തൃശ്ശൂർ: കോളേജ് അധ്യാപക നിയമനവുമായി ബന്ധപ്പെട്ട ഫയൽ ഉന്നതവിദ്യാഭ്യാസ വകുപ്പ് മന്ത്രിസഭയുടെ പരിഗണനയ്ക്കുവെച്ചത് ഉദ്യോഗാർഥികളുടെ കണ്ണിൽ പൊടിയിടാൻ. പുതുതായി 138 തസ്തികകളിലേക്ക് നിയമനം നടക്കുമ്പോൾ റദ്ദാക്കുന്നത് 191 തസ്തികകളാണ്. ഫലത്തിൽ 48 എണ്ണംമാത്രമാണ് പുതിയ തസ്തികകൾ. ബാക്കിയുള്ള തൊണ്ണൂറും പുനർവിന്യാസനംവഴി നിയമനം നടക്കേണ്ട തസ്തികകളാണ്.

To advertise here,

പല കോളേജുകളിലും അധ്യാപകർ ഇല്ലാത്തതിനാൽ ഗസ്റ്റ് അധ്യാപകരെ ഉപയോഗിച്ച് ക്ലാസെടുക്കുന്ന സാഹചര്യത്തിലാണ് നിലവിലുള്ള തസ്തികകൾ കൂടി വെട്ടിക്കുറയ്ക്കുന്നത്. വിരമിച്ച ഒഴിവുകൾ റിപ്പോർട്ട് ചെയ്യാതെയാണ് പല തസ്തികകളും ഇല്ലാതാക്കുന്നത്.

2022-23ൽ നിലവിൽ വന്ന സർക്കാർ കോളേജുകളിലേക്കുള്ള പല വിഷയങ്ങളുടെയും അസി. പ്രൊഫസർ പട്ടികയുടെ കാലാവധി ഇതിനകം തീർന്നു. മറ്റു ചിലതിന്റേത് ഉടൻ അവസാനിക്കും. നിയമനവുമായി ബന്ധപ്പെട്ട ഫയൽ മന്ത്രിസഭ പാസ്സാക്കിയാൽ ഫിലോസഫി, സോഷ്യോളജി, ഇസ്ലാമിക് ഹിസ്റ്ററി, ഉറുദു തുടങ്ങിയ വിഷയങ്ങളിൽ ഒന്നാം റാങ്ക് നേടിയവർവരെ പുറന്തള്ളപ്പെടും.

ഒരു പരിഹാരവും നിർദേശിക്കാതെയാണ് സർക്കാർ തസ്തിക റദ്ദാക്കൽ തീരുമാനവുമായി മുന്നോട്ടുപോകുന്നതെന്ന് പട്ടികയിലുള്ളവർ പറയുന്നു. കാലഹരണപ്പെട്ട മൂന്നുവർഷ ബിരുദ കോഴ്‌സിന്റെ ജോലിഭാരം കണക്കാക്കി, അക്കാദമിക് പഠനമോ വിദഗ്ധ സമിതിയുടെ ശുപാർശയോ ഇല്ലാതെ, സെക്രട്ടറിതലത്തിലുള്ള തീരുമാനമായാണ് നടപടികളെന്നും ആക്ഷേപമുണ്ട്. നാലുവർഷ ബിരുദം നടപ്പാക്കിയിട്ടും ഇപ്പോൾ നിലവിലില്ലാത്ത കോഴ്‌സിന്റെ ജോലിഭാരം കണക്കിലാണ് പുനർവിന്യാസം തകൃതിയിൽ നടക്കുന്നത്.

ഒന്നാം റാങ്കുകാർക്കുപോലും നിയമനം ലഭിച്ചില്ല

‘അസി. പ്രൊഫസർ റാങ്ക് പട്ടികയിലെ പല വിഷയങ്ങളിലും ഒന്നാം റാങ്കുകാർക്കുപോലും നിയമനം ലഭിച്ചിട്ടില്ല. നിലവിലുളള ഒരു തസ്തികയും റദ്ദാക്കില്ല എന്ന് നിയമസഭയിലടക്കം സർക്കാർ ഉറപ്പ് നൽകിയിരുന്നു. അതെല്ലാം പാഴ്വാക്കാകുമോ എന്ന ആശങ്കയുണ്ട്’- ഇസ്ലാമിക് ഹിസ്റ്ററി റാങ്ക് ഹോൾഡർ ആയ ശ്രീനിവാസൻ രാമചന്ദ്രൻ പറഞ്ഞു.