ബി.ജെ.പി. കൊണ്ടുപോകുന്നത് കേരളത്തിലെ ഇടതുവോട്ടുകളോ? വോട്ട് വിഹിതം പറയുന്നത് നോക്കാം

ലക്ഷ്യംവെക്കുന്നത് ഇരുപതിൽ ഇരുപത്. ഒരു സീറ്റിലെ തോൽവി പോലും താങ്ങാനാവില്ല. എങ്കിലും കഴിഞ്ഞ തവണ വീശിയ കാറ്റല്ല ഇക്കുറി അടിക്കുന്നതെന്ന് ഐക്യ ജനാധിപത്യ മുന്നണിക്ക് അറിയാം. പ്രതീക്ഷയും പ്രാർത്ഥനയുമാണ് അവസാനഘട്ടത്തിൽ യു.ഡി.എഫിനെ മുന്നോട്ടുനയിക്കുന്നത്. 

കഴിഞ്ഞ തവണ ഒപ്പം നിന്നത് ആലപ്പുഴ മാത്രം. ഇക്കുറി അതിനു മുകളിൽ എത്ര സീറ്റ് കിട്ടിയാലും ബോണസ്.  ആറ്റിങ്ങൽ, മാവേലിക്കര, ആലത്തൂർ, പാലക്കാട്, കണ്ണൂർ, തൃശൂർ മണ്ഡലങ്ങൾ പ്രതീക്ഷ പകരുന്നുമുണ്ട്. ന്യൂനപക്ഷം ഒപ്പം നിന്നാൽ കാസർകോടും വടകരയും കൈയിലിരിക്കുമെന്നും ഇടതുപക്ഷം കരുതുന്നു. 

2014 വരെ കരയ്ക്കിരുന്നു കളി കാണുകയായിരുന്നു ബി.ജെ.പി. അവിടന്നിങ്ങോട്ട് രണ്ട് ലോക്‌സഭ തിരഞ്ഞെടുപ്പിലും കളത്തിലിറങ്ങി നന്നായി കളിച്ചവർ. ചില മണ്ഡലത്തിൽ ഇരുപത് ശതമാനത്തിലധികം വോട്ട് ഷെയറോടെ ഇരുമുന്നണികളുടെ നെഞ്ചിടിപ്പേറ്റി. ബി.ജെ.പിയുടെ വളർച്ച ഇരുമുന്നണികളേയും ബാധിച്ചിട്ടുണ്ടെങ്കിലും ചോർച്ച കൂടുതലും സംഭവിച്ചത് ഇടത് വോട്ടുബാങ്കിനായിരുന്നു. 

കഴിഞ്ഞ മൂന്ന് തിരഞ്ഞെടുപ്പിൽ എൽ.ഡി.എഫിന്റെ വോട്ടുവിഹിതവും വോട്ടുകണക്കും പറയുന്നതെന്ത് ?

കാസർകോട് 

2009-ൽ 3,85,522 വോട്ടുകളാണ് കാസർകോട് ലോക്‌സഭ മണ്ഡലത്തിൽ ഇടതുപക്ഷത്തിന്‌ ലഭിച്ചത്. 2014-ൽ അത് 3,84,964 ആയി. 2019-ൽ 4,34,523 വോട്ടുകൾ. വോട്ടുകൾ വർധിച്ചിട്ടുണ്ടെങ്കിലും വോട്ട് ഷെയർ പരിശോധിക്കുമ്പോഴാണ് എൽ.ഡി.എഫിന്റെ ചിത്രം വ്യക്തമാവുക. 2009-ൽ 45.5% ആയിരുന്നെങ്കിൽ 2014-ലും 2019-ലും 39.5% ആണ് വോട്ട് ഷെയർ. അതായത് കഴിഞ്ഞ പത്ത് വർഷം കൊണ്ട് ഏറിയുമില്ല കുറഞ്ഞുമില്ല. പുതുവോട്ടർമാരെ ഇടതുപക്ഷത്തേക്ക്‌ ആകർഷിക്കാൻ മണ്ഡലത്തിനായില്ലെന്ന് സാരം. അതേസമയം, യു.ഡി.എഫ്. വോട്ട് വിഹിതം വർധിപ്പിച്ചു. 40,438 വോട്ടിന്റെ ഭൂരിപക്ഷത്തിലാണ് യു.ഡി.എഫ്. 2019-ൽ രാജ്‌മോഹൻ ഉണ്ണിത്താനിലൂടെ മണ്ഡലം പിടിച്ചത്. 

