മാമ്പഴക്കാലത്തെ നാടൻ വിരുന്ന്; ചുരക്ക-മാങ്ങ കറിയും മീൻ തക്കാളി റോസ്റ്റും!

മാങ്ങ ഇപ്പോൾ സുലഭമായി ലഭിക്കുന്ന സമയമല്ലേ... ചോറിനൊപ്പം പച്ചമാങ്ങയും ചുരക്കയും ചേർത്ത് ഒരു ഒഴിച്ച് കറി തയ്യാറാക്കിയാലോ... കൂടെ അല്പം എരിവോടെ രുചികരമായ മീൻ തക്കാളി റോസ്റ്റും.

ചേരുവകൾ 
ചുരക്ക - മാങ്ങാ കറി

ചുരക്ക - 100 ഗ്രാം
പച്ചമാങ്ങ - 1 ഇടത്തരം
തേങ്ങ ചിരകിയത് - 1 കപ്പ്
ചുവന്നുള്ളി - 7-8 എണ്ണം
വെളുത്തുള്ളി - 3,4 അല്ലി
പച്ചമുളക് - 2 എണ്ണം
മല്ലിപ്പൊടി - 1 ടീസ്പൂൺ
മുളക്പൊടി - 1/2 ടീസ്പൂൺ
മഞ്ഞൾപ്പൊടി - 1/4 ടീസ്പൂൺ
ജീരകം - 1/4 ടീസ്പൂൺ
കടുക് - 1/2 ടീസ്പൂൺ
വെളിച്ചെണ്ണ - 2 ടേബിൾസ്പൂൺ
കറിവേപ്പില - 2 തണ്ട്
വറ്റൽമുളക് - 2-3 എണ്ണം
ഉപ്പ് - പാകത്തിന്

തയ്യാറാക്കുന്ന വിധം 

• ചുരക്ക, മാങ്ങ തൊലി കളഞ്ഞു ചതുര കഷണങ്ങൾ ആക്കി മുറിച്ച് വെക്കുക.
• ഒരു ചട്ടിയിൽ ചുരക്ക, ചുവന്നുള്ളി അരിഞ്ഞത്, വെളുത്തുള്ളി, പച്ചമുളക്, മല്ലിപ്പൊടി, മുളക്പൊടി, മഞ്ഞൾപ്പൊടി, പാകത്തിന് ഉപ്പ്, വെള്ളം എന്നിവ ചേർത്ത് വേവിക്കുക.
• മുക്കാൽ വേവായാൽ മാങ്ങ കഷണങ്ങൾ കൂടെ ചേർത്ത് വേവിക്കുക.
• വെന്ത് കഴിഞ്ഞാൽ അതിലേക്ക് തേങ്ങ, ജീരകം എന്നിവ നന്നായി അരച്ചത് ചേർത്ത് യോജിപ്പിച്ച് പച്ചമണം മാറി വരുന്ന വരെ തുടരെ ഇളക്കി പാകം ചെയ്യുക.
• വെളിച്ചെണ്ണ ചൂടാക്കി കടുക് പൊട്ടിച്ച്, കറിവേപ്പില, ചുവന്നുള്ളി, വറ്റൽമുളക് എന്നിവ മൂപ്പിച്ച് കറിയിൽ ചേർക്കുക. ചൂടോടെ ചോറിനൊപ്പം വിളമ്പാം.

മീൻ തക്കാളി റോസ്റ്റ്

ചേരുവകൾ

മീൻ കഷണങ്ങൾ - 1/2 കിലോ
സവാള - 2 എണ്ണം
തക്കാളി - 2 വലുത്
ഇഞ്ചി വെളുത്തുള്ളി ചതച്ചത് - 1 ടേബിൾസ്പൂൺ
മുളക്പൊടി - 1+1/2 ടീസ്പൂൺ ടേബിൾസ്പൂൺ
മഞ്ഞൾപ്പൊടി - 1/2 ടീസ്പൂൺ
കുരുമുളക് പൊടി - 1/2 ടീസ്പൂൺ
പെരുംജീരകം - 1 ടീസ്പൂൺ
ഉലുവപൊടി - ഒരു നുള്ള്
വെളിച്ചെണ്ണ - പാകത്തിന്
കറിവേപ്പില - 2 തണ്ട്

തയ്യാറാക്കുന്ന വിധം

• 1/2 ടീസ്പൂൺ മുളക്പൊടി, 1/4 ടീസ്പൂൺ മഞ്ഞൾപ്പൊടി, കുരുമുളക് പൊടി, ഉലുവ പൊടി, അല്പം ഉപ്പ് എന്നിവ മീൻ കഷണങ്ങളിൽ പുരട്ടി അല്പസമയം വെക്കുക.
• ഒരു പാനിൽ എണ്ണ ചൂടാക്കി മീൻ വറുത്ത് മാറ്റി വെക്കുക.
• അതേ എണ്ണയിൽ പെരുംജീരകം മൂപ്പിച്ച് അതിലേക്ക് സവാള അരിഞ്ഞത്, ഇഞ്ചി വെളുത്തുള്ളി ചതച്ചത്, പച്ചമുളക്, കറിവേപ്പില എന്നിവ ചേർത്തു വഴറ്റുക.
• ചുവന്നു വരുമ്പോൾ ബാക്കിയുള്ള മസാലപൊടികൾ കൂടെ ചേർത്ത് മൂപ്പിക്കുക.
• അതിലേക്ക് തക്കാളി അരച്ചത് ചേർത്ത് യോജിപ്പിക്കുക. പാകത്തിന് ഉപ്പ് ചേർത്ത് കൊടുക്കുക.
• മസാല മൂത്ത് എണ്ണ തെളിഞ്ഞ് വരുമ്പോൾ അതിലേക്ക് മീൻ കഷണങ്ങൾ ചേർത്ത് കൊടുക്കാം.
• മസാല മീനിൽ പൊതിഞ്ഞ് വരുന്ന രീതിയിൽ യോജിപ്പിച്ച് അല്പസമയം മൂടി വച്ച് പാകം ചെയ്യുക. ചൂടോടെ വിളമ്പാം.