ന്യൂഡല്‍ഹി: പഞ്ചാബില്‍നിന്നുള്ള കോണ്‍ഗ്രസ് എം.പി. രവ്‌നീത് സിങ് ബിട്ടു ബി.ജെ.പിയില്‍ ചേര്‍ന്നു. ലുധിയാനയില്‍നിന്നുള്ള എം.പിയാണ് രവ്‌നീത് സിങ് ബിട്ടു. കഴിഞ്ഞ ജനുവരിയില്‍ കോണ്‍ഗ്രസ് രൂപവത്കരിച്ച പഞ്ചാബിലെ 27 അംഗ തിരഞ്ഞെടുപ്പ് സമിതിയില്‍ അംഗമാണ്‌.

To advertise here,

1995-ല്‍ കൊല്ലപ്പെട്ട മുന്‍ പഞ്ചാബ് മുഖ്യമന്ത്രി ബിയാന്ത് സിങ്ങിന്റെ ചെറുമകനാണ്. രാഹുല്‍ഗാന്ധി ഏര്‍പ്പെടുത്തിയ സംഘടനാ തിരഞ്ഞെടുപ്പിലൂടെ ആദ്യമായി ജനാധിപത്യ രീതിയില്‍ പഞ്ചാബില്‍ യൂത്ത് കോണ്‍ഗ്രസ് അധ്യക്ഷനായി തിരഞ്ഞെടുക്കപ്പെട്ടത് ഇദ്ദേഹമാണ്.

കോണ്‍ഗ്രസ് നേതൃത്വത്തെ വിമര്‍ശിച്ച് കത്തെഴുതിയ ജി-23 നേതാക്കളെ ഒതുക്കുന്നതിന്റെ ഭാഗമായി പാര്‍ലമെന്ററി പാര്‍ട്ടിയില്‍ അന്നത്തെ എ.ഐ.സി.സി. പ്രസിഡന്റ് സോണിയാഗാന്ധി മാറ്റങ്ങള്‍ വരുത്തിയപ്പോള്‍ ബിട്ടു ലോക്‌സഭയിലെ വിപ്പായി നിയമിക്കപ്പെട്ടിരുന്നു.

പഞ്ചിമബംഗാള്‍ നിയമസഭാ തിരഞ്ഞെടുപ്പ് കാലത്ത് സംസ്ഥാന പ്രസിഡന്റ് കൂടിയായ അധീര്‍ രഞ്ജന്‍ ചൗധരിക്ക് പ്രചാരണരംഗത്ത് സജീവമാകേണ്ടിവന്നപ്പോള്‍, ബിട്ടുവിനെ താത്കാലികമായി ലോക്‌സഭാ കക്ഷിനേതാവാക്കി. 2009-ല്‍ അനന്ത്പുര്‍ സാഹിബില്‍നിന്ന്‌ ആദ്യമായി ലോക്‌സഭയിലെത്തിയ ബിട്ടു 2014-ലും 2019-ലും ലുധിയാനയില്‍നിന്നാണ് ജയിച്ചത്.