കണ്ണൂർ

2009-ൽ 3.89 ലക്ഷം, 2014-ൽ 4.27 ലക്ഷം 2019-ൽ 4.35 ലക്ഷം എന്നിങ്ങനെയാണ് കണ്ണൂർ ലോക്‌സഭ മണ്ഡലത്തിൽ എൽ.ഡി.എഫിന്റെ പെട്ടിയിൽ വീണ വോട്ടുകൾ. അതായത് വോട്ട് വിഹിതം യഥാക്രമം 45.1%, 45.2%, 40.05%. 2014-ൽ ഇടത് സ്ഥാനാർഥിയായ പി.കെ. ശ്രീമതിയാണ് വിജയിച്ചതെങ്കിലും വോട്ട് ശതമാനത്തിൽ പോയിന്റ് ഒരു ശതമാനം മാത്രമാണ് വർധനവുണ്ടാക്കാനായത്. എന്നാൽ 2009-ലുണ്ടായിരുന്ന 50.1% എന്ന വോട്ട് വിഹിതം 2019-ലെത്തിയപ്പോൾ യു.ഡി.എഫ് 50.4 ശതമാനത്തിലെത്തിച്ചു. അപ്പോഴും നഷ്ടമുണ്ടായത് എൽ.ഡി.എഫിന്. ബി.ജെ.പിക്ക് ലഭിച്ചതാകട്ടെ യഥാക്രമം 3.01%, 5.5%, 6.5% എന്നിങ്ങനെ

വടകര

അവസാനം നടന്ന മൂന്ന് ലോക്‌സഭ തിരഞ്ഞെടുപ്പുകളിലെ(2009, 2014, 2019) എൽ.ഡി.എഫ്. വോട്ടുകൾ യഥാക്രമം 3.65 ലക്ഷം, 4.13 ലക്ഷം, 4.42 ലക്ഷം എന്നിങ്ങനെയായിരുന്നു. എണ്ണത്തിൽ വർധന ഉണ്ടായെങ്കിലും ആകെ വോട്ടർമാരുടെ എണ്ണമെടുത്താൽ ചെറിയ തോതിൽ മാത്രം. 2009-ൽ 42.3%, 2014-ൽ 43.41%, 2019-ൽ 41.49% എന്നിങ്ങനെയാണ് വോട്ട് വിഹിതം. എന്നാൽ, 2009-ൽ ഇടതുപക്ഷത്തിന് ഉണ്ടായിരുന്ന 48.8 ശതമാനത്തിന്റെ വോട്ട് ഷെയർ 2019 ആയപ്പോഴേക്കും യു.ഡി.എഫിലേക്ക് ചേക്കേറി. 2019-ൽ യു.ഡി.എഫിന് ലഭിച്ചത് 49.43%. പഴയ വോട്ടർമാർ ചോരുകയും പുതിയവർ കൈവിടുകയും ചെയ്തു.  2019 ഒഴിച്ചാൽ ബാക്കി എല്ലാ തവണയും വോട്ട് ശതമാനത്തിൽ നേരിയ വ്യത്യാസം മാത്രം കാണിക്കുന്ന വടകര ആർക്കൊപ്പം നിൽക്കുമെന്നതിൽ പുതിയ വോട്ടുകൾ നിർണായകമാകും 

വയനാട് 

2019-ൽ രാഹുൽ ഗാന്ധി മണ്ഡലത്തിലെത്തിയത് എൽ.ഡി.എഫിന് വൻതിരിച്ചടിയായി. 2009-ൽ ബി.ജെ.പിക്ക് ഉണ്ടായിരുന്ന 3.9% വോട്ട് പിന്നീട് 8.3 ആവുകയും 2019-ലത് ഒരു ശതമാനം കുറഞ്ഞ് 7.23% ആവുകയും ചെയ്തപ്പോൾ 25.19% മാത്രമായി എൽ.ഡി.എഫിന്റെ വോട്ട് ഷെയർ. അതായത് യു.ഡി.എഫിലേക്ക്‌ ഒഴുകിപ്പോയ വോട്ടത്രയും എൽ.ഡി.എഫിന്റേതെന്ന് സാരം. ഇത്തവണ വയനാട്ടിൽ അൽപം കൂടി ആത്മവിശ്വാസം വെയ്ക്കുന്നുണ്ട് എൽ.ഡി.എഫ്.

കോഴിക്കോട്

2009-ലാണ് എം.കെ. രാഘവൻ യു.ഡി.എഫ്. ടിക്കറ്റിൽ കോഴിക്കോട്ടെത്തുന്നത്. മുഹമ്മദ് റിയാസായിരുന്നു എൽ.ഡി.എഫ് സ്ഥാനാർഥി. ഇഞ്ചോടിഞ്ച് പോരാട്ടത്തിനൊടുവിൽ 838 വോട്ടുകൾക്ക് എം.കെ. രാഘവൻ വിജയിച്ചു. അന്ന് യു.ഡി.എഫിന് 42.9%, എൽ.ഡി.എഫ് 42.8%, ബിജെപി 11.3% എന്നിങ്ങനെയായിരുന്നു വോട്ട് ഷെയർ. യു.ഡി.എഫും എൽ.ഡി.എഫും വോട്ട് ഷെയർ വ്യത്യാസം 0.1%. 2014-ൽ യു.ഡി.എഫിന് നഷ്ടമായത് 0.7% വോട്ടുകളാണെങ്കിൽ എൽ.ഡി.എഫിന് നഷ്ടമായത് 2.4% വോട്ടുകളാണ്. 2019-ലെ യുഡിഎഫ് തരംഗത്തിൽ എം.കെ.രാഘവന്റെ വോട്ട് ഷെയർ 45.85% ആയി വർധിച്ചപ്പോൾ കോഴിക്കോട്ടെ  ജനസമ്മതനായ എ. പ്രദീപ് കുമാർ എം.എൽ.എയെ നിർത്തിയിട്ട് പോലും 37.93 ശതമാനമായിരുന്നു എൽ.ഡി.എഫിന്റെ വോട്ട് ഷെയർ. വീണ്ടും മൂന്ന് ശതമാനത്തോളം വോട്ട് ചോർച്ച. 11.3 ശതമാനമായിരുന്നു 2009-ൽ ബി.ജെ.പിയുടെ വോട്ട് ഷെയർ. അത് 12.3 ശതമാനത്തിലേക്കും 14.98 ശതമാനത്തിലേക്കുമെത്തി. ഈ മൂന്ന് തവണയും മൂന്ന് പാർട്ടികളും വോട്ട് വർധിപ്പിച്ചുവെങ്കിലും നേരിയ വർധന മാത്രമാണ് എൽ.ഡി.എഫിന് കോഴിക്കോട്ട്‌ ഉണ്ടായതെന്ന് കാണാം

മലപ്പുറം, പൊന്നാനി 

യു.ഡി.എഫിന്റെ ശക്തികേന്ദ്രമാണ് മലപ്പുറവും പൊന്നാനിയും. മലപ്പുറത്ത് 2009-ൽ 39.9 ശതമാനമായിരുന്നു എൽ.ഡി.എഫിന്റെ വോട്ട് ഷെയർ. പക്ഷേ, 2014-ൽ 31.87 ശതമാനമായി. 2019-ൽ യു.ഡി.എഫിന്റെ വോട്ട് ഷെയർ ആകട്ടെ കഴിഞ്ഞ മൂന്ന് തവണയും 51 ശതമാനത്തിന് താഴേക്ക് പോയിട്ടേയില്ല.

വോട്ട് ഷെയറിന്റെ കാര്യത്തിൽ 2009-ൽ എൽ.ഡി.എഫും യു.ഡി.എഫും തമ്മിലുണ്ടായ അന്തരം എട്ട് ശതമാനമായിരുന്നു. 2014-ലേക്ക് വന്നപ്പോൾ അത് മൂന്ന് ശതമാനത്തോളം മാത്രമായി. എന്നാൽ 2019-ൽ 19 ശതമാനമായി. ബിജെപി 7.5 ശതമാനത്തിൽനിന്ന് 8.6 ശതമാനത്തിലേക്കും പിന്നീട് 10.87 ശതമാനത്തിലേക്കും വളർന്നു. അവിടേയും വോട്ട് ചോർച്ച ബാധിച്ചത് എൽ.ഡി.എഫിനെ.

പാലക്കാട് 

ഇടത് സ്വഭാവമുള്ള പാലക്കാട് വോട്ട് ഷെയർ മാത്രമല്ല വോട്ടും എൽ.ഡി.എഫിന് കുറഞ്ഞ തിരഞ്ഞെടുപ്പായിരുന്നു 2019. 2009-ലും 2014-ലും ജയിച്ച എം.ബി രാജേഷിന്  പക്ഷേ വിജയം ആവർത്തിക്കാൻ കഴിഞ്ഞില്ല. 11,637 വോട്ടിന്റെ ലീഡിൽ വി.കെ. ശ്രീകണ്ഠനിലൂടെ യു.ഡി.എഫ്. മണ്ഡലം പിടിച്ചപ്പോൾ ചോർന്ന വോട്ട് ഷെയർ കണക്ക് കൂടി പറയാം. 2009-ൽ 0.2% ആയിരുന്നു എൽ.ഡി.എഫ്- യുഡിഎഫ് വോട്ട് ഷെയർ വ്യത്യാസം. എന്നാൽ, 2014-ൽ എൽ.ഡി.എഫ് വോട്ട് വിഹിതം മൂന്ന് ശതമാനത്തോളും കൂട്ടി. യു.ഡി.എഫിന് കുറഞ്ഞതാവട്ടെ 9 ശതമാനത്തോളം. 8.7 ശതമാനം വോട്ട് ഷെയർ പിടിച്ച ബിജെപി അത് 15 ശതമാനത്തിലേക്കുയർത്തി. വോട്ട് ചോർച്ച സംഭവിച്ചത് യു.ഡി.എഫിന്. എന്നാൽ 2019-ൽ യു.ഡി.എഫ് വീണ്ടും വോട്ട് വിഹിതമുയർത്തി. 38.83%. എൽ.ഡി.എഫ്. 45.4-ൽ നിന്ന് പോയത് 37.7 ശതമാനത്തിലേക്ക്. ബിജെപിയുടെ വോട്ട് വിഹിതം 21.26%. 2009-ൽ  ആഞ്ഞടിച്ച യു.ഡി.എഫ്. തരംഗത്തിലും നേട്ടമുണ്ടാക്കിയത് എൻ.ഡി.എ.

ആലത്തൂർ 

അവസാനത്തെ മൂന്ന് ലോക്‌സഭ തിരഞ്ഞെടുപ്പുകൾ കഴിഞ്ഞപ്പോൾ 20% വോട്ടുകളാണ് എൽ.ഡി.എഫിന് നഷ്ടമായത്. 2009-ൽ 46.8%, 2014-ൽ 44.41%, 2019-ൽ 34.58% എന്നിങ്ങനെയാണ് എൽ.ഡി.എഫിന്റെ വോട്ട് ഷെയർ. അതേസമയം യു.ഡി.എഫ് 8% വർധിപ്പിച്ചു. ബി.ജെ.പി. കാര്യമായി നേട്ടമുണ്ടാക്കാത്ത മണ്ഡലം കൂടിയാണ് ആലത്തൂർ. 6.5%, 9.45%, 8.82% എന്നിങ്ങനെയാണ് എൻ.ഡി.എ വോട്ട്‌ഷെയർ. 

തൃശൂർ, ചാലക്കുടി 

എൽ.ഡി.എഫ് വോട്ട് ഷെയറിൽ കാര്യമായ ഇടിവ് സംഭവിച്ച മണ്ഡലങ്ങളിലൊന്നാണ് തൃശൂർ. എൽ.ഡി.എഫ് വോട്ട് ഷെയർ 44.1 ശതമാനത്തിൽനിന്ന് 42.3ശതമാനത്തിലേക്കും അവിടെ നിന്ന് 12% കുറഞ്ഞ് 30.8 ശതമാനത്തിലേക്കും പോയതായി കാണാം. 2019-ൽ ടി.എൻ പ്രതാപനിലൂടെമണ്ഡലം പിടിച്ച യു.ഡി.എഫിനാകട്ടെ 39.83% ആണ് വോട്ട് ഷെയർ. 2009-ൽ വെറും 6.7 ശതമാനത്തിൽനിന്ന് ബി.ജെ.പിയുടെ വോട്ട് ഷെയർ പോയത് 11.2 ശതമാനത്തിലേക്കും അവിടെനിന്ന് 28.89 ശതമാനത്തിലേക്കുമാണ്. ചാലക്കുടിയിലും എൽ.ഡി.എഫിന് കഴിഞ്ഞ രണ്ട് തിരഞ്ഞെടുപ്പിലും വോട്ട് ഷെയർ താഴേക്കാണ്. 41.3 ശതമാനത്തിൽനിന്ന് 40.5 ശതമാനത്തിലേക്കും അവിടെനിന്ന് 34.45 ശതമാനത്തിലേക്കും വോട്ട് ഷെയർ താഴ്ന്നു.

എറണാകുളം 

യു.ഡി.എഫ്. സ്വാഭാവമുള്ള മണ്ഡലമാണ് എറണാകുളം. എന്നാൽ ഇവിടേയും 2009-ൽ യു.ഡി.എഫും എൽ.ഡി.എഫും തമ്മിലുള്ള വോട്ട് ഷെയർ വ്യത്യാസം വെറും രണ്ട് ശതമാനം മാത്രമായിരുന്നു. എന്നാൽ 2014-ൽ വോട്ട് ഷെയർ വ്യത്യാസം 10 ശതമാനവും 2019-ലത് 13 ശതമാനവുമായി. ഏറിയും കുറഞ്ഞും വലിയ മാറ്റമില്ലാതെ യു.ഡി.എഫ് പിടിച്ച മണ്ഡലത്തിൽ കൃത്യമായി വളർച്ച രേഖപ്പെടുത്തുന്നത് എൻ.ഡി.എ ആണ്. 7.1%, 11.6%, 14.24%. 

ഇടുക്കി, കോട്ടയം 

2014-ൽ എൽ.ഡി.എഫിനൊപ്പം നിന്ന ഇടുക്കി 2019-ൽ ഡീൻ കുര്യാക്കോസിലൂടെ യു.ഡി.എഫ്. തിരിച്ചുപിടിച്ചു. 2014-ൽ എൽ.ഡി.എഫിന്റെ വോട്ട് ഷെയർ 46.6 ശതമാനമായിരുന്നെങ്കിൽ 2019-ലെത്തുമ്പോൾ 35.69 ശതമാനത്തിലേക്കെത്തി. എന്നാൽ യു.ഡി.എഫ് 40 ശതമാനത്തിൽ നിന്ന് 54 ശതമാനത്തിലേക്കെത്തി. 2009-ൽ 3.6% മാത്രം വോട്ട് ഷെയർ മാത്രമുണ്ടായിരുന്ന ബി.ജെ.പി. ആറിലേക്കും പിന്നീട് 8.57 ശതമാനത്തിലേക്കും നില മെച്ചപ്പെടുത്തി. 

യു.ഡി.എഫ്. സിറ്റിങ് എം.പിയായ തോമസ് ചാഴിക്കാടൻ മറുകണ്ടം ചാടി ഇന്ന് എൽ.ഡി.എഫിനൊപ്പമാണ്. ഓരോ തിരഞ്ഞടുപ്പ് കഴിയുമ്പോഴും എൽ.ഡി.എഫിന് വോട്ട് ഷെയർ കുറഞ്ഞുവരുന്നതാണ് കണക്കുകൾ. 41.3 ശതമാനത്തിൽ നിന്ന് 36.5 ശതമാനത്തിലേക്കും അവിടെ നിന്ന്‌ 34.58 ശതമാനത്തിലേക്കും വോട്ട് ഷെയർ താഴ്ന്നു.

ആലപ്പുഴ

ആലപ്പുഴയിൽ കഴിഞ്ഞ തവണ വിജയിച്ചത് എൽ.ഡി.എഫ്. ആണെങ്കിലും വോട്ട് ഷെയറിൽ കാര്യമായ ചലനമുണ്ടാക്കാൻ ഇടതിനായിരുന്നില്ല. 2009-ൽ 44.4 ശതമാനമുണ്ടായിരുന്ന എൽ.ഡി.എഫ് വോട്ട് ഷെയർ 2014-ൽ 44.4 ശതമാനത്തിലേക്കും 2019-ൽ 40.94 ശതമാനത്തിലേക്കുമെത്തി. ഫലത്തിൽ ആലപ്പുഴയിൽ നേട്ടമുണ്ടാക്കിയത് എൻ.ഡി.എ ആണ്. 2009-ൽ 2.2 ശതമാനമായിരുന്നു ബി.ജെ.പിയുടെ വോട്ട്‌ഷെയർ. എന്നാൽ 2019-ൽ കെ.എസ്. രാധാകൃഷ്ണനിലൂടെ ബി.ജെ.പി. അത് 17.2% ആക്കി. എൽ.ഡി.എഫിൽ നിന്നും യു.ഡി.എഫിൽ നിന്നും പോയ വോട്ടുകൾ ഗുണകരമായത് എൻ.ഡിഎയ്‌ക്കെന്ന് സാരം.

മാവേലിക്കര

മാവേലിക്കരയെടുത്താൽ കഴിഞ്ഞ മൂന്ന് തവണയും കൊടിക്കുന്നിൽ സുരേഷ് ആണ് യു.ഡി.എഫ്. നായകൻ. വോട്ട് ഷെയർ 49.4%, 45.3%, 45.44%. എന്നാൽ മൂന്ന് തവണയും എൽ.ഡി.എഫിന്റെ വോട്ട് ഷെയർ താഴേക്കാണ്. 43.4%, 41.6%, 39%. ബി.ജെ.പി. 5.1%, 9%, 13.79%. എന്നാൽ വോട്ടുകളുടെ എണ്ണം മൂന്ന് മുന്നണിക്കും വർധിച്ചിട്ടുണ്ട്. 

പത്തനംതിട്ട

യു.ഡി.എഫ്. സ്വഭാവമുള്ള പത്തനംതിട്ടയിൽ മൂന്ന് തവണയും ആന്റോ ആന്റണി വിജയിച്ചെങ്കിലും എൽ.ഡി.എഫിന്റെയും യു.ഡി.എഫിന്റെയും വോട്ട് ഷെയർ ഒരു പോലെ കുറയുന്നത് കാണാം. 51.2%, 41.3%, 37.1% എന്നിങ്ങനെയാണ് മൂന്ന് തിരഞ്ഞെടുപ്പിലെ യു.ഡി.എഫ് വോട്ട് ഷെയറെങ്കിൽ  37.3%, 34.8%, 32.79% എന്നിങ്ങനെയാണ് എൽ.ഡി.എഫ്. വോട്ട് ഷെയർ.  2009-ൽ 7.1 ശതമാനമുണ്ടായിരുന്ന ബി.ജെ.പി. 16 ശതമാനത്തിലേക്കും അവിട നിന്ന് 28.97 ശതമാനവുമാക്കി വോട്ട് ഷെയർ വർധിപ്പിച്ചു. 

കൊല്ലം 

കഴിഞ്ഞ മൂന്ന് തവണയും പ്രേമചന്ദ്രനിലൂടെ യു.ഡി.എഫ്. നിലനിർത്തിയ മണ്ഡലം. 45.19%, 46.5%, 51.7% എന്നിങ്ങനെയാണ് യു.ഡി.എഫ്. വോട്ട് ഷെയർ. എന്നാൽ എല്ലാ തവണയും എൽ.ഡി.എഫിന് വോട്ട് ഷെയർ ഗണ്യമായി കുറഞ്ഞു. 2009-ൽ 45.19% ആയിരുന്നു എൽ.ഡി.എഫ് വോട്ട് ഷെയർ. 2014-ൽ അത് 42.2 ശതമാനത്തിലേക്കും 2019-ൽ അത് 36.13% ആയും കുറഞ്ഞു. അതായത് 14 ശതമാനത്തോളം വോട്ട് ചോർച്ച. 4.4%, 6.7%, 10.64% എന്നിങ്ങനെയാണ് ബി.ജെ.പി. വോട്ട് ഷെയർ വർധിപ്പിച്ചത്. 

