ന്യൂഡല്ഹി: ഗുസ്തി ഫെഡറേഷന് ഓഫ് ഇന്ത്യയുടെ മുന് അധ്യക്ഷന് ബ്രിജ് ഭൂഷണ് ശരണ് സിങ്ങിന്റെ മകന് കൈസര്ഗഞ്ചില് ബി.ജെ.പി. സ്ഥാനാര്ഥിത്വം ലഭിച്ചതിന് പിന്നാലെ പ്രതികരണവുമായി ഗുസ്തിതാരം സാക്ഷി മാലിക്.
രാജ്യത്തിന്റെ പെണ്മക്കള് തോറ്റുപോയെന്നും ബ്രിജ് ഭൂഷണ് വിജയിച്ചുവെന്നും അവര് സാമൂഹികമാധ്യമമായ എക്സില് കുറിച്ചു. കൈസര്ഗഞ്ചിലെ സിറ്റിങ് എം.പിയായ ബ്രിജ് ഭൂഷണിനെ മാറ്റിയാണ് അദ്ദേഹത്തിന്റെ ഇളയമകന് കരണ് ഭൂഷണ് സിങ്ങിനെ പാര്ട്ടി സ്ഥാനാര്ഥിയാക്കിയത്.
"ഞങ്ങള് എല്ലാവരും ഞങ്ങളുടെ കായികജീവിതം പണയപ്പെടുത്തി. ദിവസങ്ങളോളം തെരുവില് വെയിലത്തും മഴയത്തും ഉറങ്ങി. എന്നാല് ഇന്നുവരെ ബ്രിജ് ഭൂഷണെ അറസ്റ്റ് ചെയ്തിട്ടില്ല. ഞങ്ങള് നീതി മാത്രമാണ് ആവശ്യപ്പെടുന്നത്", സാക്ഷി എക്സിലെ കുറിപ്പില് പറയുന്നു.
ബ്രിജ് ഭൂഷണിന്റെ മകന് സ്ഥാനാര്ഥിത്വം നല്കുകവഴി രാജ്യത്തെ കോടിക്കണക്കിന് പെണ്മക്കളുടെ മനോവീര്യം തകര്ത്തിരിക്കുകയാണ്. സ്ഥാനാര്ഥിത്വം പോയിരിക്കുന്നത് അതേ കുടുംബത്തിലേക്കാണ്. കേന്ദ്രസര്ക്കാര് ഒരാള്ക്ക് മുന്പില് ഇത്രയ്ക്ക് ദുര്ബലമാകുന്നുവോ എന്നും സാക്ഷി ആരാഞ്ഞു.
ഗുസ്തി ഫെഡറേഷന് അധ്യക്ഷനായിരിക്കേ വനിതാ ഗുസ്തി താരങ്ങളെ ലൈംഗികമായി ചൂഷണം ചെയ്തുവെന്ന ആരോപണങ്ങളുടെ പശ്ചാത്തലത്തില് ബ്രിജ് ഭൂഷണിനെതിരേ വന് പ്രതിഷേധമായിരുന്നു കഴിഞ്ഞവര്ഷം നടന്നത്. സാക്ഷി മാലിക്, ബജ്രംഗ് പുനിയ, വിനേഷ് ഫോഗട്ട് തുടങ്ങി നിരവധി താരങ്ങള് ഡല്ഹിയില് പ്രതിഷേധവുമായി രംഗത്തെത്തിയിരുന്നു.
Content Highlights: sakshi malik responds after brij bhushan saran singh son gets bjp candidature
Published: 02 May 2024, 09:29 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented