നെയ്യാർ: തിരുവനന്തപുരം സംരക്ഷിതവനമേഖലയിലെ ഉഭയ-ഉരഗ ജീവികളുടെ ആദ്യഘട്ട കണക്കെടുപ്പ് പൂർത്തിയായി. നെയ്യാർ, പേപ്പാറ വന്യജീവിസങ്കേതങ്ങൾ, അഗസ്ത്യവനം ബയോളജിക്കൽ പാർക്ക് ഉൾപ്പെടുന്ന 212 ചതുരശ്രകിലോമീറ്റർ വനമേഖലയിലാണ്‌ കണക്കെടുപ്പ്‌ നടന്നത്‌.

To advertise here,

67 ഇനം ഉഭയജീവികളെയും 80 ഇനം ഉരഗങ്ങളെയും രേഖപ്പെടുത്തി. കണ്ടെത്തിയ ഉഭയജീവികളിൽ 55 എണ്ണവും ഉരഗജീവികളിൽ 42 എണ്ണവും പശ്ചിമഘട്ടത്തിൽമാത്രം കാണുന്നവയാണ്‌. കണ്ടെത്തിയ ഒരിനം കുരുടിയും മൂന്നിനം കവചവാലൻ പാമ്പുകളും വിശദപഠനങ്ങൾക്ക് വിധേയമാക്കേണ്ടവയാണെന്ന്‌ ഗവേഷകൻ ഡോ. സന്ദീപ് ദാസ് പറഞ്ഞു.

വനംവകുപ്പും ആരണ്യകം നാച്വർ ഫൗണ്ടേഷനും ചേർന്നുനടത്തിയ കണക്കെടുപ്പിൽ സെയ്‌ന്റ് ജോസഫ്സ്‌ കോളേജ് ഇരിങ്ങാലക്കുട, കേരള വനഗവേഷണസ്ഥാപനം, കാലിക്കറ്റ് യൂണിവേഴ്സിറ്റി, കേരള യൂണിവേഴ്സിറ്റി, കേരള വെറ്ററിനറി സർവകലാശാല, ഫോറസ്‌ട്രി കോളേജ്, ഫാറൂഖ് കോളേജ് തുടങ്ങി പതിനഞ്ചോളം വിദ്യാഭ്യാസ-ഗവേഷണ സ്ഥാപനങ്ങളും മലബാർ നാച്വർ ഹിസ്റ്ററി സൊസൈറ്റി, ട്രാവൻകൂർ നാച്വറൽ ഹിസ്റ്ററി സൊസൈറ്റി തുടങ്ങിയ സംഘടനകളും വനപാലകരും പങ്കെടുത്തു.

തിരുവനന്തപുരം വന്യജീവി വിഭാഗം വൈൽഡ് ലൈഫ് വാർഡൻ ഐ.എസ്. സുരേഷ് ബാബു, ഗവേഷകരായ ഡോ. സന്ദീപ്ദാസ്, ഡോ. കെ.പി. രാജ്‌കുമാർ, നിതിൻ ദിവാകർ, അസിസ്റ്റൻറ് വൈൽഡ് ലൈഫ് വാർഡന്മാരായ ബ്രിജേഷ് വസന്തൻ, സലിൻ ജോസ്, അനീഷ് കുമാർ, ആരണ്യകം മാനേജിങ് ട്രസ്റ്റി എസ്. ധ്രുവരാജ്‌ എന്നിവർ നേതൃത്വം നൽകി.c