ആറ്റിങ്ങൽ

2009-ലും 2014-ലും എ. സമ്പത്തിലൂടെ എൽ.ഡി.എഫിനൊപ്പം വന്ന മണ്ഡലമാണ് ആറ്റിങ്ങൽ. എന്നാൽ, 2019-ൽ അടൂർ പ്രകാശിലൂടെ യു.ഡി.എഫ്. മണ്ഡലം പിടിച്ചു. 45.37% ഉണ്ടായിരുന്ന എൽ.ഡി.എഫ് വോട്ട്‌ഷെയർ 2014-ൽ 45.67% ആയി. എന്നാൽ 2019-ൽ അത് 34.06 ശതമാനത്തിലേക്കെത്തി. 42.83%, 37,6%, 38.34% എന്നിങ്ങനെയാണ് യു.ഡി.എഫ് വോട്ട് ഷെയർ. എന്നാൽ എൻ.ഡി.എ 6.59 ശതമാനത്തിൽ നിന്ന് 10.53 ശതമാനത്തിലേക്കും അവിടെനിന്ന് 24.67 ശതമാനത്തിലേക്കും മാറിയപ്പോൾ ചോർന്നത് ഭൂരിഭാഗവും എൽ.ഡി.എഫിന്റെ വോട്ടുകളായിരുന്നു

തിരുവനന്തപുരം

മൂന്ന് തവണയും ശശി തരൂരാണ് തിരുവനന്തപുരം മണ്ഡലത്തെ പ്രതിനിധീകരിച്ചത്. യു.ഡി.എഫും എൻ.ഡി.എയും നേട്ടമുണ്ടാക്കിയ മണ്ഡലത്തിൽ മോശം പ്രകടനം എൽ.ഡി.എഫിന്റേതു തന്നെയായിരുന്നു. 2009-ൽ 30.74%, 2014-ൽ 28.5%, 2019-ൽ 25.6% ആണ് എൽ.ഡി.എഫ്. വോട്ട് ഷെയർ. 44.29%, 34.1%, 41.2% എന്നിങ്ങനെയാണ് യു.ഡി.എഫ്. വോട്ട് ഷെയർ. യു.ഡി.എഫ് തരംഗമുണ്ടായിട്ട് പോലും ഇവിടെ യു.ഡി.എഫിന് വോട്ട് ഷെയർ കുറഞ്ഞു. 2009-ൽ വെറും 11.4 ശതമാനമായിരുന്ന വോട്ട് ഷെയർ 2014-ൽ എൻ.ഡി.എ. 32 ശതമാനമാക്കി. 2019-ൽ എൻ.ഡി.എയുടെ വോട്ട് ഷെയർ ഒരു ശതമാനം മാത്രം കുറഞ്ഞ് 31.3% ആയപ്പോൾ എൽ.ഡി.എഫിന്റെ വോട്ട് നഷ്ടം മൂന്ന് ശതമാനം. 2014-ൽ നഷ്ടമായ വോട്ടുകൾ മിക്കവാറും തിരികെ യു.ഡി.എഫിലെത്തിയപ്പോഴും  മൂന്ന് തവണയും എൽ.ഡി.എഫിന് വോട്ട് ഷെയർ ഉയർത്താനായില്ല

1957 മുതൽ ഇതുവരെ 18 ലോക്‌സഭാ തിരഞ്ഞെടുപ്പുകളാണ് കേരളത്തിലുണ്ടായത്. എന്നാൽ, മുന്നണി രൂപീകരിച്ച് ഇടതുപക്ഷ ജനാധിപത്യ മുന്നണിയായി ഇടതുപാർട്ടികൾ മത്സരിക്കാനിറങ്ങുന്നത് 1989 മുതലാണ്. അതിന്ശേഷം ഇതുവരെ നടന്ന 9 തിരഞ്ഞെടുപ്പുകളിൽ നാല് തവണ എൽ.ഡി.എഫ്.. പത്തിന് മുകളിൽ സീറ്റ് നേടി (1989-17, 1991- 12, 1996- 15, 2004- 18. എന്നാൽ 2009-ലെ മണ്ഡല പുനർനിർണയത്തിന് ശേഷം നടന്ന മൂന്നിൽ രണ്ട് തിരഞ്ഞെടുപ്പിലും എൽ.ഡി.എഫ് രണ്ടക്കം കടന്നിട്ടില്ല. ഇത്തവണയും എൽ.ഡി.എഫിനെതിരാണ് എക്‌സിറ്റ് പോൾ ഫലങ്ങൾ. അഞ്ചിന് മുകളിൽ ഒരു ഏജൻസിയും പ്രവചിച്ചിട്ടേയില്ല. പല മണ്ഡലങ്ങളിലും കോൺഗ്രസിന് ചെറിയ ശതമാനം മാത്രം വോട്ട് നഷ്ടം വന്നപ്പോൾ എൽ.ഡി.എഫിന്റെ വിധി അതായിരുന്നില്ല.