കുനിഞ്ഞ് നിവരുമ്പോള്‍ അസഹനീയമായ നടുവേദന, അല്ലെങ്കില്‍ ദീര്‍ഘനേരം കംപ്യൂട്ടറിന്റെ മുന്നില്‍ ഇരിക്കുമ്പോള്‍ അനുഭവപ്പെടുന്ന ദുസ്സഹമായ വേദന. ഇവയെല്ലാം നമ്മളില്‍ ബഹുഭൂരിഭാഗം ആളുകളും അനുഭവിക്കുന്ന ഒന്നാണ്. എന്തുകൊണ്ടാണ് ഇത് സംഭവിക്കുന്നത്, എന്താണ് ഇതിന്റെ കാരണം എന്ന് നോക്കാം.
എന്താണ് സ്‌പോണ്ടിലോലിസ്തസിസ്?
നട്ടെല്ലിന്റെ അസ്ഥിരത ഉള്‍പ്പെടുന്ന ഒരു അവസ്ഥയാണ് എന്താണ് സ്‌പോണ്ടിലോലിസ്തസിസ്(spondylolisthesis). നമ്മുടെ നട്ടെല്ലിലെ അസ്ഥികളെ കശേരുക്കള്‍ അഥവാ വെര്‍ട്ടിബ്രല്‍ ബോഡി എന്നാണ് വിളിക്കുന്നത്. നമ്മുടെ നട്ടെല്ല് 33 ചെറിയ ദീര്‍ഘചതുരാകൃതിയിലുള്ള അസ്ഥികളാല്‍ നിര്‍മ്മിച്ചിരിക്കുന്നു. ഇവയെ കശേരുക്കള്‍ എന്ന് വിളിക്കുന്നു. അവ പരസ്പരം അടുക്കിവെച്ചിരിക്കുന്നു. ഈ എല്ലുകള്‍ സുഷുമ്‌നാനാഡിയെ സംരക്ഷിക്കുന്ന ഒരു കനാല്‍ സൃഷ്ടിക്കാന്‍ ബന്ധിപ്പിക്കുന്നു.
ഇതിനെ കുറച്ചു കൂടെ ലഘൂകരിച്ച് കണ്ണികള്‍ എന്ന് വിശേഷിപ്പിക്കാം. ഈ അസ്ഥികള്‍ ഒരു ചങ്ങലയിലെ കണ്ണികള്‍ പോലെ വര്‍ത്തിക്കുന്നു. അവ പരസ്പരം ബന്ധിച്ചു കിടക്കുന്നു. എന്നാല്‍ ഇവയെ പരസ്പരം ബന്ധിപ്പിക്കുവാന്‍ അനേകം ലിഗ്മെന്റുകളും (ദശകളും) പേശികളും, സന്ധികളും കശേരുക്കള്‍ക്കിടയിലുള്ള കുഷ്യന്‍ പോലെയുള്ള ഡിസ്‌കുകളും സഹായിക്കുന്നു. മനുഷ്യശരീരത്തില്‍ ഏറ്റവും സങ്കീര്‍ണ്ണമായ ശരീരഘടനയാണ് വെര്‍ട്ടിബ്രെല്‍ കോളം.
കശേരുക്കളുടെ സ്ഥാനത്തിലുളള വ്യതിയാനം കൊണ്ടാണ് സ്‌പോണ്ടിലോലിസ്തസിസ് സംഭവിക്കുന്നത്. ഒരു കശേരു അതിന്റെ താഴെയുള്ള കശേരുക്കളില്‍ നിന്നും വഴുതി മുന്നോട്ട് പോകുമ്പോള്‍ സ്‌പോണ്ടിലോലിസ്‌തെസിസ് സംഭവിക്കുന്നു. കശേരുക്കള്‍ക്കും ഫേസറ്റ് ജോയിന്റുകള്‍ക്കും (കശേരുക്കളെ പരസ്പരം ബന്ധിപ്പിക്കുന്ന ഓരോ കശേരുക്കളുടെയും രണ്ട് പിന്‍ഭാഗങ്ങള്‍) ഇടയിലുള്ള ഡിസ്‌ക്കുകളും തേഞ്ഞു പോയേകാം. ഫേസറ്റ് ജോയിന്റുകളുടെ അസ്ഥി യഥാര്‍ഥത്തില്‍ വീണ്ടും അമിതമായി വളരുകയും ചെയ്യുന്നു. ഇത് അസന്തുലിതവും അസ്ഥിരവുമായ ഉപരിതല വിസ്തീര്‍ണ്ണത്തിന് കാരണമാകുന്നു. ഇത് മൂലം കശേരുക്കള്‍ക്ക് സ്ഥാനത്ത് തുടരാന്‍ കഴിയുന്നില്ല. കാരണം എന്തുതന്നെയായാലും കശേരുക്കള്‍ സ്ഥലത്തുനിന്ന് വഴുതിവീഴുമ്പോള്‍ അത് അതിന് താഴെയുള്ള അസ്ഥിയില്‍ സമ്മര്‍ദം ചെലുത്തുന്നു.
