പുണെ: മഹാരാഷ്ട്രയിലെ യുവ വ്യവസായി കേതൻ അഗർവാളിന്റെ കൊലപാതകത്തിൽ പുതിയ കണ്ടെത്തലുകളുമായി പുണെ പോലീസ്. കേസിൽ പ്രതികളായി പോലീസ് കണക്കാക്കുന്ന സിയ ഗോയലും കാമുകൻ ചേതൻ ചൗധരിയും അവരുടെ സംഭാഷണങ്ങളിൽ 'കോഡ് വാക്കുകൾ' (code words) ഉപയോഗിച്ചിരുന്നതായാണ് പോലീസിന്റെ പുതിയ കണ്ടെത്തൽ. അന്വേഷണത്തിൽ സിയയുടെ പേരിലുള്ള രണ്ടാമത്തെ മൊബൈൽ ഫോണും വെള്ളിയാഴ്ച പോലീസ് പിടിച്ചെടുത്തു.

To advertise here,

ഇക്കഴിഞ്ഞ ജൂൺ 18-ന് 25-കാരനായ കേതനെ പുണെയ്ക്കടുത്തുള്ള ലോഹഗഡ് കോട്ടയിലെ മലയിടുക്കിൽ നിന്ന് തള്ളിയിട്ട് കൊലപ്പെടുത്തി എന്നാണ് അയാളുടെ പ്രതിശ്രുത വധു സിയ (20), ചേതൻ (22) എന്നിവർക്കെതിരെയുള്ള കുറ്റം. കൃത്യത്തിന്റെ പിന്നിലുള്ള ഗൂഢാലോചനയുടെ ഭാഗമായാണ് പ്രതികൾ കോഡ് ഭാഷയിൽ ആശയവിനിമയം നടത്തിയിരുന്നത് എന്നാണ് പോലീസിന്റെ നിഗമനം. തെളിവുകൾ കണ്ടെത്തുന്നതിന്റെ ഭാഗമായി സിയയുടെ രണ്ടാമത്തെ ഫോൺ പോലീസ് പിടിച്ചെടുത്തിട്ടുണ്ട്.

കുറ്റകൃത്യത്തിന് പിന്നിലെ ഗൂഢാലോചന പുറത്തുകൊണ്ടുവരാൻ ഈ ഡിജിറ്റൽ രേഖകൾ സഹായിക്കുമെന്നാണ് പോലീസിന്റെ നിഗമനം. നിലവിൽ കോടതി പ്രതികളെ 14 ദിവസത്തെ ജുഡീഷ്യൽ കസ്റ്റഡിയിൽ വിട്ടിരിക്കുകയാണ്. തുടക്കത്തിൽ ഇതൊരു അപകടമരണമാണെന്ന് വരുത്തിതീർക്കാൻ സിയ ശ്രമിച്ചെങ്കിലും, പിന്നീട് കൊലപാതകത്തിൽ തങ്ങൾക്കുള്ള പങ്ക് ഇരുവരും സമ്മതിക്കുകയായിരുന്നു. കുറ്റകൃത്യത്തിന് മുമ്പും ശേഷവും പ്രതികൾ കൈമാറിയ കോഡ് സന്ദേശങ്ങൾ ഡീകോഡ് ചെയ്യാനുള്ള ശ്രമത്തിലാണ് അന്വേഷണ ഉദ്യോഗസ്ഥർ.

സിയയും ചേതനും കോഡ് വാക്കുകൾ ഉപയോഗിച്ചാണ് ആശയവിനിമയം നടത്തിയതെന്നും, ഇതിന്റെ അർത്ഥവും ലക്ഷ്യവും ഇനിയും കണ്ടെത്താനുണ്ടെന്നും അന്വേഷണ ഉദ്യോഗസ്ഥൻ മനോജ് പവാർ പറഞ്ഞു. പ്രതികളുടെ അറസ്റ്റിന് പിന്നാലെ സിയയിൽ നിന്നും ചേതനിൽ നിന്നും ഓരോ മൊബൈൽ ഫോണുകൾ വീതം നേരത്തെ പിടിച്ചെടുത്തിരുന്നതായി പോലീസ് പുണെ കോടതിയെ അറിയിച്ചിരുന്നു. എന്നാൽ, സിയയുടെ പക്കൽ നിന്ന് രണ്ടാമതൊരു ഫോൺ കൂടി അന്വേഷണ ഉദ്യോഗസ്ഥർ കണ്ടെടുത്തു, ഇത് കോഡ് സന്ദേശങ്ങളുടെ രഹസ്യം പുറത്തുകൊണ്ടുവരാൻ സഹായിക്കുമെന്നാണ് പോലീസിന്റെ കണക്കുകൂട്ടൽ.

മൊബൈൽ ഫോൺ വിവരങ്ങൾ അടുത്തിടെയാണ് വീണ്ടെടുത്തതെന്നും ഈ വിവരങ്ങളുടെ അടിസ്ഥാനത്തിൽ പ്രതികളെ ചോദ്യം ചെയ്യാനിരിക്കുന്നതേയുള്ളൂവെന്നും പബ്ലിക് പ്രോസിക്യൂട്ടർ വിർകുഡ് കോടതിയെ അറിയിച്ചു. ഉപയോഗിച്ച കോഡ് വാക്കുകളുടെ യഥാർത്ഥ അർത്ഥം സിയയ്ക്കും ചേതനും മാത്രമേ വിശദീകരിക്കാൻ കഴിയൂ എന്നും പ്രോസിക്യൂഷൻ കോടതിയിൽ പറഞ്ഞു. ഇവരെ നേരിട്ട് ചോദ്യം ചെയ്യാൻ കൂടുതൽ സമയവും ആവശ്യപ്പെട്ടിട്ടുണ്ട്.

എന്നാൽ ചേതന്റെ അഭിഭാഷകൻ ഉത്തർക്കർ ഈ അപേക്ഷയെ എതിർത്തു. നേരത്തെ പറഞ്ഞ അതേ കാരണങ്ങൾ ഉന്നയിച്ചാണ് പോലീസ് കസ്റ്റഡി നീട്ടാൻ ആവശ്യപ്പെടുന്നതെന്നും പുതിയ സാഹചര്യങ്ങൾ ഒന്നുമില്ലെന്നും അദ്ദേഹം വാദിച്ചു. പോലീസ് കസ്റ്റഡി നീട്ടാനുള്ള പ്രോസിക്യൂഷന്റെ ആവശ്യം കോടതി നിരസിക്കുകയും സിയയെയും ചേതനെയും ജൂലൈ 16 വരെ 14 ദിവസത്തേക്ക് ജുഡീഷ്യൽ കസ്റ്റഡിയിൽ വിടുകയും ചെയ്തു.

കേതന്റെ കൊലപാതകത്തിലേക്ക് നയിച്ച സംഭവങ്ങൾ കോർത്തിണക്കുന്നതിന്റെ ഭാഗമായി, പുതുതായി പിടിച്ചെടുത്ത മൊബൈൽ ഫോണും മറ്റ് ഡിജിറ്റൽ തെളിവുകളും വിശകലനം ചെയ്യാനുള്ള തയ്യാറെടുപ്പിലാണ് പോലീസ്.