കാലാവസ്ഥാ വ്യതിയാനം രൂക്ഷമാകുന്ന സാഹചര്യത്തിൽ, അന്തരീക്ഷത്തിലെ കാർബൺ ആഗിരണം ചെയ്യാനുള്ള സമുദ്രങ്ങളുടെ ശേഷി ദുർബലമായിക്കൊണ്ടിരിക്കുകയാണെന്ന് ഐക്യരാഷ്ട്രസഭയുടെ മുന്നറിയിപ്പ്. അന്തരീക്ഷത്തിലേക്ക് പുറന്തള്ളുന്ന കാർബൺ ഡൈയോക്സൈഡിൻ്റെ ഏകദേശം 30 ശതമാനവും ആഗിരണം ചെയ്യുന്നത് സമുദ്രങ്ങളാണ്. ഹരിതഗൃഹ വാതകങ്ങൾ കാരണം ഭൂമിയിൽ തങ്ങിനിൽക്കുന്ന അധിക താപത്തിന്റെ 90 ശതമാനവും ആഗിരണം ചെയ്യുന്നത് സമുദ്രങ്ങളാണ്. എന്നാൽ, കാലാവസ്ഥാ വ്യതിയാനം കാരണം സമുദ്രങ്ങളുടെ കാർബൺ ആഗിരണ ശേഷിയിൽ ഇതിനകം ഏകദേശം ആറ് ശതമാനത്തിന്റെ കുറവ് വന്നിട്ടുണ്ടെന്ന് യു.എൻ റിപ്പോർട്ട് വ്യക്തമാക്കുന്നു.

To advertise here,

വരാനിരിക്കുന്ന കാലാവസ്ഥാ ഉച്ചകോടിയായ സിഒപി31-ന് മുന്നോടിയായി പുറത്തിറക്കിയ റിപ്പോർട്ടിലാണ് ഇതുസംബന്ധിച്ച വിശദാംശങ്ങൾ പരാമർശിക്കുന്നത്. യു.എൻ പരിസ്ഥിതി പ്രോഗ്രാമും യു.എൻ കാലാവസ്ഥാ സെക്രട്ടറിയേറ്റും സംയുക്തമായാണ് ഈ റിപ്പോർട്ട് തയ്യാറാക്കിയത്.

സമുദ്രത്തിലെ താപനില വർധനവ്, അമ്ലീകരണം, രാസമാറ്റങ്ങൾ, മലിനീകരണം എന്നിവ കാർബൺ സംഭരണ ശേഷിയെ ദുർബലപ്പെടുത്തുകയും അന്തരീക്ഷത്തിൽ കൂടുതൽ കാർബൺ ഡൈയോക്സൈഡ് അവശേഷിപ്പിക്കുകയും ചെയ്യുന്നു. ഇത് ഭൂമിയിൽ ചൂട് കൂടാൻ കാരണമാകും. ഈ പ്രക്രിയ ഭാവിയിൽ കൂടുതൽ വേഗത്തിലാകാൻ സാധ്യതയുണ്ടെന്ന് റിപ്പോർട്ടിന്റെ രചയിതാവായ സാറ ട്രെയറപ്പ് മുന്നറിയിപ്പ് നൽകുന്നു.

ദക്ഷിണ സമുദ്രം, ഇന്ത്യൻ മഹാസമുദ്രം, ആർട്ടിക്, തീരദേശ മേഖലകൾ എന്നിവിടങ്ങളിലെ കൃത്യമായ നിരീക്ഷണ സംവിധാനങ്ങളുടെ അഭാവം പ്രധാന വെല്ലുവിളിയാണെന്നും സാങ്കേതികവിദ്യ ഉപയോഗിച്ച് 'ഓഷ്യൻ കാർബൺ ഇന്റലിജൻസ്' ശക്തിപ്പെടുത്തണമെന്നും റിപ്പോർട്ട് ആവശ്യപ്പെടുന്നു.

കണ്ടൽക്കാടുകളും കടൽപ്പുല്ലുകളും ഉൾപ്പെടുന്ന 'ബ്ലൂ കാർബൺ' ആവാസവ്യവസ്ഥകൾ പ്രതിവർഷം 407 ദശലക്ഷം ടൺ കാർബൺ ഡൈയോക്സൈഡ് ആഗിരണംചെയ്യുന്നുണ്ട്. ഇവ പുനഃസ്ഥാപിക്കുന്നത് തീരദേശ സംരക്ഷണത്തിനും ജൈവവൈവിധ്യത്തിനും ഏറെ ഉപകരിക്കും. എങ്കിലും, കാർബൺ പുറന്തള്ളൽ കുറയ്ക്കുകയാണ് ഏറ്റവും ഫലപ്രദമായ മാറ്റമെന്നും റിപ്പോർട്ട് ചൂണ്ടിക്കാണിക്കുന്നു.