സ്‌പോണ്ടിലോലിസ്തസിസില്‍ ഒരു വെര്‍ട്ടിബ്രെ (അതായത്, നട്ടെല്ലിന്റെ 33 അസ്ഥികളില്‍ ഒന്ന്) മറ്റൊന്നുമായി താരതമ്യപ്പെടുത്തുമ്പോള്‍ മുന്‍പോട്ട് സ്ലിപ്പ് ആയാണ്ഇരിക്കുന്നത്. ലംബാര്‍ പ്രദേശത്ത് (നിങ്ങളുടെ നട്ടെല്ലിന്റെ അടിഭാഗത്തേക്ക് ) സ്‌പോണ്ടിലോലിസ്‌തെസിസ് സാധാരണയായി സംഭവിക്കുന്നു. കൂടുതല്‍ കൃത്യമായി പറഞ്ഞാല്‍- ലംബാര്‍ -സാക്രല്‍ ജംങ്ഷനില്‍.
പ്രായപൂര്‍ത്തിയായ ജനസംഖ്യയുടെ ഏകദേശം നാല് ശതമാനം മുതല്‍ ആറ് ശതമാനം വരെ സ്‌പോണ്ടിലോലിസിസ്, സ്‌പോണ്ടിലോലിസ്തസിസ് എന്നിവ സംഭവിക്കുന്നു. രോഗലക്ഷണങ്ങള്‍ ഇല്ലാത്തതിനാല്‍ വര്‍ഷങ്ങളോളം സ്‌പോണ്ടിലോലിസ്തസിസ് എന്ന രോഗാവസ്ഥയുടെ ഇരയായി അറിഞ്ഞോ അറിയാതെയോ ജീവിക്കുന്ന ഒരുപാട് രോഗികള്‍ നമുക്ക് ചുറ്റും ഉണ്ടെന്നു ചുരുക്കം
അപകടകരമായ സ്‌പോണ്ടിലോലിസ്തിസിസ് (നട്ടെല്ലില്‍ വാര്‍ധക്യവും തേയ്മാനവും കാരണം സംഭവിക്കുന്നു) 50 വയസ്സിന് ശേഷം കൂടുതല്‍ സാധാരണമാണ്. പുരുഷന്മാരേക്കാള്‍ കൂടുതല്‍ സാധാരണമാണ് സ്ത്രീകളില്‍.
കൗമാരപ്രായത്തില്‍ നടുവേദന സംഭവിക്കുമ്പോള്‍, ഏറ്റവും സാധാരണമായ കാരണങ്ങളില്‍ ഒന്നാണ് സ്‌പോണ്ടിലോലിസ്തസിസ് (Isthmic spondylolisthesis)
സ്ലിപ്പേജിന്റെ അളവിനെ അടിസ്ഥാനമാക്കി ഡോക്ടര്‍മാര്‍ സാധാരണയായി സ്‌പോണ്ടിലോലിസ്തസിസ് താഴ്ന്ന ഗ്രേഡ് അല്ലെങ്കില്‍ ഉയര്‍ന്ന ഗ്രേഡ് എന്ന രീതിയില്‍ തരംതിരിക്കുന്നു. കശേരുക്കളുടെ വീതിയുടെ 50 ശതമാനത്തിലധികം അതിന് താഴെയുള്ള കശേരുക്കളില്‍ നിന്ന് മുന്നോട്ട് വഴുതിവീഴുമ്പോള്‍ ഉയര്‍ന്ന ഗ്രേഡ് സ്ലിപ്പ് സംഭവിക്കുന്നു. ഉയര്‍ന്ന ഗ്രേഡ് സ്ലിപ്പുകളുള്ള രോഗികള്‍ക്ക് കാര്യമായ വേദനയും നാഡി പരിക്കും അനുഭവപ്പെടാനും രോഗലക്ഷണങ്ങള്‍ ഒഴിവാക്കാന്‍ ശസ്ത്രക്രിയ ആവശ്യമായി വരാനും സാധ്യതയുണ്ട്.
സ്‌പോണ്ടിലോലിസ്തസിസ് വരാന്‍ സാധ്യതയുള്ളത് ആര്‍ക്കൊക്കെയാണ്?
1. അത്‌ലറ്റിക്‌സ്: ജിംനാസ്റ്റിക്‌സ് താരങ്ങള്‍, ഫുട്‌ബോള്‍ താരങ്ങള്‍, വെയ്റ്റ് ലിഫ്റ്റര്‍മാര്‍ തുടങ്ങിയ ലംബാര്‍ നട്ടെല്ല് നീട്ടുന്ന കായിക ഇനങ്ങളില്‍ പങ്കെടുക്കുന്ന യുവ അത്‌ലറ്റുകള്‍ക്ക് (കുട്ടികളും കൗമാരക്കാരും) സ്‌പോണ്ടിലോലിസ്‌തെസിസ് വരാനുള്ള സാധ്യത കൂടുതലാണ്. കുട്ടികളുടെ വളര്‍ച്ചയുടെ കുതിപ്പിനിടയില്‍ കശേരുക്കള്‍ വഴുതിപ്പോകുന്നു. കൗമാരപ്രായത്തില്‍ നടുവേദനയ്ക്കുള്ള ഏറ്റവും സാധാരണമായ കാരണങ്ങളില്‍ ഒന്നാണ് സ്‌പോണ്ടിലോലിസ്തസിസ്.
നട്ടെല്ലിന്റെ ഒരു ഭാഗത്തെ ജനന വൈകല്യം- ഇത് നട്ടെല്ലിന് ആവര്‍ത്തിച്ചുള്ള ആഘാതത്തിലേക്ക് വഴുതിപ്പോകാന്‍) കാരണമാകും. ജിംനാസ്റ്റുകള്‍, വെയ്റ്റ് ലിഫ്റ്റര്‍മാര്‍ തുടങ്ങിയ അത്‌ലറ്റുകളില്‍ ഇത് കൂടുതല്‍ സാധാരണമാണ്
2. ജനിതകശാസ്ത്രം: ഇസ്ത്മിക് സ്‌പോണ്ടിലോലിസ്തസിസ്(Isthmic spondylolisthesis)) ഉള്ള ചില ആളുകള്‍ പാര്‍സ് ഇന്റര്‍ആര്‍ട്ടിക്കുലാരിസ് ( Pars Interarticularis) എന്ന് വിളിക്കുന്ന കശേരുക്കളുടെ നേര്‍ത്ത ഭാഗവുമായി ജനിക്കുന്നു. ഇത് കശേരുക്കളെ നേരെ മുകളിലും താഴെയും ബന്ധിപ്പിക്കുന്നു. നട്ടെല്ലിന്റെ ചലനം അനുവദിക്കുന്ന ഒരു പ്രവര്‍ത്തന യൂണിറ്റ് അങ്ങനെ രൂപീകരിക്കുന്നു. കശേരുക്കളുടെ ഈ നേര്‍ത്ത ഭാഗങ്ങള്‍ ഒടിയാനും വഴുതിപ്പോകാനും സാധ്യത കൂടുതലാണ്. ഡീജനറേറ്റീവ് സ്‌പോണ്ടിലോലിസ്തസിസിന് ജനിതകം ഒരു പ്രധാന ഘടകം തന്നെയാണ്.
3. പ്രായം: പ്രായമാകുമ്പോള്‍ നട്ടെല്ലിലെ തേയ്മാനം കശേരുക്കളെ ദുര്‍ബലമാക്കുമ്പോള്‍, അപചയകരമായ നട്ടെല്ല് അവസ്ഥകള്‍ രൂപപ്പെട്ടേക്കാം. നട്ടെല്ലിന്റെ അപചയകരമായ അവസ്ഥകളുള്ള പ്രായമായ മുതിര്‍ന്നവര്‍ക്ക് സ്‌പോണ്ടിലോലിസ്തസിസ് ഉണ്ടാകാനുള്ള സാധ്യത കൂടുതലാണ്. 50 വയസ്സിനുശേഷം ഇത് കൂടുതല്‍ സാധാരണമാകും.
സ്‌പോണ്ടിലോലിസ്തസിസ് രോഗലക്ഷണങ്ങള്‍ എന്തൊക്കെ?
പല സന്ദര്‍ഭങ്ങളിലും സ്‌പോണ്ടിലോലൈസിസ്, സ്‌പോണ്ടിലോലിസ്തസിസ് എന്നിവയുള്ള രോഗികള്‍ക്ക് വ്യക്തമായ രോഗലക്ഷണങ്ങള്‍ ഇല്ല. പരസ്പര ബന്ധമില്ലാത്ത പരിക്കിനോ അവസ്ഥയ് ക്കോ എക്‌സ്‌റേ എടുക്കുന്നത് വരെ അവസ്ഥകള്‍ കണ്ടെത്താന്‍ പോലും കഴിഞ്ഞേക്കില്ല.
രോഗലക്ഷണങ്ങള്‍ ഉണ്ടാകുമ്പോള്‍, ഏറ്റവും സാധാരണമായ ലക്ഷണം നടുവേദനയാണ്. ഇത് പേശികളില്‍ ഉണ്ടാവുന്ന സ്ട്രെയ്നിന് സമാനം ആയിരിക്കും. കൂടാതെ തുടകളുടെയും നിതംബത്തിന്റെയും പിന്നിലും പ്രസരിക്കുകയും, ശാരീരിക അധ്വാനം കൊണ്ട് സ്ഥിതി വഷളാകുകയും എന്നാല്‍ വിശ്രമിക്കുന്നതോടെ വേദന കുറയുകയും ചെയ്യുന്നു.
ബാക്ക് സ്റ്റിഫ്‌നെസ്സ്, തുടയുടെ പിന്‍ഭാഗത്ത് പേശികളില്‍ അനുഭവപ്പെടുന്ന പിടുത്തം, നില്‍ക്കാനും നടക്കാനും ബുദ്ധിമുട്ട് എന്നിവയാണ് മറ്റു ചില ലക്ഷണങ്ങള്‍.
തീവ്രമോ ഉയര്‍ന്ന ഗ്രേഡ് സ്ലിപ്പുകളോ ഉള്ള സ്‌പോണ്ടിലോലിസ്തിസിസ് രോഗികള്‍ക്ക് ഒന്നോ രണ്ടോ കാലുകളില്‍ തരിപ്പോ മരവിപ്പോ ബലഹീനതയോ ഉണ്ടായേക്കാം. ഈ രോഗലക്ഷണങ്ങള്‍ നട്ടെല്ലിന്റെ നാഡി വേരിലെ സമ്മര്‍ദത്തില്‍ നിന്ന് ഉണ്ടാകുന്നു. അത് സ്‌പൈനല്‍ കനാലില്‍ നിന്ന് പുറത്തുകടക്കുന്നു.
രോഗനിര്‍ണ്ണയം എങ്ങനെ?
നിങ്ങളുടെ ഡോക്ടര്‍ ശാരീരിക പരിശോധന നടത്തുകയും രോഗലക്ഷണങ്ങളെ കുറിച്ച് നിങ്ങളോട് ചോദിക്കുകയും ചെയ്യും. തുടര്‍ന്ന് രോഗനിര്‍ണ്ണയം സ്ഥിരീകരിക്കുന്നതിന് നിങ്ങള്‍ക്ക് ഒരു ഇമേജിംഗ് സ്‌കാന്‍ ആവശ്യമായി വന്നേക്കാം.
വിവിധതരത്തിലുള്ള ഇമേജിങ് ടെസ്റ്റുകള്‍
1. എക്‌സ്‌റേ: ഈ പഠനങ്ങള്‍ അസ്ഥി പോലുള്ള ഇടതൂര്‍ന്ന ഘടനകളുടെ ചിത്രങ്ങള്‍ നല്‍കുന്നു. നാലാമത്തെയോ അഞ്ചാമത്തെയോ ലംബാര്‍ കശേരുക്കളുടെ പാര്‍സ് ഇന്റര്‍ആര്‍ട്ടിക്കുലാരിസ് ( pars interarticularis) ഭാഗത്തില്‍ എക്‌സ്-റേകള്‍ ഒരു 'വിള്ളല്‍' അല്ലെങ്കില്‍ സമ്മര്‍ദ്ദ ഒടിവ് ( stress fracture) കാണിക്കുന്നുവെങ്കില്‍, അത് രോഗ സ്‌പോണ്ടിലോലിസിസിന്റെ സൂചനയാണ്.
2. സി.ടി. സ്‌കാന്‍: പ്ലെയിന്‍ എക്‌സ്‌റേകളേക്കാള്‍ കൂടുതല്‍ വിശദീകരിക്കുന്ന സി.ടി. സ്‌കാനുകള്‍, ഒടിവിനെക്കുറിച്ചോ സ്ലിപ്പേജിനെക്കുറിച്ചോ കൂടുതല്‍ അറിയാന്‍ സഹായിക്കുകയും ചികിത്സ ആസൂത്രണം ചെയ്യുന്നതില്‍ സഹായകമാകുകയും ചെയ്യും.
3. എം.ആര്‍.ഐ. സ്‌കാന്‍(മാഗ്‌നറ്റിക് റിസോണന്‍സ് ഇമേജിംഗ് സ്‌കാന്‍: ഈ പഠനങ്ങള്‍ ശരീരത്തിന്റെ മൃദുവായ കലകളുടെ മികച്ച ചിത്രങ്ങള്‍ നല്‍കുന്നു. കശേരുക്കള്‍ക്കിടയില്‍ ഇന്റര്‍വെര്‍ട്ടിബ്രെല്‍ ഡിസ്‌കുകള്‍ക്ക് കേടുപാടുകള്‍ ഉണ്ടോ അതോ വഴുതിപ്പോയ കശേരുക്കള്‍ നട്ടെല്ലിന്റെ നാഡീവേരുകളില്‍ അമര്‍ത്തുന്നുണ്ടോ എന്ന് നിര്‍ണ്ണയിക്കാന്‍ ഒരു എം.ആര്‍.ഐ. സഹായിക്കും. പാര്‍സിന് പരിക്ക് ഉണ്ടോ (എക്‌സ്‌റേയില്‍ ദൃശ്യമാകാത്തവ) എന്ന് നിര്‍ണ്ണയിക്കാനും സഹായിക്കും.
ചികിത്സ
സ്‌പോണ്ടിലോലിസിസ്, സ്‌പോണ്ടിലോലിസ്തസിസ് എന്നിവയ്ക്കുള്ള ചികിത്സയുടെ ലക്ഷ്യങ്ങള്‍ ഇവയാണ്.
- വേദന കുറയ്ക്കുക
- പുതുതായി ഉണ്ടായ പാര്‍സ് ഒടിവ് സുഖപ്പെടാന്‍ അനുവദിക്കുക
- രോഗിയെ സ്‌പോര്‍ട്‌സിലേക്കും മറ്റ് ദൈനംദിന പ്രവര്‍ത്തനങ്ങളിലേക്കും തിരികെ എത്തിക്കുക.
1. ശസ്ത്രക്രിയേതര ചികിത്സ (Non-surgical Treatment)
പ്രാരംഭ ചികിത്സ മിക്കവാറും ശസ്ത്രക്രിയാരഹിതമാണ്. സ്‌പോണ്ടിലോലിസിസ്, താഴ്ന്ന ഗ്രേഡ് സ്‌പോണ്ടിലോലിസ്തസിസ് എന്നിവയുള്ള മിക്ക രോഗികളും ശസ്ത്രക്രിയേതര ചികിത്സയിലൂടെ മെച്ചപ്പെടും.
ശസ്ത്രക്രിയേതര ചികിത്സയില്‍ താഴെ പറയുന്നവ ഉള്‍പ്പെട്ടിരിക്കുന്നു.
വിശ്രമം: ഒരു കാലയളവിലേക്ക് കീഴ്മുതുകില്‍ അമിത സമ്മര്‍ദ്ദം ചെലുത്തുന്ന സ്‌പോര്‍ട്‌സും മറ്റ് പ്രവര്‍ത്തനങ്ങളും ഒഴിവാക്കുന്നത് പലപ്പോഴും നടുവേദനയും മറ്റ് രോഗലക്ഷണങ്ങളും മെച്ചപ്പെടുത്താന്‍ സഹായിക്കും.
നോണ്‍സ്റ്റിറോയിഡല്‍ ആന്റി-ഇന്‍ഫ്‌ളമേറ്ററി മരുന്നുകള്‍ (NSAIDs): ഇവ വീക്കം കുറയ്ക്കുന്നതിനും നടുവേദന ഒഴിവാക്കുന്നതിനും സഹായിക്കും.
ഫിസിക്കല്‍ തെറാപ്പി: നിര്‍ദിഷ്ട വ്യായാമങ്ങള്‍ വഴക്കം മെച്ചപ്പെടുത്താനും ഇറുകിയ ഹാംസ്ട്രിംഗ് പേശികള്‍ നീട്ടാനും പുറകിലെയും ഉദരത്തിലെയും പേശികളെ ശക്തിപ്പെടുത്താനും സഹായിക്കും.
ബ്രേസിംഗ്: നട്ടെല്ലിലെ ചലനം പരിമിതപ്പെടുത്തുന്നതിനും സമീപകാല പാര്‍സ് ഒടിവ് സുഖപ്പെടുത്താന്‍ ചില രോഗികള്‍ക്ക് ഒരു കാലയളവിലേക്ക് ബാക്ക് ബ്രേസ് ധരിക്കേണ്ടി വന്നേക്കാം.
ചികിത്സാവേളയില്‍, കശേരുക്കളുടെ സ്ഥാനം മാറുന്നുണ്ടോ എന്ന് നിര്‍ണ്ണയിക്കാന്‍ ഡോക്ടര്‍ ഇടയ്ക്കിടെ എക്‌സ്-റേ എടുക്കാന്‍ ആവശ്യപ്പെട്ടേക്കാം.
2. ശസ്ത്രക്രിയാ ചികിത്സ
സ്‌പോണ്ടിലോലിസ്തസിസ് രോഗികള്‍ക്ക് ശസ്ത്രക്രിയ ശുപാര്‍ശ ചെയ്‌തേക്കാം:
- തീവ്രമോ ഉയര്‍ന്ന ഗ്രേഡ് സ്ലിപ്പേജ്
- ക്രമേണ വഷളാകുന്ന സ്ലിപ്പേജ്
- ശസ്ത്രക്രിയചെയ്യാത്ത ചികിത്സയുടെ ഒരു കാലയളവിന് ശേഷം മെച്ചപ്പെടാത്ത നടുവേദന
- അഞ്ചാമത്തെ ലംബാര്‍ കശേരുക്കളും സാക്രവും തമ്മിലുള്ള സ്‌പൈനല്‍ ഫ്യൂഷന്‍ സ്‌പോണ്ടിലോലിസ്തസിസ് ഉള്ള രോഗികളെ ചികിത്സിക്കാന്‍ ഏറ്റവും കൂടുതല്‍ ഉപയോഗിക്കുന്നത് ശസ്ത്രക്രിയാ നടപടിക്രമമാണ്.
ശസ്ത്രക്രിയാ നടപടിക്രമം
സ്‌പൈനല്‍ ഫ്യൂഷന്‍ അടിസ്ഥാനപരമായി ഒരു 'വെല്‍ഡിംഗ്' പ്രക്രിയയാണ്. ബാധിക്കപ്പെട്ട കശേരുക്കളെ സംയോജിപ്പിക്കും. അങ്ങനെ അവ ഒരൊറ്റ, ഖര അസ്ഥിയായി ഉണങ്ങുക എന്നതാണ് അടിസ്ഥാന ആശയം. ഫ്യൂഷന്‍ കേടായ കശേരുക്കള്‍ക്ക് ഇടയിലുള്ള ചലനം ഇല്ലാതാക്കുകയും നട്ടെല്ലിന്റെ അമിതമായ ചലനം എടുത്തുകളയുകയും ചെയ്യുന്നു.
