കൊടും ചൂടത്ത് ഉള്ളൊന്ന് തണുപ്പിക്കാന്‍ ഒരു ചെറിയ പെട്ടി ഐസ്‌ക്രീമെങ്കിലും ഫ്രിഡ്ജില്‍ സൂക്ഷിക്കുന്നവരാകും പലരും. പുറത്തുപോയി വന്ന് വലിയ ആവേശത്തില്‍ ഫ്രീസര്‍ തുറന്ന് ഐസ്ക്രീം എടുത്ത് സ്പൂണ്‍ ഇടുമ്പോള്‍ ഇളകാത്ത വിധം ഐസ്ക്രീം മരവിച്ചിരിക്കുകയാണെങ്കിലോ?
കഴിക്കാനെടുക്കുമ്പോള്‍ ഐസ്ക്രീം മൃദുലതയില്ലാതെ കല്ലുപോലെ ഉറഞ്ഞിരിക്കുകയാണെങ്കില്‍ അതിന് കാരണം ഫ്രീസറിൽ സൂക്ഷിച്ചതിൽ വന്ന പാകപ്പിഴയാകാം. ഭക്ഷണ പദാര്‍ത്ഥങ്ങള്‍ ഫ്രിഡ്ജില്‍ സൂക്ഷിക്കുന്നതിനുമുണ്ട് ചില പൊടിക്കൈകള്‍ എന്ന് ഓര്‍മിപ്പിക്കുന്നതാണ് ഡിജിറ്റല്‍ ക്രിയേറ്ററായ ഷഷാങ്ക് അല്‍ഷി പങ്കുവെച്ച വീഡിയോ.
Also Read
ഐസ്ക്രീം ബോക്‌സ് ഫ്രീസറില്‍ സൂക്ഷിക്കുന്നതിന് മുന്നോടിയായി ചില കാര്യങ്ങള്‍ ശ്രദ്ധിക്കണമെന്നാണ് വീഡിയോയില്‍ പറയുന്നത്. ഐസ്ക്രീം ടബ് സിപ് ലോക്ക് കവറിനുള്ളിലാക്കിയ ശേഷം വെള്ളത്തിലേക്ക് പതിയെ ഇറക്കി വെക്കുക. ഇതിന് ശേഷം കവര്‍ ലോക്ക് ചെയ്യുക. വാക്ക്വം സീല്‍ഡ് ആയ സിപ്പ് ലോക്ക് കവര്‍ ഫ്രീസറില്‍ സൂക്ഷിക്കാം, വീഡിയോയില്‍ പറയുന്നു.
ഫ്രീഡ്ജിന്റെ ഡോറിന്റെ അടുത്തു നിന്ന് മാറി ഫ്രീസറിന്റെ ഏറ്റവും പിന്നിലായി ഐസ്ക്രീം സൂക്ഷിക്കുന്നതും അമിതമായി ഐസ്ക്രീം കട്ടപിടിക്കുന്നത് തടയാനാകും.
ഇങ്ങനെയൊക്കെ ഫ്രീസറിൽ വെക്കാൻ ഐസ്ക്രീം വേണ്ടേ എന്നാണോ?
രുചികരമായ മാംഗോ ഐസ്ക്രീം വീട്ടില്‍ തയ്യാറാക്കി നോക്കിയാലോ..!
ആവശ്യമുള്ള സാധനങ്ങള്‍
- മധുരമുള്ള മാങ്ങ തൊലിമാറ്റിയതിന് ശേഷം ചെറുതായി മുറിച്ചത്- രണ്ട് കപ്പ്
- ഫുള്‍ഫാറ്റ് മില്‍ക്- രണ്ടര കപ്പ്
- കണ്ടന്‍സ്ഡ് മില്‍ക്ക്- രണ്ട് കപ്പ്
- പഞ്ചസാര- രണ്ടു ടേബിള്‍ സ്പൂണ്‍
- നാരങ്ങാനീര്- 100 മില്ലി
തയ്യാറാക്കുന്ന വിധം
മാമ്പഴവും പഞ്ചസാരയും കൂടി മിക്സിയിൽ അടിച്ചെടുക്കുക. ഇതിലേയ്ക്ക് ഫുള്‍ ഫാറ്റ് മില്‍ക്കും, കണ്ടന്‍സ്ഡ് മില്‍ക്കും ചേര്‍ത്ത് വീണ്ടും അടിക്കുക. ഇതിലേയ്ക്ക് നാരങ്ങാ നീര് ചേര്‍ത്ത് അടിച്ച് ക്ലിംഗ് ഫിലിംകൊണ്ട് മൂടി ഫ്രീസറില്‍ വയ്ക്കുക. ഫ്രീസാകുമ്പോള്‍ എടുത്ത് പൊട്ടിച്ച് മിക്‌സിയില്‍ ഒന്നുകൂടി അടിച്ച ശേഷം വീണ്ടും ഫ്രീസറില്‍ വയ്ക്കാം.
Content Highlights: Prevent hard-as-rock ice cream!
Published: 06 Apr 2025, 11:17 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented