കോഴിക്കോട്: അർജുൻ ആയങ്കിയുടെ ഇളയ സഹോദരൻ അജയ് ആയങ്കിയെ പോലീസ് അറസ്റ്റ് ചെയ്തു. കോഴിക്കോട് നടക്കാവ് പോലീസ് ആണ് ഇയാളെ പിടികൂടിയത്. ഒളിവിൽ കഴിയുമ്പോൾ അർജുൻ ആയങ്കിക്ക് സാമ്പത്തിക സഹായം നൽകിയതിനും പോലീസിനെ വെല്ലുവിളിക്കുന്ന തരത്തിലുള്ള സോഷ്യൽ മീഡിയ പോസ്റ്റുകൾക്ക് പിന്നിൽ പ്രവർത്തിച്ചതിനുമാണ് നടപടി. ശനിയാഴ്ച രാത്രി 12 മണിയോടെ കോഴിക്കോട് നടക്കാവ് ഭാഗത്തുള്ള ഒരു സ്വകാര്യ സ്ഥാപനത്തിന് മുന്നിൽ വെച്ചാണ് അജയ് പോലീസ് പിടിയിലാകുന്നത്.

To advertise here,

അർജുൻ ആയങ്കിയുടെ ബാങ്ക് അക്കൗണ്ടുകൾ പോലീസ് ഫ്രീസ് ചെയ്തതിനെ തുടർന്ന്, കേസ് നടത്തുന്നതിനാവശ്യമായ പണം സ്വരൂപിക്കാൻ അജയുടെ അക്കൗണ്ടാണ് ഉപയോഗിച്ചിരുന്നത്. സോഷ്യൽ മീഡിയ വഴി ക്രൗഡ്‌ ഫണ്ടിങ് നടത്തി പണം ശേഖരിക്കാനായി സ്വന്തം പേരിലുള്ള ക്യു.ആർ കോഡ് സ്‌കാനർ ഇയാൾ പ്രചരിപ്പിച്ചു. ഇത്തരത്തിൽ സമാഹരിച്ച പണം ഉപയോഗിച്ചാണ് അർജുൻ ആയങ്കിയുടെ അഭിഭാഷകർക്കുള്ള ഫീസും മറ്റ് ഒളിവുജീവിത ചെലവുകളും വഹിച്ചിരുന്നത് എന്ന് പോലീസ് കണ്ടെത്തിയിട്ടുണ്ട്.

അർജുൻ ആയങ്കി ഒളിവിലിരിക്കുമ്പോൾ സോഷ്യൽ മീഡിയയിൽ പങ്കുവെച്ചിരുന്ന പ്രകോപനപരമായ പോസ്റ്റുകൾക്ക് പിന്നിലും അജയുടെ സഹായം ഉണ്ടായിരുന്നതായി പോലീസ് വ്യക്തമാക്കുന്നു. പോലീസിനെ വെല്ലുവിളിക്കുന്ന തരത്തിലുള്ള ഉള്ളടക്കങ്ങൾ തയ്യാറാക്കുന്നതിനും അത് പ്രചരിപ്പിക്കുന്നതിനും ഇയാൾ മുഖ്യ പങ്കുവഹിച്ചു. അർജുന്റെ ഡിജിറ്റൽ സാന്നിധ്യം നിലനിർത്തുന്നതിനും പോലീസിനെതിരെയുള്ള കുറിപ്പുകൾ സമൂഹമാധ്യമങ്ങളിൽ എത്തിക്കുന്നതിനും അജയ് വലിയ രീതിയിൽ സഹായിച്ചിരുന്നുവെന്നും കണ്ടെത്തലുണ്ട്.

എറണാകുളം പോലീസിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ കോഴിക്കോട് നടത്തിയ തിരച്ചിലിലാണ് അജയ് പിടിയിലായത്. ഭാരതീയ ന്യായ സംഹിത 170 പ്രകാരമുള്ള വകുപ്പുകൾ ചുമത്തിയാണ് അജയ്ക്കെതിരെ കേസ് രജിസ്റ്റർ ചെയ്തിരിക്കുന്നത്. അജയിയെ പിടികൂടി അറസ്റ്റ് രേഖപ്പെടുത്തിയതിന് പിന്നാലെയാണ് കണ്ണൂരിൽ നിന്ന് അർജുൻ ആയങ്കിയെ പിടികൂടാൻ പോലീസിന് സാധിച്ചത്. അറസ്റ്റിലായ അജയിയെ പുലർച്ചയോടെ കോഴിക്കോട് ബീച്ച് ആശുപത്രിയിൽ എത്തിച്ച് വൈദ്യപരിശോധനയ്ക്ക് വിധേയനാക്കി.