നടപടിക്രമവേളയില്‍ ഡോക്ടര്‍ ആദ്യം ലംബാര്‍ നട്ടെല്ലിലെ കശേരുക്കളെ പുനക്രമീകരിക്കും. അസ്ഥി ഗ്രാഫ്റ്റ് (bone graft) എന്ന് വിളിക്കപ്പെടുന്ന ചെറിയ അസ്ഥി കഷണങ്ങള്‍ കശേരുക്കള്‍ക്ക് ഇടയിലുള്ള ഇടങ്ങളിലേക്ക് സംയോജിപ്പിക്കും. ചില സമയങ്ങളില്‍ പ്രത്യേകം രൂപകല്‍പ്പന ചെയ്ത ഇംപ്ലാന്റുകള്‍ ഉപയോഗിക്കുന്നു.
അസ്ഥി ഗ്രാഫ്റ്റ് സ്ഥാപിക്കുന്നതിന് മുന്‍പ്, നട്ടെല്ല് കൂടുതല്‍ സ്ഥിരീകരിക്കുന്നതിനും വിജയകരമായ സംയോജനത്തിന്റെ സാധ്യതകള്‍ മെച്ചപ്പെടുത്തുന്നതിനും റോഡുകളും സ്‌ക്രൂകളും ഉപയോഗിച്ചേക്കാം. കാലക്രമേണ, എല്ലുകള്‍ ഒരുമിച്ച് ഉണങ്ങുന്നു.
ചില സന്ദര്‍ഭങ്ങളില്‍, ഉയര്‍ന്ന ഗ്രേഡ് സ്ലിപ്പേജ് ഉള്ള രോഗികള്‍ക്ക് നട്ടെല്ലിന്റെ നാഡീവേരുകളുടെ ഞെരുക്കവും ഉണ്ടായിരിക്കും. ഇങ്ങനെയാണെങ്കില്‍, സ്‌പൈനല്‍ ഫ്യൂഷന്‍ നടത്തുന്നതിന് മുന്‍പ്് ആദ്യം സ്‌പൈനല്‍ കനാല്‍ തുറക്കുന്നതിനും ഞരമ്പുകളില്‍ സമ്മര്‍ദം ഒഴിവാക്കുന്നതിനും ഒരു നടപടിക്രമം നടത്തിയേക്കാം.
ചികിത്സയുടെ പരിണാമം
സ്‌പോണ്ടിലോലൈസിസ്, സ്‌പോണ്ടിലോലിസ്‌തെസിസ് എന്നിവയുള്ള രോഗികളില്‍ ഭൂരിഭാഗവും ചികിത്സയ്ക്ക് ശേഷം വേദനയും മറ്റ് രോഗലക്ഷണങ്ങളും ഇല്ലാത്തവരാണ്. മിക്ക സന്ദര്‍ഭങ്ങളിലും, സ്‌പോര്‍ട്‌സും മറ്റ് പ്രവര്‍ത്തനങ്ങളും ക്രമേണ പുനരാരംഭിക്കാന്‍ കഴിയും.
സങ്കീര്‍ണ്ണതകള്‍
സ്‌പോണ്ടിലോലിസ്തസിസിന്റെ ലക്ഷണങ്ങള്‍ ഒഴിവാക്കുന്നതിന് മെഡിക്കല്‍ ഇടപെടല്‍ നിര്‍ണായകമാണ്. ചികിത്സിക്കാതെ വിട്ടാല്‍ ഈ അവസ്ഥ വിട്ടുമാറാത്ത വേദനയ്ക്കും സ്ഥിരമായ കേടുപാടുകള്‍ക്കും കാരണമാകും. ഞരമ്പുകള്‍ക്ക് കേടുപാടുകള്‍ സംഭവിച്ചിട്ടുണ്ടെങ്കില്‍ ഒടുവില്‍ ബലഹീനതയും കാലിലെ തളര്‍ച്ചയും അനുഭവപ്പെട്ടേക്കാം. അപൂര്‍വസാഹചര്യങ്ങളില്‍ നട്ടെല്ലിന്റെ അണുബാധയും ഉണ്ടായേക്കാം. അതിനാല്‍ കൃത്യസമയത്തെ ചികിത്സയ്ക്ക് എന്നും മുന്‍തൂക്കം കൊടുക്കാം.
Content Highlights: Back Pain, Spondylolisthesis, Health, Spine Disorders
Published: 11 Mar 2022, 12:30 pm IST
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented