ന്യൂഡല്‍ഹി: ഗവേഷകരുടെ ദീര്‍ഘനാളത്തെ പ്രതിഷേധങ്ങള്‍ക്കൊടുവില്‍ ഫെല്ലോഷിപ്പുകളില്‍ 20 ശതമാനം വര്‍ധന പ്രഖ്യാപിച്ച് കേന്ദ്രസര്‍ക്കാര്‍. ജൂനിയര്‍ റിസര്‍ച്ച് ഫെല്ലോഷിപ്പ്(JRF), സീനിയര്‍ റിസര്‍ച്ച് ഫെല്ലോഷിപ്പ് (SRF), റിസര്‍ച്ച് അസോസിയേറ്റ്‌സ് (RA) എന്നീ ഫെലോഷിപ്പുകളിലാണ് വര്‍ധന. പുതുക്കിയ ഫെലോഷിപ്പുകള്‍ 2023 ജനുവരി ഒന്നുമുതല്‍ മുന്‍കാല പ്രാബല്യത്തോടെ ആയിരിക്കുമെന്ന് ഡിപ്പാര്‍ട്ട്‌മെന്റ് ഓഫ് സയന്‍സ് ആന്‍ഡ് ടെക്‌നോളജി (ഡിഎസ്ടി) അറിയിച്ചു.
ജെ.ആര്‍.എഫ് തുക 31,000-ല്‍ നിന്ന് 37,000 ആയും എസ്.ആര്‍.എഫ് തുക 35,000--ല്‍ നിന്ന് 42,000 ആയും ഉയര്‍ത്തി. RA1- 58,000, RA2- 61,000, RA3- 63,000 എന്നിങ്ങനെയാണ് പുതുക്കിയ ഫെലോഷിപ്പുകള്‍.
2018-ലാണ് അവസാനമായി ഫെല്ലോഷിപ്പില്‍ വര്‍ധനയുണ്ടായത്. ഫെലോഷിപ്പ് തുക വര്‍ധിപ്പിക്കണമെന്നാവശ്യപ്പെട്ട് നിരവധി ഗവേഷകര്‍ രംഗത്തെത്തുകയും പ്രതിഷേധമറിയിക്കുകയും ചെയ്തിരുന്നു. റിസര്‍ച്ച് ഫെലോഷിപ്പുകള്‍ സമയബന്ധിതമായി വര്‍ധിപ്പിക്കണമെന്നും എല്ലാ മാസവും കൃത്യമായി വിതരണം ചെയ്യണമെന്നുമാവശ്യപ്പെട്ട് പത്ത് മാസത്തിലേറെയായി IISER അടക്കമുള്ള രാജ്യത്തെ മുന്‍നിരവിദ്യാഭ്യാസ സ്ഥാപനങ്ങളിലെ ഗവേഷകര്‍ പ്രതിഷേധിക്കുന്നതിനിടെയാണ് വര്‍ധന.
എന്നാല്‍, പുതുക്കിയ ഫെലോഷിപ്പ് തുക പരിമിതമാണെന്നാണ് ഗവേഷകരുടെ അഭിപ്രായം. ഫീസും പഠനച്ചെലവും കണക്കിലെടുക്കുമ്പോള്‍ തുക പര്യാപ്തമല്ലെന്നും ഗവേഷകര്‍ പറയുന്നു.
Content Highlights: Research Fellowship Hike Announced
Published: 22 Jun 2023, 02:54 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented