‌തൃപ്പൂണിത്തുറ: എസ്.ഐ.ആറിൽ അപാകമുണ്ടെന്ന് പറഞ്ഞ് വയോധികനെ ഫോണിലൂടെ വിളിച്ച് തെറ്റിദ്ധരിപ്പിച്ച്, ലിങ്ക് അയച്ച് നൽകി ഏഴര ലക്ഷത്തിലധികം രൂപ തട്ടിയെടുത്തതായി പരാതി. തൃപ്പൂണിത്തുറ എരൂർ വെസ്റ്റ് സാന്ദ്രഗീതം വീട്ടിൽ പമേശ്വരൻ നായരുടെ (72) പണമാണ് സ്വകാര്യ ബാങ്കിലെ രണ്ട് അക്കൗണ്ടിൽ നിന്നായി നഷ്ടപ്പെട്ടത്. കഴിഞ്ഞ 30-ന് ഉച്ചയ്ക്ക് രണ്ടുമണിയോടെയാണ് സംഭവം.

To advertise here,

എസ്.ഐ.ആറിൽ പരമേശ്വരൻ നായരുടെയും, പിതാവിന്റെയും പേര് സംബന്ധിച്ച് മിസ് മാച്ചുണ്ടെന്നും തിരഞ്ഞെടുപ്പ് കമ്മിഷൻ ഓഫീസറെ ബന്ധപ്പെടണമെന്നും പറഞ്ഞ് എസ്.എം.എസ്. വഴി സന്ദേശം അയച്ച് തെറ്റിദ്ധരിപ്പിച്ചാണ് തട്ടിപ്പ് നടത്തിയത്. പിന്നീട് വിവരങ്ങൾ പുതുക്കുന്നതിനെന്ന് പറഞ്ഞ് പരാതിക്കാരന്റെ വാട്സാപ്പിലേക്ക് പേര് തിരുത്താനുള്ള ഫോം എന്ന പേരിൽ വ്യാജ ലിങ്കും 10 രൂപ ഫീസടക്കാനുള്ള നിർദേശവും നൽകി. 10 രൂപ അടയ്ക്കാൻ കഴിയുന്നില്ലെന്ന് അറിയിച്ചപ്പോൾ സഹായിക്കാമെന്ന് പറഞ്ഞ് ബാങ്ക് അക്കൗണ്ടിന്റെയും എ.ടി.എം. കാർഡിന്റെയും വിവരങ്ങൾ കൈക്കലാക്കി.

ഇതോടെ തൃപ്പൂണിത്തുറ വടക്കേക്കോട്ടയിലെ സ്വകാര്യ ബാങ്കിലുള്ള ഒരു അക്കൗണ്ടിൽ നിന്നും 3,20,000 രൂപയും, അതേ ബാങ്കിലെ മറ്റൊരു അക്കൗണ്ടിൽ നിന്നും 4,50,000 ഉൾപ്പെടെ 7,70,000 യാണ് നഷ്‌ടപ്പെട്ടത്. ഹിൽപ്പാലസ് പോലീസ് കേസെടുത്ത് അന്വേഷണം തുടങ്ങി.