പുതുച്ചേരി ജവാഹർലാൽ ഇൻസ്റ്റിറ്റ്യൂട്ട് ഓഫ് പോസ്റ്റ് ഗ്രാജ്വേറ്റ് മെഡിക്കൽ എജ്യുക്കേഷൻ ആൻഡ് റിസർച്ച് (ജിപ്മർ), വിവിധ നാലുവർഷ ബി.എസ്‌സി. പ്രോഗ്രാമുകളിലെ പ്രവേശനത്തിന് അപേക്ഷ ക്ഷണിച്ചു. പ്രതിവർഷ അക്കാദമിക്/ട്യൂഷൻ ഫീസ് 1200 രൂപയാണ്‌.

To advertise here,

പ്രോഗ്രാമുകൾ: ബി.എസ്‌സി. നഴ്സിങ്, ബി.എസ്‌സി. അലൈഡ് ഹെൽത്ത് സയൻസസ് പ്രോഗ്രാമുകളിലേക്കാണ് പ്രവേശനം.

അലൈഡ് ഹെൽത്ത് സയൻസ് കോഴ്സുകൾ:● ബാച്ചിലർ ഓഫ് മെഡിക്കൽ ലബോറട്ടറി സയൻസസ് ● അനസ്തേഷ്യാ ടെക്നോളജി ● ബാച്ചിലർ ഓഫ് ഒപ്റ്റോമെട്രി ●കാർഡിയാക് ലബോറട്ടറി ടെക്നോളജി ● ഡയാലിസിസ് തെറാപ്പി ടെക്നോളജി ● മെഡിക്കൽ ലബോറട്ടറി ടെക്നോളജി ഇൻ ബ്ലഡ് ബാങ്കിങ് ● മെഡിക്കൽ റേഡിയോളജി ആൻഡ് ഇമേജിങ് ടെക്നോളജി ● ന്യൂറോ ടെക്നോളജി ● ന്യൂക്ലിയാർ മെഡിസിൻ ടെക്നോളജി ● പെർഫ്യൂഷൻ ടെക്നോളജി ● റേഡിയോതെറാപ്പി ടെക്നോളജി.

കോഴ്സുകളുടെ ദൈർഘ്യം നാലുവർഷമാണ്. ബി.എസ്‌സി. നഴ്സിങ്ങിൽ 24 ആഴ്ച ദൈർഘ്യമുള്ള പെയ്ഡ് ഇന്റേൺഷിപ്പും ഉൾപ്പെടും. ബാച്ചിലർ ഓഫ് മെഡിക്കൽ ലബോറട്ടറി സയൻസസിൽ ആറുമാസത്തെയും മറ്റ് അലൈഡ് ഹെൽത്ത് സയൻസസ് കോഴ്സുകൾക്ക് ഒരുവർഷത്തെയും നിർബന്ധിത ഇന്റേൺഷിപ്പ് ഉൾപ്പെടും.

സീറ്റുകൾ: നഴ്സിങ്ങിന് 94 (ആൺകുട്ടികൾ-9, പെൺകുട്ടികൾ-85), 11 അലൈഡ് ഹെൽത്ത് സയൻസസിന് മൊത്തം 87 എന്നിങ്ങനെയാണ് സീറ്റുകൾ. അഖിലേന്ത്യ തലത്തിൽ നികത്തുന്ന സീറ്റുകളും പുതുച്ചേരിക്കാർക്കു സംവരണംചെയ്ത സീറ്റുകളും ഉണ്ടാകും. രണ്ടിലും സംവരണം പാലിച്ചായിരിക്കും പ്രവേശനം.

യോഗ്യത

  • ഫിസിക്സ്, കെമിസ്ട്രി, ബയോളജി/ബോട്ടണി ആൻഡ് സുവോളജി, ഇംഗ്ലീഷ് എന്നീ വിഷയങ്ങൾ പഠിച്ച്, ഓരോന്നും ജയിച്ച്, പ്ലസ്ടുതല പരീക്ഷ ജയിച്ചിരിക്കണം.
  • ഫിസിക്സ്, കെമിസ്ട്രി, ബയോളജി/ബോട്ടണി ആൻഡ് സുവോളജി എന്നിവയ്ക്ക് മൊത്തത്തിൽ 50 ശതമാനം മാർക്കുവേണം (പട്ടിക, ഒ.ബി.സി. വിഭാഗക്കാർക്ക് 40 ശതമാനം, ജനറൽ ഭിന്നശേഷിക്കാർക്ക് 45 ശതമാനം).
  • 2023 ഡിസംബർ 31-ന് 17 വയസ്സ് പൂർത്തിയാക്കിയിരിക്കണം (2007 ജനുവരി ഒന്നിനോ മുമ്പോ ജനിച്ചവരാകണം). ഉയർന്ന പ്രായപരിധിയില്ല.
  • നാഷണൽ ടെസ്റ്റിങ് ഏജൻസി (എൻ.ടി.എ.) നടത്തിയ നാഷണൽ എലിജിബിലിറ്റി കം എൻട്രൻസ് ടെസ്റ്റ്-അണ്ടർ ഗ്രാജ്വേറ്റ് (നീറ്റ്-യു.ജി.) 2023 യോഗ്യത നേടിയിരിക്കണം.

രജിസ്ട്രേഷൻ: jipmer.edu.in/announcement/ വഴി സെപ്‌റ്റംബർ അഞ്ചിന് വൈകീട്ട് അഞ്ചുവരെ രജിസ്റ്റർചെയ്യാം. കൗൺസിലിങ്ങിന് അർഹത നേടുന്നവരുടെ പട്ടിക, സെപ്‌റ്റംബർ 16-നകം പ്രസിദ്ധപ്പെടുത്തും. നേരിട്ടു നടത്തുന്ന കൗൺസിലിങ് പ്രവേശനം സെപ്‌റ്റംബർ നാലാംവാരത്തിൽ ആയിരിക്കും. തീയതി പിന്നീട് അറിയിക്കും.