർധിപ്പിക്കാനുമൊക്കെ വിറ്റാമിൻ ഡി പ്രധാനമാണ്. എന്നാൽ ഇവയ്ക്കൊപ്പം മറവിരോഗമായ അൽസ്ഹൈമേഴ്സ് സാധ്യത കുറയ്ക്കുന്നതിലും വിറ്റാമിൻ ഡിയുടെ പങ്ക് വലുതാണെന്നാണ് പുതിയൊരു പഠനം പറയുന്നത്.

To advertise here,

വിറ്റാമിൻ ഡി കുറയുന്നത് വൈജ്ഞാനിക അപചയത്തിനും അൽസ്ഹൈമേഴ്സിനും കാരണമാകുമെന്നാണ് പഠനം പറയുന്നത്. ന്യൂറോളജി ഓപ്പൺ ആക്സസ് എന്ന ജേർണലിലാണ് ഇതുസംബന്ധിച്ച പഠനം പ്രസിദ്ധീകരിച്ചിരിക്കുന്നത്. അയർലൻഡിലെ ഗാൽവേ സർവകലാശാലയിൽ നിന്നുള്ള ഗവേഷകരാണ് പഠനത്തിനു പിന്നിൽ. അൽസ്ഹൈമേഴ്സിനു പ്രധാന കാരണമാകുന്ന ടൗ പ്രോട്ടീൻ അടിയുന്നത് പ്രതിരോധിക്കാൻ വിറ്റാമിൻ ഡിക്കു കഴിയുമെന്നാണ് പഠനം പറയുന്നത്. മധ്യവയസ്സിൽ മസ്തിഷ്കാരോഗ്യം കാക്കുന്നതിൽ വിറ്റാമിൻ ഡിയുടെ പങ്ക് വലുതാണെന്നും പഠനം പറയുന്നു.

എഴുപതുവയസ്സു കടന്നവരിൽ മറവിരോഗമായ ഡിമെൻഷ്യ സ്ഥിരീകരിക്കുന്നതിനു പിന്നിൽ വിറ്റാമിൻ ‍ഡി കുറയുന്നതു പ്രധാന കാരണമാണെന്ന് മുൻകാല പഠനങ്ങൾ പറയുന്നുണ്ട്. എന്നാൽ നാൽപതു വയസ്സിനു മുമ്പുള്ള കാലഘട്ടത്തിൽ വിറ്റാമിൻ ഡിയുടെ കുറവ് അൽസ്ഹൈമേഴ്സ് സാധ്യത കൂട്ടുന്നതിനേക്കുറിച്ചാണ് പുതിയ പഠനം പറയുന്നത്.

ഡിമെൻഷ്യ സ്ഥിരീകരിച്ചിട്ടില്ലാത്ത 793 സ്ത്രീകളുടെയും പുരുഷന്മാരുടെയും ആരോഗ്യവിവരങ്ങൾ ശേഖരിച്ചാണ് പഠനം നടത്തിയത്. പഠനത്തിൽ പങ്കാളികളായവരെല്ലാം മുപ്പത്തിയൊമ്പതു വയസ്സു പ്രായമുള്ളവരായിരുന്നു. രക്തപരിശോധനയിലൂടെ അവരുടെ വിറ്റാമിൻ ഡിയുടെ നില പരിശോധിച്ചു. ഏകദേശം 16 വർഷങ്ങൾക്കു ശേഷം, ഇതേ ഗ്രൂപ്പിലെ ഏകദേശം 430 പേരുടെ മസ്തിഷ്കം സ്കാൻ ചെയ്ത് അൽസ്ഹൈമേഴ്സ് ലക്ഷണങ്ങളുണ്ടോയെന്ന് പരിശോധിച്ചു. തുടർന്നാണ് ശരീരത്തിൽ ആവശ്യത്തിന് വിറ്റാമിൻ ഡി ഉണ്ടായിരുന്നവരിൽ‍ അൽസ്ഹൈമേഴ്സിനു കാരണമാകുന്ന ടൗ പ്രോട്ടീൻ അടിയുന്നത് കുറവായിരുന്നുവെന്ന് കണ്ടെത്തിയത്.

‍വിറ്റാമിൻ ഡി സപ്ലിമെന്റുകൾക്ക് ഡിമെൻഷ്യയെ തടയാൻ കഴിയുമോ എന്നതുസംബന്ധിച്ച് കൂടുതൽ ക്ലിനിക്കൽ ട്രയലുകൾ നടക്കേണ്ടതുണ്ടെന്നും ഗവേഷകർ പറയുന്നു,

വിറ്റാമിൻ ഡി-യുടെ കുറവുണ്ടോ? ലക്ഷണങ്ങൾ പരിശോധിക്കാം

ശരീരത്തിലെ വിറ്റാമിൻ ഡി-യുടെ കുറവ് കാരണം തുടക്കത്തിൽ കാര്യമായ രോഗലക്ഷണങ്ങൾ കാണിക്കണമെന്നില്ല. എന്നാൽ ലക്ഷണങ്ങൾ പ്രകടമാകുമ്പോൾ അത് നിങ്ങളുടെ ആകെയുള്ള ആരോഗ്യത്തെ ക്രമേണ ബാധിച്ചേക്കാം.

  • ക്ഷീണം അല്ലെങ്കിൽ ഊർജക്കുറവ്
  • എല്ലുകൾക്ക് വേദന അല്ലെങ്കിൽ അസ്വസ്ഥത
  • പേശികൾക്ക് ബലക്കുറവ് അല്ലെങ്കിൽ കോച്ചിപ്പിടുത്തം
  • വിഷാദം ഉൾപ്പെടെയുള്ള മാനസികാവസ്ഥയിലെ മാറ്റങ്ങൾ
  • ഉറങ്ങാനുള്ള ബുദ്ധിമുട്ട് അല്ലെങ്കിൽ ഉറക്കക്കുറവ്
  • മുടികൊഴിച്ചിൽ
  • വിശപ്പില്ലായ്മ
  • അടിക്കടിയുണ്ടാകുന്ന അസുഖങ്ങൾ അല്ലെങ്കിൽ അണുബാധകൾ (പ്രതിരോധശേഷി കുറയുന്നത്)
  • മുറിവുകൾ ഉണങ്ങാനുള്ള താമസം
  • വിളറിയ അല്ലെങ്കിൽ അസാധാരണമാംവിധം നിറം മങ്ങിയ ചർമം
  • സെക്കൻഡറി ഹൈപ്പർപാരാതൈറോയിഡിസം(ശരീരം എല്ലുകളിൽ നിന്ന് കാത്സ്യം വലിച്ചെടുക്കുന്ന അവസ്ഥ)
  • എല്ലുകളുടെ ബലക്കുറവ്

ഈ ലക്ഷണങ്ങൾ പലപ്പോഴും മറ്റ് രോഗാവസ്ഥകളുമായി സാമ്യമുള്ളതോ അത്ര പ്രകടമല്ലാത്തതോ ആയതിനാൽ രക്തപരിശോധനയിലൂടെ വിറ്റാമിൻ ഡി-യുടെ അളവ് കുറവുണ്ടെന്ന് സ്ഥിരീകരിക്കുന്നത് വരെ തിരിച്ചറിയാറില്ല. പ്രായക്കൂടുതൽ, അമിതവണ്ണം, കരൾ അല്ലെങ്കിൽ വൃക്ക സംബന്ധമായ രോഗങ്ങൾ, ആഗിരണത്തെ തടസ്സപ്പെടുത്തുന്ന ദഹനനാള രോഗങ്ങൾ, പുറത്ത് സൂര്യപ്രകാശം ഏൽക്കുന്നത് കുറയ്ക്കുന്ന ജീവിതശൈലികൾ എന്നിവ ഇതിന്റെ സാധ്യത കൂട്ടുന്നു. 

ഭക്ഷണത്തിലൂടെ വിറ്റാമിൻ ഡി

സൂര്യപ്രകാശം ഏൽക്കുമ്പോൾ ചർമം വിറ്റാമിൻ ഡി ഉത്പാദിപ്പിക്കുമെങ്കിലും ഭക്ഷണക്രമമാണ് മറ്റൊരു പ്രധാന ഉറവിടം. ചില ഭക്ഷണങ്ങളിൽ സ്വാഭാവികമായി വിറ്റാമിൻ ഡി ധാരാളം അടങ്ങിയിട്ടുണ്ട്.

സാൽമൺ, അയല, ട്യൂണ, മത്തി, തുടങ്ങിയ കൊഴുപ്പുള്ള മത്സ്യങ്ങൾ വിറ്റാമിൻ ഡി-യുടെ ഏറ്റവും മികച്ച ഉറവിടങ്ങളാണ്. മുട്ടയുടെ മഞ്ഞക്കരുവിൽ ഇത് മിതമായ അളവിൽ അടങ്ങിയിരിക്കുന്നു, പ്രത്യേകിച്ച് നാടൻ കോഴികളുടെ മുട്ടകളിൽ. ബീഫിന്റെ കരളിലും മത്സ്യ എണ്ണകളിലും (കോഡ് ലിവർ ഓയിൽ പോലുള്ളവ) ഉയർന്ന അളവിൽ വിറ്റാമിൻ ഡി അടങ്ങിയിട്ടുണ്ട്.

അൾട്രാവയലറ്റ് രശ്മികൾ ഏൽക്കുന്ന കൂണുകളിൽ വിറ്റാമിൻ ഡി2 അടങ്ങിയിട്ടുണ്ട്. ഇത് സസ്യാധിഷ്ഠിതമാണെങ്കിലും ശരീരത്തിന് പ്രയോജനകരമാണ്. പാൽ, ധാന്യങ്ങൾ, ഓറഞ്ച് ജ്യൂസ് എന്നിവ കഴിക്കുന്നത് ഭക്ഷണക്രമത്തിൽ വലിയ മാറ്റങ്ങൾ വരുത്താതെ തന്നെ വിറ്റാമിൻ ഡി ലഭിക്കുന്നത് എളുപ്പമാക്കുന്നു.